‘കൽക്കി 2898 എഡി’യുടെ ബുക്കിംഗ് കേരളത്തിലും ആരംഭിച്ചു; പാൻ ഇന്ത്യ തലത്തിൽ 2 ദിവസം കൊണ്ട് നേടിയത് 16.22 കോടി രൂപ…
ജൂൺ 27ന് ബ്രഹ്മാണ്ഡ റിലീസിന് തയ്യാറാകുന്ന പ്രഭാസ് – നാഗ് അശ്വിൻ ചിത്രം ‘കൽക്കി 2898 എഡി’യുടെ കേരളത്തിലെ ടിക്കറ്റ് ബുക്കിംഗ് ആരംഭിച്ചു. വൈജയന്തി മൂവീസിന്റെ ബാനറിൽ സി അശ്വിനി ദത്ത് നിർമ്മിക്കുന്ന ഈ ബ്രഹ്മാണ്ഡ ചിത്രം വേഫറർ ഫിലിംസാണ് കേരളത്തിൽ വിതരണത്തിനെത്തിക്കുന്നത്. ചിത്രത്തിന്റെ അടുത്തിടെ പുറത്തുവിട്ട റിലീസ് ട്രെയിലർ പ്രേക്ഷക പ്രതീക്ഷ ഉയർത്തിയിട്ടുണ്ട്. തെലുങ്ക്, ഹിന്ദി, തമിഴ്, മലയാളം, കന്നഡ, ഇംഗ്ലീഷ് തുടങ്ങി ഒന്നിലധികം ഭാഷകളിൽ പുറത്തുവിട്ട ട്രെയിലറിന് മില്യൺ വ്യൂവ്സാണ് ലഭിച്ചത്.
ചിത്രത്തിന്റെ അഡ്വാൻസ് ബുക്കിംഗ് റിപ്പോർട്ടുകളും പുറത്തുവന്നിട്ടുണ്ട്. ഞായറാഴ്ച ബുക്കിംഗ് ആരംഭിച്ച ചിത്രത്തിന്റെ ടിക്കറ്റ് സെയിൽസ് രണ്ട് ദിവസം കൊണ്ട് 5 ലക്ഷം കടന്നിട്ടുണ്ട് എന്ന് സാക്നിൽക്ക് റിപ്പോർട്ട് ചെയ്തു. 16.22 കോടിയുടെ പ്രീ-സെയിൽസാണ് രണ്ട് ദിവസം കൊണ്ട് പാൻ ഇന്ത്യൻ തലത്തിൽ ചിത്രം നേടിയിരിക്കുന്നത്. 2.7 ലക്ഷം ടിക്കറ്റ് സെയിൽസും 14.5 കോടിയുടെ പ്രീ-സെയിൽസും നടന്നത് തെലുങ്ക് മാർക്കറ്റിൽ ആണ്.
ഇന്ത്യൻ മിത്തോളജിയിൽ വേരൂന്നി പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന ഒരു സയൻസ് ഫിക്ഷനായി ആണ് ‘കൽക്കി 2898 എഡി’ ഒരുങ്ങുന്നത്. ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളുടെ കഥയാണ് ചിത്രം പറയുന്നത്. പ്രഭാസിനൊപ്പം മെഗാസ്റ്റാർ അമിതാഭ് ബച്ചൻ, ഉലഗനായകൻ കമൽഹാസൻ, ദിഷാ പടാനി തുടങ്ങിയവർ സുപ്രധാന വേഷങ്ങൾ അവതരിപ്പിക്കുന്ന ചിത്രത്തിൽ ദീപിക പദുക്കോണാണ് നായിക. ‘സുമതി’യായ് ദീപിക പ്രത്യക്ഷപ്പെടുമ്പോൾ ‘അശ്വത്ഥാമാവ്’ എന്ന കഥാപാത്രമായ് അമിതാഭ് ബച്ചനും ‘യാസ്കിൻ’ എന്ന കഥാപാത്രമായ് കമൽഹാസനും ‘ഭൈരവ’യായ് പ്രഭാസും ‘റോക്സി’യായി ദിഷാ പടാനിയും വേഷമിടുന്നു.
ബിസി 3101-ലെ മഹാഭാരതത്തിൻ്റെ ഇതിഹാസ സംഭവങ്ങൾ മുതൽ എഡി 2898 സഹസ്രാബ്ദങ്ങൾ വരെ നീണ്ടുനിൽക്കുന്ന യാത്രയാണ് ‘കൽക്കി 2898 എഡി’യിൽ ദൃശ്യാവിഷ്കരിക്കുന്നത്. സിനിമയുടെ റിലീസ് ഡേറ്റ് പ്രഖ്യാപിച്ചത് മുതൽ വൻ പ്രതീക്ഷയോടെയാണ് ഈ പാൻ ഇന്ത്യൻ ചിത്രത്തിനായ് പ്രേക്ഷകർ കാത്തിരിക്കുന്നത്. പിആർഒ: ശബരി.
