“തെളിവുകൾ ജയിക്കുന്നിടം, അതാണ് കോടതി”; സുരേഷ് ഗോപിയുടെ കിടിലൻ ഡയലോഗുകളുമായി ‘ജെ.എസ്.കെ’ ടീസർ പുറത്ത്

“തെളിവുകൾ ജയിക്കുന്നിടം, അതാണ് കോടതി”; സുരേഷ് ഗോപിയുടെ കിടിലൻ ഡയലോഗുകളുമായി ‘ജെ.എസ്.കെ’ ടീസർ പുറത്ത്

വർഷങ്ങൾക്കു ശേഷം സൂപ്പർതാരം സുരേഷ് ഗോപി വക്കീൽ വേഷത്തിലെത്തുന്ന ‘ജെ.എസ്.കെ’ എന്ന ചിത്രത്തിൻ്റെ ടീസർ പുറത്തിറങ്ങി. ഒരു കോർട്ട് റൂം ഡ്രാമയായി ഒരുങ്ങുന്ന ഈ ചിത്രത്തിൻ്റെ മുഴുവൻ പേര് ‘ജാനകി വേഴ്സസ് സ്റ്റേറ്റ് ഓഫ് കേരള’ എന്നാണ്. ‘ചിന്താമണി കൊലക്കേസി’ന് ശേഷം ആണ് സുരേഷ് ഗോപി വീണ്ടും മറ്റൊരു വക്കീൽ വേഷത്തിൽ എത്തുന്നത്. ടീസറിലെ ശക്തമായ സംഭാഷണങ്ങൾ സിനിമയുടെ സ്വഭാവം വ്യക്തമാക്കുന്നുണ്ട്. ചിത്രം 2025 ജൂൺ 20-ന് തിയേറ്ററുകളിൽ എത്തും.

ടീസറിലെ സുരേഷ് ഗോപിയുടെ സംഭാഷണങ്ങൾ ശ്രദ്ധേയമാണ്. “ഒരു വിഷ്വൽ നമ്മൾ വീണ്ടും വീണ്ടും കാണുകയാണെങ്കിൽ ഏതെങ്കിലും ഒരു മോമെൻ്റിൽ അത് നമ്മളോട് പുതിയൊരു കാര്യം പറയും” എന്ന വാക്കുകളോടെയാണ് ടീസർ ആരംഭിക്കുന്നത്. “I’m against a criminal. An inhuman.” എന്ന പ്രസ്താവനയും “അവർക്ക് അറിയുന്ന പണി അവർ എടുക്കട്ടെ. നമുക്ക് നമ്മുടെ പണി കൊടുക്കാം” എന്ന വെല്ലുവിളിയും ടീസറിന് തീവ്രത നൽകുന്നു. “അപ്പൊ സത്യം ജയിക്കുന്ന സ്ഥലമൊന്നും അല്ലേ സാറെ ഈ കോടതി?” എന്ന് മറ്റൊരു കഥാപാത്രം ചോദിക്കുമ്പോൾ, “തെളിവുകൾ ജയിക്കുന്നിടം, അതാണ് കോടതി” എന്ന് സുരേഷ് ഗോപി നൽകുന്ന മറുപടി പ്രേക്ഷകരെ ചിന്തിപ്പിക്കാൻ പോന്നതാണ്. “ഒരു വക്കീലിനോട് സംസാരിക്കാം, പക്ഷേ ഒരു താൻതോന്നിയോട്…” എന്ന ഡയലോഗും ആകാംഷ വർദ്ധിപ്പിക്കുന്നു. ടീസർ:

പ്രവീൺ നാരായണൻ സംവിധാനം ചെയ്യുന്ന ഈ ചിത്രത്തിൽ അനുപമ പരമേശ്വരൻ, ശ്രുതി രാമചന്ദ്രൻ, ദിവ്യ പിള്ള എന്നിവരാണ് പ്രധാന സ്ത്രീ കഥാപാത്രങ്ങളെ അവതരിപ്പിക്കുന്നത്. അസ്‌കർ അലി, മാധവ് സുരേഷ് ഗോപി, ബൈജു സന്തോഷ്, ജയൻ ചേർത്തല, ജോയ് മാത്യു, അഭിലാഷ് രവീന്ദ്രൻ, രജിത് മേനോൻ, നിസ്താർ സേട്ട്, വൈഷ്ണവി രാജ്, മേധ പല്ലവി, കോട്ടയം രമേശ്, ദിലീപ്, ബാലാജി ശർമ്മ എന്നിവരുൾപ്പെടെ ഒരു വലിയ താരനിരയും ചിത്രത്തിലുണ്ട്.

കാർത്തിക് ക്രിയേഷൻസുമായി സഹകരിച്ച് കോസ്മോസ് എൻ്റർടെയിൻമെൻ്റ്സ് ആണ് ‘ജെ.എസ്.കെ’ നിർമ്മിക്കുന്നത്. ജെ. ഫണീന്ദ്ര കുമാർ നിർമ്മാണവും, സേതുരാമൻ നായർ കങ്കോൽ സഹനിർമ്മാണവും നിർവ്വഹിക്കുന്നു. സജിത്ത് കൃഷ്ണ, കിരൺ രാജ്, ഹുമയൂൺ അലി അഹമ്മദ് എന്നിവരാണ് എക്സിക്യൂട്ടീവ് പ്രൊഡ്യൂസേഴ്സ്.

ഛായാഗ്രഹണം: രണദിവ, എഡിറ്റിംഗ്: സംജിത്ത് മുഹമ്മദ്, പശ്ചാത്തല സംഗീതം: ജിബ്രാൻ, സംഗീതം: ഗിരീഷ് നാരായണൻ, പ്രൊഡക്ഷൻ കൺട്രോളർ: അമൃത മോഹനൻ, കലാസംവിധാനം: ജയൻ ക്രയോൺ, മേക്കപ്പ്: പ്രദീപ് രംഗൻ, മിക്സ്: അജിത് എ ജോർജ്ജ്, ഗാനരചന: സന്തോഷ് വർമ്മ, ജ്യോതിഷ് കാശി, ഹരിത ഹരിബാബു, കോസ്റ്റ്യൂം: അരുൺ മനോഹർ, സൗണ്ട് ഡിസൈൻ: സിങ്ക് സിനിമ, സംഘട്ടനം: മാഫിയ ശശി, ഫീനിക്സ് പ്രഭു, രാജശേഖർ, കോറിയോഗ്രഫി: സജിന മാസ്റ്റർ, സ്റ്റിൽസ്: ജെഫിൻ ബിജോയ്, മീഡിയ ഡിസൈൻ: ഐഡന്‍റ് ലാബ്സ്, മാർക്കറ്റിംഗ് ആൻഡ് ഡിസ്ട്രിബ്യൂഷൻ: ഡ്രീം ബിഗ് ഫിലിംസ്, ഓൺലൈൻ പ്രൊമോഷൻ: അനന്ദു സുരേഷ്, ജയകൃഷ്ണൻ ആർ.കെ, പിആർഒ: വൈശാഖ് സി വടക്കെവീട്, ജിനു അനിൽകുമാർ, വിഷ്വൽ പ്രൊമോഷൻസ്: സ്നേക്ക്പ്ലാന്‍റ് എൽഎൽപി.