ബോക്സ് ഓഫീസിലും ലക്കി ആണ് ഭാസ്കർ; ദുൽഖറിന്റെ ലക്കി ഭാസ്കർ ആദ്യ ദിന ആഗോള കളക്ഷൻ റിപ്പോർട്ട് പുറത്ത്
ദുൽഖർ സൽമാൻ നായകനായ പാൻ ഇന്ത്യൻ തെലുങ്ക് ചിത്രം ലക്കി ഭാസ്കറിന്റെ ആദ്യ ദിന ആഗോള കളക്ഷൻ റിപ്പോർട്ട് എത്തി. ആദ്യ ദിനം ആഗോള തലത്തിൽ 12 കോടി 70 ലക്ഷത്തിന് മുകളിലാണ് ചിത്രം നേടിയത് എന്നാണ് റിപ്പോർട്ടുകൾ വരുന്നത്. കേരളത്തിൽ നിന്ന് മാത്രം 2 കോടിക്ക് മുകളിലാണ് ചിത്രം നേടിയെടുത്തത് എന്നും ആദ്യ കണക്കുകൾ പറയുന്നു . കേരളത്തിൽ ആദ്യ ദിനം 175 സ്‌ക്രീനുകളിൽ റിലീസ് ചെയ്ത ചിത്രം രണ്ടാം ദിനം 200 ലധികം സ്‌ക്രീനുകളിലേക്ക് ഉയർത്തിയിട്ടുണ്ട് എന്നതും ശ്രദ്ധേയമാണ്.
കേരളത്തിലും ഗൾഫിലും ലക്കി ഭാസ്കർ വിതരണം ചെയ്തിരിക്കുന്നത് ദുൽഖർ സൽമാന്റെ വേഫെറർ ഫിലിംസാണ്. മികച്ച പ്രേക്ഷക പ്രതികരണമാണ് ആദ്യ ദിനം മുതൽ തന്നെ ചിത്രം സ്വന്തമാക്കിയത്. ഒക്ടോബർ മുപ്പതിന് വൈകുന്നേരം ആന്ധ്രയിൽ നടന്ന പ്രീമിയർ ഷോകളോടെയാണ് ചിത്രം പ്രദർശനം ആരംഭിച്ചത്.
1992 ൽ ബോംബ സ്റ്റോക്ക് എക്സ്ചേഞ്ചിൽ നടന്ന കുപ്രസിദ്ധമായ സാമ്പത്തിക തട്ടിപ്പിൻ്റെ പശ്‌ചാത്തലത്തിൽ ആണ് ചിത്രം കഥ പറയുന്നത്. ഭാസ്കർ എന്ന ഒരു സാധാരണ ബാങ്ക് ക്ലർക്കിനെ ചുറ്റിപ്പറ്റിയാണ് കഥ വികസിക്കുന്നത്. തെലുങ്ക്, മലയാളം, തമിഴ്, ഹിന്ദി ഭാഷകളിൽ റിലീസ് ചെയ്തിരിക്കുന്ന ചിത്രം സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്നാണ് നിർമ്മിച്ചിരിക്കുന്നത്.
വെങ്കി അറ്റ്ലൂരി രചിച്ച് സംവിധാനം ചെയ്ത ചിത്രത്തിലെ നായികയായി അഭിനയിച്ചിരിക്കുന്നത് മീനാക്ഷി ചൗധരി. ജി വി പ്രകാശ് കുമാർ സംഗീതമൊരുക്കിയ ചിത്രത്തിന് കാമറ ചലിപ്പിച്ചത് നിമിഷ് രവിയും എഡിറ്റിംഗ് നിർവഹിച്ചത് നവീൻ നൂലിയുമാണ്. ബംഗ്ളാൻ ആണ് കലാസംവിധായകൻ. ലക്കി ഭാസ്കറിന്റെ വിജയത്തോടെ തെലുങ്കിൽ ഹാട്രിക് ഹിറ്റ് ആണ് ദുൽഖർ നേടിയിരിക്കുന്നത്.
