അൽഫോൺസ് പുത്രന് തിരിച്ചുവരവ്; സംവിധാനം അരുൺ വൈഗ, കൂടുതൽ വിവരങ്ങൾ പുറത്ത്…
മലയാളത്തിന്റെ പ്രിയ സംവിധായകൻ അൽഫോൺസ് പുത്രൻ സിനിമ രംഗത്തേക്ക് തിരിച്ചെത്തുന്നു. അഭിനേതാവായിട്ടാണ് അൽഫോൺസ് തിരച്ചുവരുന്നത്. സംവിധാനം ചെയ്ത ചിത്രങ്ങളിൽ അഭിനയിച്ചിട്ടുള്ള അൽഫോൻസ് ആദ്യമായി മറ്റൊരു സംവിധായകന്റെ ചിത്രത്തിൽ അഭിനയിക്കുകയാണ്. അരുൺ വൈഗ സംവിധാനം ചെയ്യുന്ന ചിത്രത്തിലാണ് അൽഫോൻസ് ഒരു കഥാപാത്രത്തെ അവതരിപ്പിക്കുക. അരുൺ വൈഗയുടെ ഒഫീഷ്യൽ ഇൻസ്റ്റഗ്രാം ഹാൻഡിലിലൂടെ പുറത്തുവിട്ട വീഡിയോ വഴിയാണ് ഇക്കാര്യം അറിയിച്ചത്.
വീഡിയോക്ക് ഒപ്പം അരുൺ വൈഗ കുറിച്ച ഹൃദയസ്പർശിയായ വാക്കുകളും ശ്രദ്ധനേടുന്നുണ്ട്. തനിക്ക് ഏറ്റവും കൂടുതല് പ്രേമം തോന്നിയ സിനിമയാണ് പ്രേമം എന്നും അതിൽ ജോലി ചെയ്ത എല്ലാവരെയും പരിചയപ്പെടുകയും സുഹൃത്തുക്കളാക്കുകയും ചെയ്തുവെങ്കിലും അൽഫോൻസ് പുത്രനെ മാത്രം പരിചയപ്പെടാൻ കഴിയാതെ പോയതിനെ പറ്റിയും ഒക്കെ അരുൺ കുറിക്കുന്നു. നിരന്തരമായ ശ്രമങ്ങൾക്ക് ഒടുവിൽ തൻ്റെ പുതിയ സിനിമയിൽ അദ്ദേഹം ഒരു കാമിയോ റോൾ ചെയ്തു. ഒരുപാട് ആരാധിക്കുന്ന ആ മാജിക്ക് മേക്കറോട് ആക്ഷൻ പറഞ്ഞു എന്നും ഒരുപാട് നാൾ അറിയുന്ന സുഹൃത്തിനെ പോലെ, ഒരു അനിയനെ പോലെ ആണ് അദ്ദേഹം പെരുമാറിയത് എന്നും അരുൺ കുറിക്കുന്നു. ഒരു ഗംഭീര സിനിമയുമായി അദ്ദേഹം തിരികെ വരട്ടെ എന്ന് ആശംസിച്ചു കൊണ്ട് ആണ് അരുൺ കുറിപ്പ് അവസാനിപ്പിച്ചത്.
അജു വർഗ്ഗീസ്, അഷ്കർ അലി, വിശാഖ് നായർ എന്നിവർ കേന്ദ്ര കഥാപാത്രങ്ങളെ അവതരിപ്പിച്ച്, 2017 നവംബർ 24ന് റിലീസ് ചെയ്ത ‘ചെമ്പരത്തിപ്പൂ’ എന്ന ചിത്രത്തിലൂടെയാണ് അരുൺ വൈഗ സംവിധായകനായും തിരക്കഥാകൃത്തായും അരങ്ങേറ്റം കുറിക്കുന്നത്. 2022 ഫെബ്രുവരി 25ന് പുറത്തിറങ്ങിയ സൈജു കുറുപ്പ് ചിത്രം ‘ഉപചാരപൂര്വ്വം ഗുണ്ടാജയന്’ന് ശേഷം അരുൺ വൈഗ തിരക്കഥയെഴുതി സംവിധാനം ചെയ്യുന്ന പുതിയ ചിത്രത്തിലാണ് അൽഫോൺസ് പുത്രൻ കാമിയോ വേഷത്തിൽ പ്രത്യക്ഷപ്പെടുന്നത്. ഫ്രാഗ്രന്റ് നേച്ചർ ഫിലിം ക്രീയേഷൻസ്, പൂയപ്പിള്ളി ഫിലിംസ്, എന്നീ ബാനറിൽ ആൻ, സജീവ്, അലക്സാണ്ടർ മാത്യു എന്നിവർ ചേർന്നാണ് ചിത്രം നിർമ്മിക്കുന്നത്.
