“ഇത്തവണ വരുന്നത് ബ്രഹ്മാണ്ഡ തയ്യാറെടുപ്പോടെ”; ‘കൽക്കി 2898 എഡി’ റിലീസ് ട്രെയിലർ വിസ്മയിപ്പിക്കും…
ജൂൺ 27ന് തിയേറ്റർ റിലീസിന് തയ്യാറാകുന്ന പ്രഭാസ് ചിത്രമായ ‘കൽക്കി 2898 എഡി’യുടെ റിലീസ് ട്രെയിലർ പുറത്തിറങ്ങി. വൈജയന്തി മൂവീസിന്റെ ബാനറിൽ സി അശ്വിനി ദത്ത് നിർമ്മിക്കുന്ന ഈ ചിത്രം നാഗ് അശ്വിൻ ആണ് സംവിധാനം ചെയ്യുന്നത്. ദുൽഖർ സൽമാന്റെ വേഫറർ ഫിലിംസാണ് ഈ ചിത്രം കേരളത്തിൽ വിതരണത്തിനെത്തിക്കുന്നത്. മികച്ച സ്വീകാര്യത ലഭിച്ച ടീസറിനും ട്രെയിലറിനും പിന്നാലെ എത്തിയ പുതിയ റിലീസ് ട്രെയിലർ പ്രേക്ഷക പ്രതീക്ഷ വീണ്ടും ഉയർ ത്തും എന്നത് ദൃശ്യങ്ങളിൽ നിന്ന് വ്യക്തമാണ്.
ഇന്ത്യൻ മിത്തോളജിയിൽ വേരൂന്നി പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന ഒരു സയൻസ് ഫിക്ഷനാണിത്. ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളുടെ കഥയാണ് ‘കൽക്കി 2898 എഡി’ പറയുന്നത് എന്ന സൂചനയാണ് ട്രെയിലർ നൽകുന്നത്. അതിജീവനത്തിനായ് പോരാടുന്നവരുടെ അവസാനത്തെ നഗരമായിട്ടാണ് കാശിയെ ചിത്രീകരിച്ചിരിക്കുന്നത്. വരേണ്യവർഗം നിയന്ത്രിക്കുന്നവർ വസിക്കുന്ന ഇടമായ് ‘കോംപ്ലക്സ്’ അഥവാ പറുദീസയെയും ഈ പറുദീസയിലെ മനുഷ്യരാൽ പീഡിപ്പിക്കപ്പെടുന്നവരുടെ അഭയകേന്ദ്രമായ് പ്രവർത്തിക്കുന്ന ഇടമായ് ശംഭാളയെയും ചിത്രീകരിച്ചിരിക്കുന്നു.
തെലുങ്ക്, ഹിന്ദി, തമിഴ്, മലയാളം, കന്നഡ, ഇംഗ്ലീഷ് തുടങ്ങി ഒന്നിലധികം ഭാഷകളിൽ ട്രെയിലർ ലഭ്യമാക്കിയിട്ടുണ്ട്. പ്രഭാസിനൊപ്പം മെഗാസ്റ്റാർ അമിതാഭ് ബച്ചൻ, ഉലഗനായകൻ കമൽഹാസൻ, ദിഷാ പടാനി തുടങ്ങിയവർ സുപ്രധാന വേഷങ്ങൾ അവതരിപ്പിക്കുന്ന ഈ ചിത്രത്തിലെ നായിക കഥാപാത്രമായ ‘സുമതി’യെ ദീപിക പദുക്കോണാണ് കൈകാര്യം ചെയ്യുന്നത്. ‘അശ്വത്ഥാമാവ്’ എന്ന കഥാപാത്രമായി അമിതാഭ് ബച്ചനും ‘യാസ്കിൻ’ എന്ന കഥാപാത്രമായ് കമൽഹാസനും ‘ഭൈരവ’യായ് പ്രഭാസും ‘റോക്സി’യായി ദിഷാ പടാനിയും വേഷമിടുന്നു. വമ്പൻ താരങ്ങളെ അണിനിരത്തി ഒരുങ്ങുന്ന പാൻ ഇന്ത്യൻ സിനിമയാണ് ‘കൽക്കി 2898 എഡി’. മികച്ച പശ്ചാത്തല സംഗീതംത്തോടൊപ്പം ഗംഭീര വിഎഫ്എക്‌സും നൽകികൊണ്ടാണ് ചിത്രം ഒരുങ്ങുന്നത്. പിആർഒ: ശബരി.
