ഫ്രൈഡേ ഫിലിം ഹൗസിന്റെ ‘പടക്കളം’ ആരംഭിക്കുന്നു, ഒപ്പം കെആർജി സ്റ്റുഡിയോസും; പ്രധാന വേഷങ്ങളിൽ ഷറഫുദീനും സുരാജ് വെഞ്ഞാറമൂടും സന്ദീപ് പ്രദീപും…
മലയാള സിനിമയിലെ മുൻനിര പ്രൊഡക്ഷൻ ഹൗസുകളിൽ ഒന്നായ ഫ്രൈഡേ ഫിലിം ഹൗസ് കന്നഡ സിനിമാ ലോകത്ത് ഏറെ ശ്രദ്ധേയമായ സംഭാവനകൾ നൽകിയ കെആർജി സ്റ്റുഡിയോസുമായി കൈ കോർത്തൊരുക്കുന്ന ആദ്യ ചിത്രമാണ് ‘പടക്കളം’. നവാഗതനായ മനു സ്വരാജ് സംവിധാനം ചെയ്യുന്ന ഈ ചിത്രത്തിൽ ഷറഫുദീൻ, സുരാജ് വെഞ്ഞാറമൂട്, സന്ദീപ് പ്രദീപ്, നിരഞ്ജന അനൂപ് എന്നിവരാണ് പ്രധാന വേഷങ്ങളിൽ എത്തുന്നത്. ചിത്രത്തിന്റെ പൂജയും സ്വിച്ച് ഓണും വെള്ളിയാഴ്ച (ജൂലൈ 12) രാവിലെ പത്തു മണിക്ക് എറണാകുളം ചോറ്റാനിക്കര ക്ഷേത്രത്തിൽ വച്ചു നടന്നു.
ബെംഗളൂരു കേന്ദ്രമാക്കി നിരവധി ഷോർട്ട് ഫിലിമുകൾ ഒരുക്കിയ മനു സ്വരാജ് കഴിഞ്ഞ എട്ടുവർഷമായി സഹസംവിധായകനായി പ്രവർത്തിച്ചു വരികയാണ്. ജസ്റ്റിൻ മാത്യു, ബേസിൽ ബോസഫ് എന്നിവർക്കൊപ്പം മനു പ്രവർത്തിച്ചിട്ടുണ്ട്. പൂർണമായും എന്റെർറ്റൈനർ സിനിമയായ പടക്കളത്തിന്റെ മറ്റു വിവരങ്ങൾ വൈകാതെ പുറത്തുവരും.
ഇന്നുവരെ കർണാടകയിൽ 100–ലധികം ചിത്രങ്ങൾ വിതരണം ചെയ്യുകയും ഹിറ്റ് ചിത്രങ്ങൾ നിർമ്മിക്കുകയും ചെയ്ത ബാനറാണ് കെആർജി സ്റ്റുഡിയോസ്. മലയാളത്തിൽ തുടർന്നും ചിത്രങ്ങൾ ഒരുമിച്ചു നിർമ്മിക്കാൻ കെആർജി സ്റ്റുഡിയോസും ഫ്രൈഡേ ഫിലിം ഹൗസും തമ്മിൽ ധാരണയായിട്ടുണ്ട്. വിജയ് ബാബു, കാർത്തിക്, യോഗി ബി രാജ്, വിജയ് സുബ്രമണ്യം എന്നിവർ ചേർന്നാണ് ‘പടക്കളം ‘ നിർമ്മിക്കുന്നത്. മലയാള സിനിമയിൽ ഇരുപത്തിലധികം സിനിമകൾ അവതരിപ്പിച്ച ഫ്രൈഡേ ഫിലിം ഹൗസ് നിരവധി വമ്പൻ ഹിറ്റ് ചിത്രങ്ങളുടെ ഭാഗമായിട്ടുണ്ട്.
ചിത്രത്തിൻ്റെ അണിയറ പ്രവർത്തകർ: രചന -നിതിൻ സി ബാബു, മനു സ്വരാജ്, എക്സിക്യൂട്ടീവ് പ്രൊഡ്യൂസേഴ്സ് – വിനയ് ബാബു, നവീൻ മാറോൾ; ഡി ഒ പി – അനു മൂത്തേടത്ത്, എഡിറ്റർ – നിതിൻ രാജ് ആരോൾ, രാജേഷ് മുരുഗേശൻ, മേക്കപ്പ് – റോണക്സ് സേവ്യർ, കോസ്റ്റും – സമീറ സനീഷ്, പ്രൊഡക്ഷൻ ഡിസൈൻ – സുനിൽ കെ ജോർജ്, പ്രൊഡക്ഷൻ കൺട്രോളർ – ഷിബു ജി സുശീലൻ, വാർത്താ പ്രചരണം – വൈശാഖ് വടക്കേവീട്, ജിനു അനിൽകുമാർ
