‘കൽക്കി 2898 എഡി’യിൽ കൈയടി നേടിയ ക്യാപ്റ്റൻ; ദുൽഖർ സൽമാന്റെ ക്യാരക്ടർ പോസ്റ്റർ പുറത്ത്…
പ്രഭാസിനെ നായകനാക്കി നാഗ് അശ്വിൻ ഒരുക്കിയ ബ്രഹ്മാണ്ഡ ചിത്രം ‘കൽക്കി 2898 എഡി’യിൽ മലയാളത്തിന്റെ സ്വന്തം ദുൽഖർ സൽമാനും ഒരു സ്പെഷ്യൽ റോളിൽ പ്രത്യക്ഷപ്പെട്ടിരുന്നു. ഇപ്പോൾ ഈ കഥാപാത്രത്തിന്റെ ഫസ്റ്റ് ലൂക്ക് പോസ്റ്റർ പുറത്തിറക്കിയിരിക്കുകയാണ് നിർമ്മാതാക്കളായ വൈജയന്തി മൂവീസ്. തീനാളങ്ങൾക്കരികിൽ കരയുന്ന കുഞ്ഞിനെയും കയ്യിലേന്തി നിൽക്കുന്ന ദുൽഖർ സൽമാനെ ആണ് പോസ്റ്ററിൽ കാണാൻ കഴിയുക. ക്യാപ്റ്റൻ എന്ന് ആണ് ദുൽഖറിന്റെ കഥാപാത്രത്തിന് നൽകിയിരിക്കുന്ന പേര്.
ദുൽഖർ ഈ ചിത്രത്തിന്റെ ഭാഗമായത് നടനായി മാത്രമായിരുന്നില്ല. ഈ ബ്രഹ്മാണ്ഡ ചിത്രം കേരളത്തിൽ വിതരണത്തിനെത്തിച്ചത് ദുൽഖറിന്റെ കമ്പനിയായ വേഫറർ ഫിലിംസ് ആയിരുന്നു. ഇന്ത്യൻ മിത്തോളജിയിൽ വേരൂന്നി പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന സയൻസ് ഫിക്ഷനാണ് ‘കൽക്കി 2898 എഡി’. ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളുടെ കഥ പറയുന്ന ചിത്രത്തിൽ 3101-ലെ മഹാഭാരതത്തിൻ്റെ ഇതിഹാസ സംഭവങ്ങൾ മുതൽ എഡി 2898 സഹസ്രാബ്ദങ്ങൾ വരെ നീണ്ടുനിൽക്കുന്ന യാത്രയാണ് ദൃശ്യാവിഷ്കരിക്കുന്നത്.
മെഗാസ്റ്റാർ അമിതാഭ് ബച്ചൻ, ഉലഗനായകൻ കമൽ ഹാസൻ, ദീപിക പദുക്കോൺ, ദിഷാ പടാനി, വിജയ് ദേവരകൊണ്ട തുടങ്ങിയ വമ്പൻ താരങ്ങളും അണിനിരന്ന ചിത്രത്തിൽ ദുൽഖറിനെ കൂടാതെ വിജയ് ദേവരകൊണ്ടയും മറ്റ് ചില താരങ്ങളും സർപ്രൈസ് വേഷങ്ങളിൽ എത്തിയിരുന്നു. ആഗോള ബോക്സ് ഓഫീസിൽ നിന്ന് രണ്ട് ദിവസം കൊണ്ട് 298.5 കോടി ഗ്രോസ് കളക്ഷൻ ആണ് ചിത്രം നേടിയിരിക്കുന്നത്. പിആർഒ: ശബരി.
