ദൃശ്യ വിസ്മയമാകാൻ ‘കൽക്കി 2898 എഡി’; കേരളത്തിൽ നാളെ 280 തിയേറ്ററുകളിൽ റിലീസ്…
പ്രഭാസ് നായകനാകുന്ന ബ്രഹ്മാണ്ഡ ചിത്രം ‘കൽക്കി 2898 എഡി’ നാളെ (27 ജൂൺ 2024) തിയേറ്ററുകളിൽ എത്തുകയാണ്. നാഗ് അശ്വിന്റെ സംവിധാനത്തിൽ ഒരുക്കിയ ഈ ചിത്രം കേരളത്തിൽ വിതരണത്തിനെത്തിക്കുന്നത് ദുൽഖർ സൽമാന്റെ വേഫറർ ഫിലിംസാണ്. കേരളത്തിൽ 280 തിയറ്ററുകളിലായാണ് ചിത്രം പ്രദർശനത്തിനെത്തുന്നത്.
ഇന്ത്യൻ മിത്തോളജിയിൽ വേരൂന്നി പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന ഒരു സയൻസ് ഫിക്ഷനായാണ് ‘കൽക്കി 2898 എഡി’യെ ഒരുക്കിയിരിക്കുന്നത്. ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളുടെ കഥയാണ് ചിത്രം പറയുന്നത്. ബിസി 3101-ലെ മഹാഭാരതത്തിൻ്റെ ഇതിഹാസ സംഭവങ്ങൾ മുതൽ എഡി 2898 സഹസ്രാബ്ദങ്ങൾ വരെ നീണ്ടുനിൽക്കുന്ന യാത്രയാണ് ‘കൽക്കി 2898 എഡി’യിൽ ദൃശ്യാവിഷ്കരിക്കുന്നത്.
തെലുങ്ക്, ഹിന്ദി, തമിഴ്, മലയാളം, കന്നഡ, ഇംഗ്ലീഷ് തുടങ്ങി ഒന്നിലധികം ഭാഷകളിൽ റിലീസിന് തയ്യാറാകുന്ന ഈ പാൻ ഇന്ത്യൻ ചിത്രത്തിൽ പ്രഭാസിന് ഒപ്പം അണിനിരക്കുന്നത് വമ്പൻ താരനിരയാണ്. ‘ഭൈരവ’യായി പ്രഭാസ് അഭിനയിക്കുന്ന ചിത്രത്തിൽ ഇന്ത്യൻ സിനിമയുടെ ഇതിഹാസ താരങ്ങളായ അമിതാഭ് ബച്ചനും കമൽഹാസനും യഥാക്രമം ‘അശ്വത്ഥാമാവാ’യും ‘യാസ്കിനാ’യും എത്തുന്നു. ‘സുമതി’ എന്ന കഥാപാത്രത്തെ ദീപിക പദുക്കോൺ അവതരിപ്പിക്കുന്ന ചിത്രത്തിൽ ‘റോക്സി’യായി ദിഷാ പടാനിയും വേഷമിടുന്നു.
