“പറവയാകുകിൽ വൻ പരുന്തായി മാറണം”; ദുൽഖറിൻ്റെ ‘ലക്കി ഭാസ്കർ’ ടൈറ്റിൽ ട്രാക്ക് പുറത്ത്…
ദുൽഖർ സൽമാന്റെ ജന്മദിനമായ ഇന്ന് (ജൂലൈ 28) താരത്തിന്റെ ഏറ്റവും പുതിയ ചിത്രമായ ‘ലക്കി ഭാസ്കർ’ന്റെ ടൈറ്റിൽ ട്രാക്ക് റിലീസായി. വെങ്കി അറ്റ്ലൂരി സംവിധാനം ചെയ്യുന്ന ഈ ചിത്രത്തിന്റെ ടൈറ്റിൽ ട്രാക്ക് ആലപിച്ചിരിക്കുന്നത് ഉഷ ഉതുപ്പാണ്. വിനായക് ശശികുമാറിന്റെതാണ് വരികൾ.
1980-കളിലെ ഇൻഡി-റോക്കിനെ ഇന്നത്തെ തലമുറയുടെ താൽപര്യങ്ങളുമായ് സംയോജിപ്പിച്ച ഈ ഗാനത്തിന് നാഷണൽ അവാർഡ് വിന്നർ ജി വി പ്രകാഷ് കുമാറാണ് സംഗീതം പകർന്നത്. 1980-കളുടെ അവസാനത്തിലേക്കും 1990-കളുടെ തുടക്കത്തിലേക്കും നമ്മെ തിരികെ കൊണ്ടുപോകുന്ന ഗാനം ആവേശം പകരുന്നതാണ്. ഗാനം:
സിതാര എൻ്റർടൈൻമെൻ്റ്സിൻ്റെ ബാനറിൽ സൂര്യദേവര നാഗ വംസിയും ഫോർച്യൂൻ ഫോർ സിനിമാസിന്റെ ബാനറിൽ സായ് സൗജന്യയും ചേർന്ന് നിർമ്മിക്കുന്ന ‘ലക്കി ഭാസ്കർ’ ശ്രീകര സ്റ്റുഡിയോസാണ് അവതരിപ്പിക്കുന്നത്. ഭാസ്കർ എന്ന സാധാരണക്കാരൻ്റെ അസാധാരണമായ കഥയാണ് ചിത്രം പറയുന്നത്. തെലുഗു, മലയാളം, തമിഴ്, ഹിന്ദി എന്നീ ഭാഷകളിലായ് ഒരുങ്ങുന്ന ചിത്രം 2024 സെപ്റ്റംബർ 7ന് തീയേറ്ററുകളിലെത്തും.
മഗധ ബാങ്കിൽ ജോലി ചെയ്യുന്ന ബാങ്ക് കാഷ്യറുടെ വേഷത്തിൽ ദുൽഖർ പ്രത്യക്ഷപ്പെടുന്ന ചിത്രത്തിന് തിരക്കഥ ഒരുക്കിയത് ബ്ലോക്ബസ്റ്റർ എഴുത്തുകാരനും സംവിധായകനുമായ വെങ്കി അറ്റ്ലൂരി തന്നെയാണ്. 90-കളിലെ ബോംബെയിലെ സാമ്പത്തിക പ്രതിസന്ധിയുടെ സമയത്ത് ഒരു കാഷ്യറുടെ ജീവിതം കടന്നുപോവുന്ന സാഹചര്യങ്ങളാണ് ദൃശ്യാവിഷ്കരിക്കുന്നത്. പ്രശസ്ത പ്രൊഡക്ഷൻ ഡിസൈനർ ബംഗ്ലാൻ ചിത്രത്തിനായി 80-കളിലെ മുംബൈയും പിന്നീട് ബോംബെയും പുനർനിർമ്മിച്ചിരുന്നു. അദ്ദേഹത്തിൻ്റെ ഈ മികച്ച സൃഷ്ടിക്ക് അവാർഡുകൾ ലഭിക്കുമെന്നാണ് നിർമ്മാതാക്കൾ പറയുന്നത്.
മീനാക്ഷി ചൗധരിയാണ് ചിത്രത്തിൽ ദുൽഖറിന്റെ നായികയായി എത്തുന്നത്. സുമതി എന്നാണ് മീനാക്ഷിയുടെ കഥാപാത്രത്തിന്റെ പേര്. ‘തോളി പ്രേമ’, ‘വാത്തി’ എന്നീ ചിത്രങ്ങൾക്ക് ശേഷം വെങ്കി അറ്റ്ലൂരി സംവിധാനം ചെയ്യുന്ന ചിത്രമാണ് ‘ലക്കി ഭാസ്കർ’. ഛായാഗ്രഹണം: നിമിഷ് രവി, പ്രൊഡക്ഷൻ ഡിസൈൻ: ബംഗ്ലാൻ, ചിത്രസംയോജനം: നവിൻ നൂലി, പിആർഒ: ശബരി.
