‘ഒരു കുട്ടനാടൻ ബ്ലോഗ്’ ബോക്സ് ഓഫീസിൽ നേരിടുക ‘കായംകുളം കൊച്ചുണ്ണി’യെ!
‘ഒരു കുട്ടനാടൻ ബ്ലോഗ്’ എന്ന മമ്മൂട്ടിയുടെ പുതിയ ചിത്രത്തിന്‍റെ ഫസ്റ്റ് ലുക്ക് പോസ്റ്റർ കഴിഞ്ഞ ദിവസം പുറത്തിറങ്ങിയിരുന്നു. തനി നാടൻ ഗെറ്റപ്പിൽ മമ്മൂട്ടി പ്രത്യക്ഷപ്പെട്ട പോസ്റ്ററിന് മികച്ച അഭിപ്രായങ്ങൾ ആണ് ലഭിച്ചത്. ഇപ്പോൾ പുറത്തു വരുന്ന റിപ്പോർട്ടുകൾ സൂചിപ്പിക്കുന്നത് ബോക്സ് ഓഫീസിൽ ‘ഒരു കുട്ടനാടൻ ബ്ലോഗി’ന് നേരിടേണ്ടി വരിക ഒരു വമ്പൻ എതിരാളിയെ ആയിരിക്കും എന്നതാണ്.
‘കായംകുളം കൊച്ചുണ്ണി’ എന്ന വമ്പൻ ചിത്രത്തെ ആയിരിക്കും ‘ഒരു കുട്ടനാടൻ ബ്ലോഗ്’ ബോക്സ് ഓഫീസിൽ നേരിടുക എന്നാണ് സൂചന. ഓണം റിലീസായി ഓഗസ്റ്റ് 18ന് കായംകുളം കൊച്ചുണ്ണി തീയേറ്ററുകളിൽ എത്തും എന്നാണ് വിവരം. ഓണം റിലീസായി തന്നെ ആണ് മമ്മൂട്ടി ചിത്രവും എത്തുന്നത് എങ്കിലും ഔദ്യോഗികമായി റിലീസ് തീയതി പുറത്തുവിട്ടിട്ടില്ല.
റോഷൻ ആൻഡ്രൂസ് സംവിധാനം ചെയ്യുന്ന കായംകുളം കൊച്ചുണ്ണിയിൽ നിവിൻ പൊളി ആണ് നായക കഥാപാത്രത്തെ അവതരിപ്പിക്കുന്നത്. കൂടാതെ സൂപ്പർതാരം മോഹൻലാൽ ഇത്തിക്കര പക്കി എന്ന അതിശക്തമായ അതിഥി കഥാപാത്രമായി എത്തുന്നും ഉണ്ട്. അത് കൊണ്ട് തന്നെ വമ്പൻ പ്രതീക്ഷ ആണ് ഈ ചിത്രത്തിന് ഉള്ളത്. ബോബി സഞ്ജയ് ടീം തിരക്കഥ ഒരുക്കിയ ചിത്രത്തിൽ പ്രിയ ആനന്ദ്, ബാബു ആന്റണി, സണ്ണി വെയ്ൻ തുടങ്ങിയവർ ആണ് മറ്റു താരങ്ങൾ.
അതെ സമയം, സേതു സംവിധാനം ചെയ്യുന്ന മമ്മൂട്ടി ചിത്രത്തിലും വമ്പൻ താരനിര ആണ് അണിനിരക്കുന്നത്. മൂന്നു നായികമാരായി അനു സിത്താര, റായ് ലക്ഷ്മി, ഷംന കാസിം എന്നിവർ അഭിനയിക്കുന്ന ചിത്രത്തിൽ യുവ നടന്മാരായ ജേക്കബ് ഗ്രിഗറി, ഷഹീൻ സിദ്ദിഖ്, വിവേക് ഗോപൻ, സഞ്ജു ശിവറാം, ജൂഡ് ആന്റണി തുടങ്ങിയവരും പ്രധാന വേഷങ്ങളിൽ എത്തുന്നു. സുരാജ് വെഞ്ഞാറന്മൂട്, നെടുമുടി വേണു, സിദ്ദിഖ്, ലാലു അലക്സ് തുടങ്ങിയ താരങ്ങളും ചിത്രത്തിന്‍റെ താര നിരയിൽ ഉണ്ട്.
