നാനിയുടെ ‘ഹിറ്റ് 3’ ദുൽഖർ കേരളത്തിലെത്തിക്കും; റിലീസ് മെയ് 1ന്, മലയാളം ട്രെയിലറും ശ്രദ്ധനേടുന്നു…
തെലുങ്ക് സിനിമയിൽ നിന്നുള്ള ‘ഹിറ്റ്’ സിനിമാറ്റിക്ക് യൂണിവേഴ്സിലെ മൂന്നാം ചിത്രം ‘ഹിറ്റ് 3’ മെയ് ഒന്നിന് ലോകമെമ്പാടുമുള്ള തിയേറ്ററുകളിൽ എത്താൻ ഒരുങ്ങുകയാണ്. ഈ സിനിമയുടെ കേരളത്തിലെ വിതരണാവകാശം മലയാളികളുടെ പ്രിയ താരം ദുൽഖർ സൽമാൻ്റെ ഉടമസ്ഥതയിലുള്ള വേഫെറർ ഫിലിംസ് സ്വന്തമാക്കി. ശൈലേഷ് കോലാനു സംവിധാനം ചെയ്യുന്ന ഈ ചിത്രം വാൾ പോസ്റ്റർ സിനിമയുടെ ബാനറിൽ പ്രശാന്തി തിപിർനേനിയും നാനിയുടെ യുനാനിമസ് പ്രൊഡക്ഷൻസും ചേർന്നാണ് നിർമ്മിക്കുന്നത്.
സൂപ്പർഹിറ്റുകളായ ‘ഹിറ്റ്’, ‘ഹിറ്റ് 2’ എന്നീ ചിത്രങ്ങൾക്ക് ശേഷം എത്തുന്ന ഈ ഫ്രാഞ്ചൈസിയിലെ മൂന്നാം സിനിമയ്ക്കായി ആകാംക്ഷയോടെ കാത്തിരിക്കുകയാണ് സിനിമാ പ്രേമികൾ.
ഏപ്രിൽ 14 ന് പുറത്തിറങ്ങിയ ചിത്രത്തിൻ്റെ ട്രെയിലർ മികച്ച പ്രതികരണങ്ങൾ നേടിയിരുന്നു. നാനി അവതരിപ്പിക്കുന്ന അർജുൻ സർക്കാർ എന്ന പോലീസ് ഓഫീസറുടെ കഥാപാത്രത്തെ ചുറ്റിപ്പറ്റിയാണ് സിനിമയുടെ ഇതിവൃത്തം മുന്നോട്ട് പോകുന്നത് എന്ന് ട്രെയിലറും ടീസറും സൂചന നൽകുന്നു. ‘ഹിറ്റ് 3’യിൽ നായികയായി എത്തുന്നത് ശ്രീനിധി ഷെട്ടിയാണ്.
പ്രേക്ഷകർ ഇതുവരെ കാണാത്ത അത്രയും തീവ്രവും ശക്തവുമായ ഒരു പോലീസ് കഥാപാത്രത്തെയാണ് നാനി ഈ സിനിമയിൽ അവതരിപ്പിക്കുന്നത്. താരത്തിൻ്റെ സിനിമാ കരിയറിലെ തന്നെ ഏറ്റവും പ്രതീക്ഷ നൽകുന്ന ചിത്രമാണിത്. പോലീസ് സേനയെ ഒന്നടങ്കം വലയ്ക്കുന്ന ഒരു കൊലപാതക പരമ്പരയെ പിന്തുടരുന്ന നായക കഥാപാത്രമാണ് അർജുൻ സർക്കാർ. മികച്ച സാങ്കേതിക വിദഗ്ധരുടെ സഹായത്തോടെ വലിയ മുതൽമുടക്കിൽ ഒരുക്കുന്ന ഈ ചിത്രത്തിലൂടെ പ്രേക്ഷകർക്ക് പുത്തൻ സിനിമാനുഭവം സമ്മാനിക്കുവാൻ ഒരുങ്ങുകയാണ് സംവിധായകൻ ശൈലേഷ് കോലാനു. തെലുങ്ക്, തമിഴ്, കന്നഡ, ഹിന്ദി, മലയാളം എന്നീ അഞ്ച് ഭാഷകളിലായി ചിത്രം ഒരേസമയം റിലീസ് ചെയ്യും.
സാനു ജോൺ വർഗീസ് ആണ് ചിത്രത്തിൻ്റെ ഛായാഗ്രഹണം നിർവഹിച്ചിരിക്കുന്നത്. മിക്കി ജെ മേയറാണ് സംഗീതം. എഡിറ്റിംഗ് കാർത്തിക ശ്രീനിവാസ് ആറും, പ്രൊഡക്ഷൻ ഡിസൈനർ ശ്രീ നാഗേന്ദ്ര തങ്കാലയും ആണ്. ശൈലേഷ് കോലാനു തിരക്കഥ എഴുതിയിരിക്കുന്ന ഈ ചിത്രത്തിൻ്റെ മറ്റ് അണിയറ പ്രവർത്തകർ ഇവരാണ്: എക്സിക്യൂട്ടീവ് പ്രൊഡ്യൂസർ – എസ് വെങ്കിട്ടരത്നം (വെങ്കട്ട്), ശബ്ദമിശ്രണം: സുരൻ ജി, ലൈൻ പ്രൊഡ്യൂസർ – അഭിലാഷ് മന്ദധ്പു, ചീഫ് കോ-ഡയറക്ടർ -വെങ്കട്ട് മദ്ദിരാല, കോസ്റ്റ്യൂം ഡിസൈനർ – നാനി കമരുസു, SFX- സിങ്ക് സിനിമ, വിഎഫ്എക്സ് സൂപ്പർവൈസർ: VFX DTM, ഡിഐ: B2h സ്റ്റുഡിയോസ്, കളറിസ്റ്റ് – എസ് രഘുനാഥ് വർമ്മ, മാർക്കറ്റിംഗ് – ഫസ്റ്റ് ഷോ, പിആർഒ – ശബരി.
