മഹാ വിസ്മയ കാഴ്ചകൾ സമ്മാനിച്ച് ബ്രഹ്മാണ്ഡ ചിത്രം ‘അവതാർ 2’ ട്രെയിലർ എത്തി…
ബ്രഹ്മാണ്ഡ സിനിമകളുടെ രാജാവ് എന്ന് വിശേഷിപ്പിക്കാൻ അർഹതയുള്ള ഒരൊറ്റ സിനിനയെ ലോകത്തുള്ളൂ, അത് ‘അവതാർ’ ആണ്. ജെയിംസ് കാമറൂൺ സംവിധാനം ചെയ്യുന്ന ഈ സിനിമയുടെ തുടർഭാഗങ്ങൾക്കായുള്ള കാത്തിരിപ്പിൽ ആണ് ലോകമെമ്പാടുമുള്ള കോടികണക്കിനുള്ള ആരാധകർ. ‘അവതാർ: ദ് വേ ഓഫ് വാട്ടർ’ എന്ന ടൈറ്റിൽ നൽകിയിരിക്കുന്ന അവതാർ 2വിന്റെ റിലീസ് അടുത്ത മാസമാണ്. സോ സാൽഡാനയും സാം വർത്തിംഗ്ടണും പ്രധാന വേഷങ്ങളിൽ എത്തുന്ന ഈ ജെയിംസ് കാമറൂണിന്റെ ചിത്രം ഡിസംബർ 16 ന് ആണ് ബിഗ് സ്ക്രീനിൽ എത്തുക. ഈ ചിത്രത്തിന്റെ പുതിയ ട്രെയിലർ ഇപ്പോൾ പ്രേക്ഷകർക്ക് മുന്നിൽ എത്തിയിരിക്കുക ആണ്. ആദ്യ സിനിമയുടെ സംഭവങ്ങൾ നടന്നിട്ട് ഒരു ദശാബ്ദം പിന്നിടുമ്പോൾ ആണ് രണ്ടാം ഭാഗത്തിന്റെ കഥ ആരംഭിക്കുന്നത്.
2 മിനിറ്റ് 28 സെക്കൻഡ് ദൈർഘ്യമുള്ള ട്രെയിലർ ആണ് ഓഫീഷ്യലായി ഇപ്പോൾ പുറത്തുവന്നിരിക്കുന്നത്. ട്രെയിലറിന് ഒപ്പം നൽകിയിരിക്കുന്ന ഔദ്യോഗിക സംഗ്രഹം അനുസരിച്ച്, സുള്ളി കുടുംബത്തിന്റെ (ജെയ്ക്ക്, നെയ്‌ത്തിരി, അവരുടെ കുട്ടികൾ) കഥ പറഞ്ഞാണ് ചിത്രം തുടങ്ങുന്നത്, അവരെ പിന്തുടരുന്ന പ്രശ്‌നങ്ങൾ, പരസ്പരം സുരക്ഷിതരായിരിക്കാൻ അവർ ഏതറ്റം വരെ പോകും, ജീവനോടെയിരിക്കാൻ അവർ നടത്തുന്ന പോരാട്ടങ്ങൾ എന്നിവയുടെ കഥ പറയാൻ തുടങ്ങുന്നു, അവർ സഹിക്കുന്ന ദുരന്തങ്ങളും ചിത്രത്തിൽ കാണാം.
ജെയിംസ് കാമറൂൺ സംവിധാനം ചെയ്ത് കാമറൂണും ജോൺ ലാൻഡൗവും ചേർന്ന് നിർമ്മിച്ച ഈ ചിത്രത്തിൽ സോ സാൽഡാന, സാം വർത്തിംഗ്ടൺ, സിഗോർണി വീവർ, സ്റ്റീഫൻ ലാംഗ്, ക്ലിഫ് കർട്ടിസ്, ജോയൽ ഡേവിഡ് മൂർ, ഈഡി ഫാൽക്കോ, ജെമൈൻ ക്ലെമന്റ്, കേറ്റ് വിൻസ്‌ലെറ്റ് എന്നിവർ അഭിനയിക്കുന്നു. ഈ ചിത്രത്തിന്റെ തുടർച്ചയായി എത്തുന്ന മൂന്ന് അവതാർ ചിത്രങ്ങളും രണ്ട് വർഷങ്ങൾ കൂടുമ്പോൾ ഡിസംബറിൽ തിയേറ്ററുകളിൽ എത്തും. ട്രെയിലർ:
