നാനിയുടെ കരിയറിലെ ഏറ്റവും ചിലവേറിയ ചിത്രവുമായി ദസറ ടീം; ‘നാനിഒഡേല 2’ ലോഞ്ച് ചെയ്തു
ദസറ എന്ന ബ്ലോക്ക്ബസ്റ്റർ ചിത്രത്തിന് ശേഷം നായകൻ നാനിയും സംവിധായകൻ ശ്രീകാന്ത് ഒഡേലയും ഒന്നിക്കുന്ന പുതിയ ചിത്രത്തിന്റെ ലോഞ്ച് നടന്നു. ശ്രീലക്ഷ്മി വെങ്കടേശ്വര സിനിമാസിന്റെ ബാനറിൽ ദസറയുടെ നിർമ്മാതാവായ സുധാകർ ചെറുകുറി തന്നെ നിർമ്മിക്കുന്ന ഈ ചിത്രത്തിന് ‘നാനിഒഡേല 2’ എന്നാണ് താൽകാലികമായി പേര് നല്കിയിരിക്കുന്നത്. ദസറ ആഘോഷവേളയിൽ ആണ് ചിത്രം ലോഞ്ച് ചെയ്തത്.
നിരവധി അവാർഡുകൾ ലഭിക്കുകയും വളരെയധികം ജനപ്രീതി നേടുകയും ചെയ്ത ദസറ ഒരുക്കിയ ടീം പുതിയ പാൻ ഇന്ത്യൻ ചിത്രവുമായി എത്തുമ്പോൾ വലിയ പ്രതീക്ഷ പ്രേക്ഷകരിൽ നിറയും എന്നത് തീർച്ച. മുൻപൊരിക്കലും കണ്ടിട്ടില്ലാത്ത ഒരു മാസ് കഥാപാത്രമായാണ് നാനിയെ ഈ ചിത്രത്തിൽ ശ്രീകാന്ത് ഒഡേല അവതരിപ്പിക്കാൻ പോകുന്നത്. ഇതിനായി ആകർഷകമായ തിരക്കഥയോടുകൂടിയ വലിയ കാൻവാസിലുള്ള ചിത്രമായാണ് ‘നാനിഒഡേല 2’വിനെ അദ്ദേഹമൊരുക്കുക.
നാനിയുടെ കരിയറിലെ ഏറ്റവും ചിലവേറിയ ചിത്രങ്ങളിലൊന്നായാണ് ‘നാനിഒഡേല 2’ ഒരുങ്ങുന്നത്. മാത്രവുമല്ല, നായക കഥാപാത്രത്തിനായി ശാരീരികമായി വലിയൊരു പരിവർത്തനം വരുത്താനുള്ള ഒരുക്കത്തിലാണ് താരമിപ്പോൾ. ദസറയുടെ 100 മടങ്ങ് സ്വാധീനം സൃഷ്ടിക്കാൻ ഈ പ്രോജക്റ്റ് ലക്ഷ്യമിടുന്നുവെന്ന് നാനി അടുത്തിടെ പ്രസ്താവിച്ചിരുന്നു.
കഥപറച്ചിൽ, നിർമ്മാണ നിലവാരം, സാങ്കേതിക വൈദഗ്ദ്ധ്യം എന്നിവയുടെ കാര്യത്തിൽ ഏറ്റവും ഉയർന്ന തലത്തിൽ ചിത്രമെത്തിക്കാനുള്ള ഒരുക്കത്തിലാണ് അണിയറ പ്രവർത്തകർ. ചിത്രത്തെ കുറിച്ചുള്ള കൂടുതൽ വിവരങ്ങൾ വൈകാതെ പുറത്തു വിടും. രചന, സംവിധാനം- ശ്രീകാന്ത് ഒഡേല, നിർമ്മാതാവ്- സുധാകർ ചെറുകുറി, ബാനർ- എസ്എൽവി സിനിമാസ്, മാർക്കറ്റിംഗ്- ഫസ്റ്റ് ഷോ, പിആർഒ- ശബരി.
