തമിഴ് സൂപ്പർതാരങ്ങളുടെ വമ്പൻ ചിത്രങ്ങൾ ശ്രീ ഗോകുലം മൂവീസ് കേരളത്തിലെത്തിക്കും; തങ്കലാനും കങ്കുവയും വരുന്നു…
പ്രേക്ഷകർ കാത്തിരിക്കുന്ന രണ്ട് വമ്പൻ തമിഴ് ചിത്രങ്ങൾ കേരളത്തിൽ പ്രദർശനത്തിനെത്തിക്കുകയാണ് ശ്രീ ഗോകുലം മൂവീസിനു വേണ്ടി ഗോകുലം ഗോപാലൻ. സ്റ്റുഡിയോ ഗ്രീനിന്റെ ബാനറിൽ കെ ഇ ജ്ഞാനവേൽ രാജ നിർമിക്കുന്ന വിക്രം – പാ രഞ്ജിത് ചിത്രമായ തങ്കലാന്റെയും സൂര്യ – ശിവ ചിത്രമായ കങ്കുവയുടെയും കേരളത്തിലെ വിതരണാവകാശം ശ്രീ ഗോകുലം മൂവീസ് സ്വന്തമാക്കി.
കഴിഞ്ഞ ദിവസം ഗോകുലം ഗോപാലന്റെ ജന്മദിനാഘോഷ വേളയിലാണ് ഈ ചിത്രങ്ങൾ കേരളത്തിൽ ശ്രീ ഗോകുലം മൂവീസ് വിതരണം ചെയ്യും എന്ന പ്രഖ്യാപനം ഉണ്ടായത്. പൊന്നിയിൻ സെൽവൻ 1 & 2ന് ശേഷം വിക്രമിനൊപ്പം തങ്കലാനിലൂടെ വീണ്ടും പ്രവർത്തിക്കാൻ സാധിച്ചതിലും സൂര്യക്കൊപ്പം ആദ്യമായി കങ്കുവയിലൂടെ ഒന്നിക്കാൻ സാധിച്ചതിലുമുള്ള സന്തോഷം ശ്രീ ഗോകുലം മൂവീസിന്റെ എക്സിക്യൂട്ടീവ് പ്രൊഡ്യുസർ കൃഷ്ണമൂർത്തി ഈ അവസരത്തിൽ പങ്ക് വെച്ചു. കഴിഞ്ഞ ദിവസം താങ്കലാൻ, കങ്കുവ എന്നിവയുടെ നിർമ്മാതാക്കളായ സ്റ്റുഡിയോ ഗ്രീൻ ഗോകുലം ഗോപാലന് പിറന്നാൾ ആശംസകൾ നേർന്നിരുന്നു.
വിക്രം വ്യത്യസ്ത വേഷത്തിലെത്തുന്ന തങ്കലാനിൽ പാർവതി തിരുവോത്ത് ആണ് നായിയാകുന്നത്. മാളവിക മോഹൻ, പശുപതി എന്നിവരാണ് ഈ ചിത്രത്തിലെ മറ്റ് താരങ്ങൾ. ഓഗസ്റ്റ് 15ന് ആണ് ഈ ചിത്രത്തിലെ റിലീസ്. തമിഴിലെ ഹിറ്റ് മേക്കറും ദേശീയ അവാർഡ് ജേതാവുമായ ജി വി പ്രകാശ്കുമാർ ഈ ആണ് സംഗീത സംവിധാനം. കിഷോർ കുമാർ ഛായാഗ്രഹണവും സെൽവ ആർ കെ ചിത്രസംയോജനവും നിർവഹിച്ച ഈ ചിത്രത്തിന്റെ കലാസംവിധായകൻ എസ് എസ് മൂർത്തിയും സംഘട്ടന സംവിധായകൻ സ്റ്റന്നർ സാമുമാണ്.
സൂര്യ- ശിവ ടീമിന്റെ ‘കങ്കുവ’ പിരീഡ് ആക്ഷന്‍ ഡ്രാമ വിഭാഗത്തിൽ ഒരുങ്ങുന്ന ചിത്രമാണ്. 350 കോടി ബജറ്റിൽ നിർമ്മിച്ചിരിക്കുന്ന ഈ ചിത്രം ഒക്ടോബർ 10ന് ആഗോളവ്യാപകമായി 38 ഭാഷകളിലാവും തീയേറ്ററുകളിലെത്തുക. ഈ ബ്രഹ്മാണ്ഡ ചിത്രം ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ കേരളത്തിലെ തീയേറ്ററുകളിലെത്തിക്കുമ്പോൾ വൻ പ്രതീക്ഷ ആണ് മലയാള സിനിമാ പ്രേക്ഷകർക്കും ഉള്ളത്. സമീപ കാലത്ത് വമ്പൻ ഹിറ്റുകളായ തമിഴ് ചിത്രങ്ങൾ മിക്കവയും കേരളത്തിൽ ശ്രീ ഗോകുലം മൂവീസ് ആണ് പ്രദർശനത്തിനെത്തിച്ചത് എന്നതും പ്രേക്ഷകരിൽ പ്രതീക്ഷ നിറയ്ക്കുന്ന ഘടകമാണ്.
പൊന്നിയിൻ സെൽവൻ, ജയിലർ, ജവാൻ, ലിയോ തുടങ്ങിയ അന്യഭാഷ ചിത്രങ്ങൾ കേരളത്തിൽ വിതരണത്തിനെത്തിച്ചത് ശ്രീ ഗോകുലം മൂവീസായിരുന്നു. ശ്രീ ഗോകുലം മൂവീസ് പ്രദർശനത്തിനെത്തിച്ച മലയാള ചിത്രമായ ‘മഞ്ഞുമ്മൽ ബോയ്സ്’ വമ്പൻ ഹിറ്റായി മാറുകയും ചെയ്തിരുന്നു. തമിഴ് നാട്ടിൽ നിന്നു മാത്രം 50 കോടിക്കു മുകളിൽ നേടി ചരിത്രം സൃഷ്ടിക്കാനും ചിത്രത്തിന് സാധിച്ചു. ജയസൂര്യയും അനുഷ്‌ക ഷെട്ടിയും പ്രധാന വേഷങ്ങളിലെത്തുന്ന ‘കത്തനാർ’ എന്ന ചിത്രവും ദിലീപ് ചിത്രമായ ‘ഭ ഭ ബ’യും നിർമ്മിക്കുന്നതും ഗോകുലം മൂവീസാണ്. വമ്പൻ ക്യാൻവാസിൽ ഒരുങ്ങുന്ന ഈ ചിത്രങ്ങൾ മലയാള സിനിമ ഇൻഡസ്ട്രിയിൽ തന്നെ പ്രേക്ഷകർ ഉറ്റുനോക്കുന്ന ചിത്രങ്ങളാണ്. ഡ്രീം ബിഗ് ഫിലിംസാണ് ഡിസ്ട്രിബ്യുഷൻ പാർട്ണർ. പി ആർ ഒ – ശബരി.
