ലക്കി ഭാസ്‌കറിലൂടെ ഹാട്രിക്ക് ബ്ലോക്ക്ബസ്റ്റർ; തെലുങ്കിൽ അപൂർവ്വ നേട്ടവുമായി ചരിത്രമെഴുതി ദുൽഖർ സൽമാൻ…
ദുൽഖർ സൽമാന്റെ ഏറ്റവും പുതിയ റിലീസായ ‘ലക്കി ഭാസ്കർ’ അദ്ദേഹത്തിന്റെ കരിയറിലെ ഏറ്റവും വലിയ ഹിറ്റിലേക്കാണ് കുതിക്കുകയാണ്. വെങ്കി അറ്റ്ലൂരി രചിച്ച് സംവിധാനം ചെയ്ത ഈ പാൻ ഇന്ത്യൻ ചിത്രം തെലുങ്ക്, മലയാളം, തമിഴ്, ഹിന്ദി ഭാഷകളിൽ ലോകമമെമ്പാടുമുള്ള തിയേറ്ററുകളിൽ വിജയകരമായി പ്രദർശനം തുടരുമ്പോൾ ഒരു അപൂർവ്വ നേട്ടം കൂടി ദുൽഖർ സ്വന്തമാക്കിയിരിക്കുക ആണ്.
തെലുങ്കിൽ തുടർച്ചയായി വിജയം നേടുന്ന ആദ്യത്തെ മലയാള താരം ആയിരിക്കുകയാണ് ദുൽഖർ സൽമാൻ. മാത്രമല്ല, കമൽ ഹാസന് ശേഷം ആദ്യമായാണ് തെലുങ്ക് ഇന്ഡസ്ട്രിക്ക് പുറത്ത് നിന്നെത്തിയ ഒരു താരം അവിടെ തുടർച്ചയായി ഹിറ്റുകൾ സമ്മാനിക്കുന്നതും. 2018 ൽ റിലീസ് ചെയ്ത മഹാനടി എന്ന ചിത്രത്തിലൂടെയാണ് ദുൽഖർ തെലുങ്കിൽ അരങ്ങേറ്റം കുറിച്ചത്. നാഗ് അശ്വിൻ ഒരുക്കിയ ഈ ഹിറ്റ് ചിത്രത്തിന് പിന്നാലെ 2022 ൽ ഹനു രാഘവപുടി സംവിധാനം ചെയ്ത സീതാ രാമം എന്ന ചിത്രവുമായി ദുൽഖർ എത്തി. ദുൽഖറിന്റെ കരിയറിലെ തന്നെ ബിഗ് ഹിറ്റ് ആയി ഈ റൊമാന്റിക് ഡ്രാമ മാറി.
ഇപ്പോഴിതാ, കളക്ഷനിൽ സീതാ രാമത്തെയും മറികടക്കാൻ കുതിക്കുന്ന ലക്കി ഭാസ്‌കറിലൂടെ തെലുങ്കിൽ ഹാട്രിക്ക് വിജയമെന്ന അപൂർവ റെക്കോർഡ് ദുൽഖറിനെ തേടിയെത്തിയിരിക്കുകയാണ്. തെലുങ്കിലെ പ്രേക്ഷകരുമായി തനിക്ക് ദൈവികമായ ഒരു ബന്ധമാണ് തോന്നുന്നത് എന്ന് ലക്കി ഭാസ്കറിന്റെ വിജയാഘോഷത്തിൻറെ ഭാഗമായി നടന്ന പ്രസ് മീറ്റിൽ ദുൽഖർ പറഞ്ഞിരുന്നു. ലക്കി ഭാസ്കറിന് ശേഷം പവൻ സാദിനേനി ഒരുക്കുന്ന ‘ആകാസംലോ ഓക താര’ എന്ന തെലുങ്ക് ചിത്രവും ദുൽഖർ സൽമാൻ ചെയ്യുന്നുണ്ട്.
സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്ന് നിർമ്മിച്ച ലക്കി ഭാസ്കർ അവതരിപ്പിച്ചിരിക്കുന്നത് ശ്രീകര സ്റ്റുഡിയോസ് ആണ്. മെഗാ വിജയം നേടി മുന്നേറുന്ന ഈ ചിത്രം കേരളത്തിലും ഗൾഫിലും ചിത്രം വിതരണം ചെയ്തിരിക്കുന്നത് ദുൽഖർ സൽമാന്റെ വേഫെറർ ഫിലിംസാണ്.
