സാബുമോൻ സംവിധായകനാകുന്നു; ഒരുങ്ങുന്നത് കോർട്ട് റൂം ഡ്രാമ, നായികയായി പ്രയാഗ മാർട്ടിൻ
സിനിമ താരമായും മിനി സ്ക്രീൻ താരമായും ബിഗ് ബോസ് മലയാളം വിജയിയായും ഒക്കെ മലയാളി പ്രേക്ഷകർക്ക് സുപരിചിതനായ സാബുമോൻ സംവിധായകനാകുന്നു. സ്പൈർ പ്രൊഡക്ഷൻസിന്റെ ബാനറിൽ സഞ്ജു ഉണ്ണിത്താൻ ആണ് ചിത്രം നിർമ്മിക്കുന്നത്. സ്പൈർ പ്രൊഡക്ഷൻസ് നിർമ്മിക്കുന്ന ആറാമത്തെ ചിത്രമാണിത്.
കോർട്ട് റൂം ഡ്രാമ ജോണറിൽ ഒരുങ്ങുന്ന ഈ ചിത്രത്തിൽ പ്രയാഗ മാർട്ടിൻ ആണ് പ്രധാന വേഷത്തിൽ എത്തുന്നത്. യഥാർത്ഥ ജീവിതത്തിൽ വക്കീലും കൂടിയായ താൻ ആദ്യ സിനിമ സംവിധാനം ചെയ്യുന്നതും കോടതി മുറിയിൽ ഉള്ളിലാണെന്ന് നാളുകൾക്ക് മുൻപേ അറിഞ്ഞിരുന്ന കാര്യമാണെന്ന് സാബുമോൻ പ്രതികരിച്ചു. ചിത്രത്തെക്കുറിച്ചുള്ള കൂടുതൽ വിവരങ്ങൾ നിലവിൽ പുറത്തുപറയാൻ കഴിയില്ലെന്നും വരും ദിവസങ്ങളിൽ അപ്ഡേറ്റുകൾ പുറത്തുവിടുമെന്നും സാബുമോൻ കൂട്ടിച്ചേർത്തു.
കഴിഞ്ഞ ആഴ്ചയിൽ റിലീസായ രജനികാന്ത് ചിത്രമായ വേട്ടയ്യൻ ആണ് സാബുമോന്റെ ഏറ്റവും പുതിയ ചിത്രം. ടി. ജെ. ജ്ഞാനവേൽ സംവിധാനം ചെയ്ത് ഈ ചിത്രത്തിൽ ‘കുമരേശൻ’ എന്ന വില്ലൻ കഥാപാത്രത്തെ ആണ് താരം അവതരിപ്പിച്ചത്. മികച്ച പ്രേക്ഷക പ്രതികരണം നേടി തീയേറ്ററിൽ കയ്യടികൾ നിറഞ്ഞ് നിൽക്കുന്ന വേളയിലാണ് സാബുമോന്റെ സംവിധാന പ്രഖ്യാപനം.