‘മൈക്ക്’, ‘ഖൽബ്’, ‘ഗോളം’ എന്നീ ചിത്രങ്ങൾക്ക് ശേഷം രഞ്ജിത്ത് സജീവ് നായക കഥാപാത്രത്തെ അവതരിപ്പിക്കുന്ന സിനിമയാണിത്. ജോണി ആന്റണി, ഇന്ദ്രൻസ്, Dr.റോണി, മനോജ്.കെ.യു, ബിലാൽ മൂസി, സംഗീത, മഞ്ജു പിള്ള, സാരംഗി ശ്യാം, അഖില അനോകി, മെറീസാ ജോസ്, Dr. ചാന്ദിനി ശ്രീകുമാർ തുടങ്ങിയവരാണ് മറ്റ് അഭിനേതാക്കൾ. റോയിച്ചനായ് ജോണി ആൻ്റണിയും ടോണിയായ് രഞ്ജിത്ത് സജീവും എത്തുന്ന ഈ ചിത്രത്തിൽ ഏകയായ് സാരംഗി ശ്യാമും മൈക്കിളച്ചനായ് ഇന്ദ്രൻസും റോസ്സമ്മയായ് മഞ്ജു പിള്ളയും അന്നക്കുട്ടിയായ് സംഗീതയും മാധവനായ് മനോജ് കെ ജയനും വേഷമിടുന്നു. ഈരാറ്റുപേട്ട, മൂന്നാർ, കൊച്ചി, തിരുവനന്തപ്പുരം, ചെന്നൈ എന്നിവിടങ്ങൾ പ്രധാന ലോക്കേഷനുകളായ ചിത്രത്തിന്റെ ചിത്രീകരണം ഈരാറ്റുപേട്ട, വട്ടവട എന്നിവിടങ്ങളിലായ് പുരോഗമിക്കുന്നു.
ഛായാഗ്രഹണം: സിനോജ് പി അയ്യപ്പൻ, ചിത്രസംയോജനം: അരുൺ വൈഗ, സംഗീതം: രാജേഷ് മുരുകേശൻ (നേരം, പ്രേമം), ഗാനരചന: ശബരീഷ് വർമ്മ, ലൈൻ പ്രൊഡ്യൂസർ: ഹാരിസ് ദേശം, പ്രൊഡക്ഷൻ കൺട്രോളർ: റിന്നി ദിവാകർ, കലാസംവിധാനം: സുനിൽ കുമാരൻ, മേക്കപ്പ്: ഹസ്സൻ വണ്ടൂർ, വസ്ത്രാലങ്കാരം: മെൽവി.ജെ, സ്റ്റണ്ട്: ഫീനിക്സ് പ്രഭു, അസ്സോസിയേറ്റ് ഡയറക്ടേർസ്: സുമേഷ് മുണ്ടയ്ക്കൽ, ഇനീസ് അലി, അസിസ്റ്റന്റ് ഡയറക്ടേർസ്: വിൻസ്, ശരത് കേദാർ, ഷിൻ്റോ ഔസേപ്പ് തെർമ്മ, ശാലിനി ശരത്, ചീഫ് അസ്സോസിയേറ്റ് ഡയറക്ടർ: കിരൺ റാഫേൽ, അസ്സോസിയേറ്റ് ക്യാമറാമാൻ: രാജ്കുമാർ, ചീഫ് അസ്സോസിയേറ്റ് ക്യാമറാമാൻ: വിഷ്ണു കണ്ണൻ, സുമേഷ്. കെ.ചന്ദ്രൻ, അസിസ്റ്റന്റ് ക്യാമറാമാൻ: അഫിൻ സേവ്യർ, ബിബിൻ ബേബി, സുധിൻ രാമചന്ദ്രൻ, അഭിരാം ആനന്ദ്, പ്രൊഡക്ഷൻ എക്സിക്യൂട്ടീവ്: വിനോഷ്.കെ.കൈമൾ, നിശ്ചല ഛായാഗ്രഹണം: ബിജിത്ത് ധർമ്മടം, പ്രൊഡക്ഷൻ മാനേജർ: ഇന്ദ്രജിത്ത് ബാബു, പീറ്റർ അർത്തുങ്കൽ, നിധീഷ് പൂപ്പാറ, പരസ്യകല: ഓൾഡ് മങ്ക്സ്.
