ഇളയരാജയുടെ ഹിറ്റ് ഗാനത്തിന്റെ റീമിക്സുമായി ‘പുഷ്പക വിമാനം’ ടീം; ‘കാതൽ വന്തിരിച്ചു’ വീഡിയോ ഗാനം പുറത്ത്…
സിജു വിൽസണിനെ നായകനാക്കി ഉല്ലാസ് കൃഷ്ണ സംവിധാനം ചെയ്ത പുഷ്പക വിമാനം എന്ന ചിത്രത്തിലെ ഏറ്റവും പുതിയ വീഡിയോ ഗാനം പുറത്ത്. റീമിക്സായി ഒരുക്കിയ ‘കാതൽ വന്തിരിച്ചു’ എന്ന ഗാനത്തിന്റെ വീഡിയോ ആണ് ഇപ്പോൾ റിലീസ് ചെയ്തിരിക്കുന്നത്. 1979 ൽ റിലീസ് ചെയ്ത കമൽ ഹാസൻ ചിത്രം കല്യാണരാമനിലെ ഗാനത്തിന്റെ റീമിക്സ് വെർഷൻ ആണിത്. ഇളയരാജ ഈണം നൽകിയ ഇതിന്റെ ഒറിജിനൽ പതിപ്പിന് വരികൾ രചിച്ചത് പാഞ്ചു അരുണാചലമാണ്.
രാഹുൽ രാജ് റീമിക്സ് ചെയ്തിരിക്കുന്ന ഈ ഗാനത്തിന് അഡീഷണൽ വരികൾ രചിച്ചത് അനൂപ് കൃഷ്ണൻ മണ്ണൂർ ആണ്. സ്റ്റാൻഡ് അപ് കോമേഡിയനും സോഷ്യൽ മീഡിയ ആക്ടിവിസ്റ്റുമായ സിദ്ദിഖ് റോഷനും സംഗീത സംവിധായകൻ രാഹുൽ രാജും ചേർന്നാണ് ഈ ഗാനം ആലപിച്ചത്. പ്രണയ രംഗങ്ങൾ ഉൾപ്പെടുത്തിയാണ് ഈ ഗാനം ഒരുക്കിയിരിക്കുന്നത്.
പ്രണയം, സൗഹൃദം, അതിജീവനം എന്നീ ഘടകങ്ങൾക്ക് പ്രാധാന്യം നൽകിയാണ് ‘പുഷ്പക വിമാനം’ ഒരുക്കിയിരിക്കുന്നതെന്നാണ് സൂചന. സിജു വിൽസണിന് ഒപ്പം നമൃത, ബാലു വർഗീസ്, ധീരജ് ഡെന്നി എന്നിവരും കേന്ദ്ര കഥാപാത്രങ്ങളാകുന്ന ചിത്രത്തിന് തിരക്കഥ രചിച്ചത് സന്ദീപ് സദാനന്ദനും ദീപു എസ് നായരും ചേർന്നാണ്. റയോണ റോസ് പ്രൊഡക്ഷൻസിൻ്റെ ബാനറിൽ ജോൺ കുടിയാൻമല, കിവിസോ മൂവീസ്, നെരിയാ ഫിലിം ഹൗസ് എന്നിവർ ചേർന്ന് നിർമ്മിക്കുന്ന ചിത്രം രാജ്കുമാർ സേതുപതി ആണ് അവതരിപ്പിക്കുന്നത്. സിദ്ദിഖ്, മനോജ് കെ യു, ലെന, പത്മരാജ് രതീഷ്, സോഹൻ സീനുലാൽ, ഷൈജു അടിമാലി, ജയകൃഷ്ണൻ, ഹരിത്, വസിഷ്ഠ് തുടങ്ങിയവർ ആണ് ചിത്രത്തിലെ മറ്റ് താരങ്ങൾ.
ആരിഫാ പ്രൊഡക്ഷൻസ് ഈ ചിത്രം പ്രദർശനത്തിനെത്തിക്കുന്നത്. ഛായാഗ്രഹണം: രവി ചന്ദ്രൻ, ചിത്രസംയോജനം: അഖിലേഷ് മോഹൻ, സംഗീതം: രാഹുൽ രാജ്, കലാസംവിധാനം: അജയ് മങ്ങാട്, മേക്കപ്പ്: ജിത്തു പയ്യന്നൂർ, വസ്ത്രാലങ്കാരം: അരുൺ മനോഹർ, പ്രൊഡക്ഷൻ മാനേജർ: നജീർ, പ്രൊഡക്ഷൻ എക്സിക്യൂട്ടീവ്: പ്രസാദ് നമ്പ്യാങ്കാവ്, പ്രൊഡക്ഷൻ കൺട്രോളർ: പ്രശാന്ത് നാരായണൻ, പിആർഒ: ശബരി.
