ആദിവി ശേഷ് നായകനാകുന്ന ‘ഗൂഢാചാരി 2’ സെറ്റിൽ അപകടം; ബോളിവുഡ് താരം ഇമ്രാൻ ഹാഷ്മിക്ക് പരിക്ക്
ആദിവി ശേഷിന്റെ ‘ഗൂഡാചാരി 2’ന്റെ സെറ്റിൽ ഉണ്ടായ അപകടത്തിൽ ബോളിവുഡ് താരം ഇമ്രാൻ ഹാഷ്മിക് പരിക്ക്. പാൻ ഇന്ത്യൻ ചിത്രമായി ഒരുക്കുന്ന സിനിമയുടെ ഹൈദരാബാദ് ഷെഡ്യൂളിൽ ആക്ഷൻ രംഗങ്ങൾ ചിത്രീകരിക്കുമ്പോഴാണ് അദ്ദേഹത്തിന് പരിക്കേറ്റത്. ആക്ഷനിടയിൽ ഉയർന്നു ചാടുന്ന ഒരു രംഗം ചിത്രീകരിക്കുമ്പോഴാണ് അപകടം സംഭവിച്ചതെന്നാണ് സൂചന. അദ്ദേഹത്തിന്റെ കഴുത്തിനാണ് പരിക്കേറ്റിരിക്കുന്നത്. താടിയെല്ലിനു താഴെ മുറിവേറ്റ നടന്റെ മുഖത്തിന്റെ ഫോട്ടോയും സമൂഹ മാധ്യമങ്ങളിൽ പ്രചരിക്കുന്നുണ്ട്.
പവൻ കല്യാൺ നായകനായ ഒജി എന്ന ചിത്രത്തിന് ശേഷം ഇമ്രാൻ ഹാഷ്മി അഭിനയിക്കുന്ന തെലുങ്ക് ചിത്രമാണ് ‘ഗൂഢാചാരി 2’. വിനയ് കുമാർ സിരിഗിനിദി സംവിധാനം ചെയ്യുന്ന ഈ ചിത്രം, പീപ്പിൾ മീഡിയ ഫാക്ടറി, അഭിഷേക് അഗർവാൾ ആർട്സ്, എകെ എൻ്റർടെയ്ൻമെന്റ്സ് എന്നിവയുടെ ബാനറിൽ ടിജി വിശ്വ പ്രസാദ്, അഭിഷേക് അഗർവാൾ, വിവേക് കുചിബോട്ടിലാ എന്നിവർ ചേർന്നാണ് നിർമ്മിക്കുന്നത്.
സ്പൈ ആക്ഷൻ ത്രില്ലറായി ഒരുക്കുന്ന ചിത്രം സൂപ്പർ ഹിറ്റ് ചിത്രമായ ഗൂഡാചാരിയുടെ രണ്ടാം ഭാഗമാണ്. ആദ്യ ചിത്രത്തിന്റെ ആറാം വാർഷികത്തിൽ രണ്ടാം ഭാഗത്തിൽ നിന്നുള്ള ആവേശകരമായ നിമിഷങ്ങൾ ആദിവി ശേഷ് സമൂഹ മാധ്യമങ്ങളിൽ പങ്ക് വെച്ചിരുന്നു. 2025 പകുതിയോടെ ബ്രഹ്മാണ്ഡ റിലീസായി പ്ലാൻ ചെയ്യുന്ന ഗൂഢാചാരി 2, ബഹുഭാഷാ ചിത്രമായാവും പ്രേക്ഷകർക്ക് മുന്നിലെത്തുക. ആദിവി ശേഷിനൊപ്പം ചേർന്ന് സംവിധായകൻ വിനയ് കുമാർ തന്നെയാണ് ചിത്രം രചിച്ചിരിക്കുന്നതും.
