മാസ്സ് ലുക്കിൽ അയ്യപ്പ ഭക്തനായി രവി തേജ; ശ്രദ്ധേയമായി ‘ഇരുമുടി’യുടെ ഫസ്റ്റ് ലുക്ക് പോസ്റ്റർ
തെലുങ്ക് സൂപ്പർ താരം രവി തേജയെ നായകനാക്കി ശിവ നിർവാണ സംവിധാനം ചെയ്യുന്ന ബിഗ് ബജറ്റ് ചിത്രത്തിന്റെ ടൈറ്റിലും ഫസ്റ്റ് ലുക്കും പുറത്തുവിട്ടു. താരത്തിന്റെ ജന്മദിനത്തോടനുബന്ധിച്ചാണ് ‘ഇരുമുടി’ എന്ന പേരും ചിത്രത്തിന്റെ പോസ്റ്ററും അണിയറപ്രവർത്തകർ പുറത്തുവിട്ടത്. മൈത്രി മൂവി മേക്കേഴ്സ് നിർമ്മിക്കുന്ന ഈ ചിത്രം രവി തേജയുടെ കരിയറിലെ 77-ാമത് സിനിമയാണ്.
അയ്യപ്പ സ്വാമിയോടുള്ള ഭക്തിയെയും വിശുദ്ധമായ സമർപ്പണത്തെയും സൂചിപ്പിക്കുന്നതാണ് ‘ഇരുമുടി’ എന്ന പേര്. ഫസ്റ്റ് ലുക്ക് പോസ്റ്ററിലും ഈ ആത്മീയ പശ്ചാത്തലം വ്യക്തമാണ്. അയ്യപ്പ ഭക്തന്മാരുടെ പരമ്പരാഗത വസ്ത്രം ധരിച്ച്, തലയിൽ ഇരുമുടിക്കെട്ടുമായി അത്യന്തം ആവേശഭരിതനായാണ് രവി തേജയെ ഫസ്റ്റ് ലുക്കിൽ കാണാൻ സാധിക്കുന്നത്. ഭക്തർക്കിടയിൽ നിന്ന് പുഞ്ചിരിയോടെ മകളെ കൈകളിൽ ഏന്തിനിൽക്കുന്ന താരത്തിന്റെ ഭാവം ചിത്രത്തിലെ വൈകാരികമായ അച്ഛൻ-മകൾ ബന്ധത്തെയാണ് എടുത്തു കാട്ടുന്നത്.
മുൻപ് കണ്ടിട്ടുള്ള വേഷങ്ങളിൽ നിന്നും തികച്ചും വ്യത്യസ്തമായ ഒരു കഥാപാത്രത്തെയാണ് ശിവ നിർവാണ ഈ ചിത്രത്തിൽ രവി തേജയ്ക്കായി ഒരുക്കിയിരിക്കുന്നത്. ഭക്തിയും ആക്ഷനും വൈകാരിക മുഹൂർത്തങ്ങളും ഒരുപോലെ ചേരുന്നതാണ് ചിത്രത്തിന്റെ തിരക്കഥ. “ചില കഥകൾ ജീവിതത്തിലെ ശരിയായ നിമിഷത്തിൽ നമ്മളെ തേടിയെത്തും, അത്തരമൊരു പ്രോജക്റ്റിന്റെ ഭാഗമാകാൻ കഴിഞ്ഞതിൽ ഭാഗ്യവാനാണ്” എന്ന് സോഷ്യൽ മീഡിയയിൽ കുറിച്ചുകൊണ്ട് താരം പുതിയ ചിത്രത്തെക്കുറിച്ചുള്ള ആവേശം പങ്കുവെച്ചു.
പ്രിയ ഭവാനി ശങ്കർ നായികയാകുന്ന ചിത്രത്തിൽ രവി തേജയുടെ മകളായി വേഷമിടുന്നത് ബേബി നക്ഷത്രയാണ്. സായ് കുമാർ, അജയ് ഘോഷ്, രമേഷ് ഇന്ദിര, സ്വാസിക, മീസാല ലക്ഷ്മൺ തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്. വിശ്വാസവും സ്നേഹവും പ്രമേയമാക്കി ഒരുങ്ങുന്ന ഈ ചിത്രം രവി തേജ എന്ന നടന്റെ കരിയറിലെ തന്നെ വലിയൊരു മാറ്റമായിരിക്കും എന്ന് പ്രതീക്ഷിക്കപ്പെടുന്നു.
കഥ, തിരക്കഥ, സംഭാഷണം, സംവിധാനം – ശിവ നിർവാണ, നിർമ്മാതാക്കൾ – നവീൻ യെർനേനി, വൈ രവിശങ്കർ, ബാനർ – മൈത്രി മൂവി മേക്കേഴ്സ്, സംഗീതം – ജി വി പ്രകാശ് കുമാർ, ഛായാഗ്രഹണം – വിഷ്ണു ശർമ്മ, പ്രൊഡക്ഷൻ ഡിസൈനർ – സാഹി സുരേഷ്, എഡിറ്റിംഗ് – പ്രവീൺ പുഡി, സ്ക്രിപ്റ്റ് കോ-ഓർഡിനേറ്റർ – നരേഷ് ബാബു പി, കോ-ഡയറക്ടർ – സുരേഷ്, മേക്കപ്പ് – ശ്രീനിവാസ് രാജു, വസ്ത്രാലങ്കാരം – രാജേഷ്, പോസ്റ്റർ ഡിസൈനർ – യെല്ലോ ടൂത്ത്സ്, മാർക്കറ്റിംഗ് – ഫസ്റ്റ് ഷോ, പിആർഒ- ശബരി
