ഹിറ്റ് ആവർത്തിക്കാൻ ‘പ്രേമലു’ ടീം, പുതിയ ചിത്രം ‘ഐ ആം കാതലൻ’ ഓഗസ്റ്റിൽ എത്തും…
മലയാള സിനിമയുടെ ഈ വർഷത്തെ ഏറ്റവും വലിയ ഹിറ്റുകളിൽ ഒന്നായ ‘പ്രേമലു’ സമ്മാനിച്ച ഗിരീഷ് എ ഡി- നസ്‌ലെൻ ടീം വീണ്ടും ഒന്നിക്കുന്ന ‘ഐ ആം കാതലൻ’ എന്ന ചിത്രം ഓഗസ്റ്റിൽ റിലീസ് ചെയ്യും. ഏറെ കൗതുകമുണർത്തുന്ന ഒരു സെക്കന്റ് ലുക്ക് പോസ്റ്ററും അണിയറ പ്രവർത്തകർ ഇന്ന് പുറത്ത് വിട്ടിട്ടുണ്ട്. ഒരു സെക്യൂരിറ്റി ക്യാമറയിലേക്ക് നസ്‌ലെൻ നോക്കുന്ന രീതിയിലുള്ള ഒരു പോസ്റ്റർ ആണ് റിലീസ് ആയിട്ടുള്ളത്.
പ്രേമലു എന്ന ബ്ലോക്ക് ബസ്റ്റർ ചിത്രം കൂടാതെ തണ്ണീർ മത്തൻ ദിനങ്ങൾ, സൂപ്പർ ശരണ്യ എന്നീ ഹിറ്റ് ചിത്രങ്ങളും ഗിരീഷ് എ ഡി- നസ്‌ലെൻ ടീം ഒന്നിച്ചപ്പോൾ മലയാളത്തിന് ലഭിച്ചിരുന്നു. അതുകൊണ്ട് തന്നെ പ്രേക്ഷകർ കാത്തിരിക്കുന്ന ചിത്രം കൂടിയാണ് ‘ഐ ആം കാതലൻ’. പൂമരം, എല്ലാം ശരിയാകും, ഓ മേരി ലൈല എന്നീ ചിത്രങ്ങൾക്ക് ശേഷം ഡോ. പോൾസ് എന്റർടെയിന്മെന്റസിന്റെ ബാനറിൽ ഡോ. പോൾ വർഗീസ്, കൃഷ്ണമൂർത്തി എന്നിവർ ചേർന്ന് നിർമ്മിക്കുന്ന ഐ ആം കാതലന്റെ സഹനിർമ്മാതാവ് ടിനു തോമസാണ്.
അനിഷ്‌മ നായികാ വേഷം ചെയ്യുന്ന ഈ ചിത്രത്തിൽ ദിലീഷ് പോത്തൻ, ലിജോമോൾ, ടി ജി രവി, സജിൻ, വിനീത് വാസുദേവൻ, വിനീത് വിശ്വം എന്നിവരും നിർണ്ണായക കഥാപാത്രങ്ങളെ അവതരിപ്പിച്ചിരിക്കുന്നു. പ്രശസ്ത നടനായ സജിൻ ചെറുകയിൽ തിരക്കഥ രചിച്ച ഈ ചിത്രത്തിന് കാമറ ചലിപ്പിച്ചത് ശരൺ വേലായുധൻ, എഡിറ്റിംഗ് നിർവഹിച്ചത് ആകാശ് ജോസഫ് വർഗീസ്, സംഗീതമൊരുക്കിയത് സിദ്ധാർത്ഥ പ്രദീപ് എന്നിവരാണ്. മാർക്കറ്റിങ്ങ് & ഡിസ്ട്രിബ്യുഷൻ ഡ്രീം ബിഗ് ഫിലിംസ്.
കലാസംവിധാനം – വിവേക് കളത്തിൽ, വസ്ത്രാലങ്കാരം – ധന്യ ബാലകൃഷ്ണൻ , മേക്കപ്പ് – സിനൂപ് രാജ്, വരികൾ- സുഹൈൽ കോയ, പ്രൊഡക്ഷൻ കൺട്രോളർ – മനോജ് പൂങ്കുന്നം, ഫിനാൻസ് കൺട്രോളർ – അനിൽ ആമ്പല്ലൂർ, പി ആർ ഒ – ശബരി. ആഗസ്റ്റ് മാസത്തിൽ ഡ്രീം ബിഗ് ഫിലിംസ് ചിത്രം തീയേറ്ററുകളിൽ എത്തിക്കും.
