ബാലകൃഷ്ണയുടെ മാസ് ആന്തമായി പുതിയ ‘ജയ് ബാലയ്യ’ ഗാനം എത്തി…
ബാലയ്യ എന്ന വിളിപ്പേരിൽ അറിയപ്പെടുന്ന തെലുങ്ക് സൂപ്പർതാരം ബാലകൃഷ്ണ നായകനാകുന്ന ഏറ്റവും പുതിയ ചിത്രമാണ് ‘വീര സിംഹ റെഡ്‌ഡി’. ഈ ചിത്രത്തിലെ ആദ്യം ഗാനം റിലീസ് ചെയ്തിരിക്കുക ആണ് അണിയറപ്രവർത്തകർ. ജയ് ബാലയ്യ എന്ന് ടൈറ്റിൽ നൽകിയിരിക്കുന്ന ആദ്യ ഗാനം ബാലകൃഷ്ണയുടെ മാസ് ആന്തം ആണ്. ബാലകൃഷ്ണയുടെ മുൻ റിലീസ് ചിത്രമായ അഖണ്ഡയിലും ഒരു ജയ് ബാലയ്യ ഗാനം ഉണ്ടായിരുന്നു. വമ്പൻ സ്വീകാര്യത നേടിയ ആ ഗാനത്തിന് പിന്നാലെ ആണ് പുതിയ ചിത്രത്തിലും മറ്റൊരു ജയ് ബാലയ്യ ഗാനം ആരാധകർക്ക് ട്രീറ്റ് ഒരുക്കാൻ ഉൾപ്പെടുത്തിയിരിക്കുന്നത്. മുൻ ചിത്രത്തിലെ പോലെ എസ് തമൻ ആണ് പുതിയ ജയ് ബാലയ്യ ഗാനത്തിനും സംഗീതം ഒരുക്കിയിരിക്കുന്നത്. ബാലയ്യയുടെ മാസ് വൈബ് നന്നായി പിടിച്ചെടുക്കുന്ന ഒരു പെപ്പി നമ്പർ ആണ് ഈ ഗാനം എന്ന് സോഷ്യൽ മീഡിയയിലെ പ്രതികരണങ്ങളിൽ ആരാധകർ കുറിക്കുന്നുണ്ട്.
സംഗീത സംവിധായകൻ തമനും ഈ ഗാന രംഗത്തിൽ പ്രത്യക്ഷപ്പെടുന്നുണ്ട്. രാമജോഗയ്യ ശാസ്ത്രി രചിച്ച ഗാനം കരീമുള്ള ആണ് ആലപിച്ചിരിക്കുന്നത്. ഗോപിചാന്ദ് മാലിനേനി സംവിധാനം ചെയ്യുന്ന ഈ മാസ് ആക്ഷൻ ചിത്രത്തിന്റെ പ്രൊമോഷന് ഈ ഗാനത്തോട് കൂടി തുടക്കം കുറിച്ചിരിക്കുക ആണ്. ശ്രുതി ഹാസൻ ആണ് ഈ ചിത്രത്തിലെ നായിക. കന്നഡ നടൻ ദുനിയാ വിജയ് ആണ് ഈ ചിത്രത്തിൽ വില്ലൻ വേഷത്തിൽ എത്തുന്നത്. മലയാളത്തിൽ നിന്ന് ഹണി റോസ്, ലാൽ എന്നിവരും ഈ ചിത്രത്തിന്റെ താരനിരയിലുണ്ട്. വരലക്ഷ്മി ശരത്ത്കുമാർ ആണ് മറ്റൊരു പ്രധാന താരം. ചിത്രം ജനുവരിയിൽ ആണ് റിലീസ് ചെയ്യുക. ചിരഞ്ജീവിയുടെ ‘വാൾട്ടയർ വീരയ്യ’യ്ക്ക് ഒപ്പം ക്ലാഷ് റിലീസ് ആയി ആണ് ചിത്രം തിയേറ്ററുകളിൽ എത്തുക. ജയ് ബാലയ്യ ഗാനം:
