“ദേ നാടോടിക്കാറ്റ് നായകനും നായികയും”; കഥ തുടരാൻ മോഹൻലാലും ശോഭനയും, ‘തുടരും’ പോസ്റ്റർ സൂപ്പർഹിറ്റ്…
മലയാളത്തിന്റെ മഹാനടൻ മോഹൻലാലിനെ നായകനാക്കി തരുൺ മൂർത്തി ഒരുക്കുന്ന “തുടരും” എന്ന ചിത്രത്തിന്റെ ഏറ്റവും പുതിയ പോസ്റ്റർ പുറത്ത്. മോഹൻലാലും നായികയായ ശോഭനയും ഉള്ള പോസ്റ്റർ സോഷ്യൽ മീഡിയയിൽ സൂപ്പർ ഹിറ്റായിക്കഴിഞ്ഞു. മലയാളത്തിലെ നിത്യഹരിത പ്രണയ ജോഡികളായ മോഹൻലാൽ- ശോഭന ടീമിന്റെ ഈ ഗൃഹാതുരത്വം ഉണർത്തുന്ന പോസ്റ്ററാണ് ഇപ്പോൾ സമൂഹ മാധ്യമങ്ങളിൽ ചർച്ചാ വിഷയം.
1987 ലെ ബ്ലോക്ക്ബസ്റ്റർ ചിത്രമായ നാടോടിക്കാറ്റിലെ ‘വൈശാഖ സന്ധ്യേ’ എന്ന ഗാനത്തിലെ ഇവരുടെ പ്രണയ രംഗം എടുത്തു വെച്ചാണ് ഈ പുതിയ പോസ്റ്ററും സോഷ്യൽ മീഡിയ ആഘോഷിക്കുന്നത്. ” ചില കഥകൾ തുടരാൻ ഉദ്ദേശിച്ചുള്ളതാണ്” എന്ന കുറിപ്പോടെയാണ് ഈ പുതിയ പോസ്റ്റർ മോഹൻലാൽ പങ്ക് വെച്ചത്. ചിത്രത്തിന്റെ ഡബ്ബിങ് ജോലികൾ അടുത്തിടെ പൂർത്തിയായിരുന്നു.
Some stories are meant to continue… Presenting #Thudarum ☺️@Rejaputhra_VM @talk2tharun #Shobana #MRenjith #KRSunil #ShajiKumar @JxBe #L360 pic.twitter.com/23vZtzRd8K
— Mohanlal (@Mohanlal) November 29, 2024
അടുത്ത വർഷം ജനുവരി മുപ്പതിന് “തുടരും” ആഗോള റിലീസായി എത്തും. ആശീർവാദ് സിനിമാസ് ആണ് ചിത്രം പ്രേക്ഷകരുടെ മുന്നിലെത്തിക്കുക. രജപുത്ര വിഷ്വൽ മീഡിയയുടെ ബാനറിൽ എം രഞ്ജിത് നിർമ്മിക്കുന്ന ഈ ചിത്രത്തിന് സംഗീതമൊരുക്കുന്നത് ജേക്സ് ബിജോയ്, കാമറ ചലിപ്പിച്ചത് ഷാജി കുമാർ എന്നിവരാണ്. നിഷാദ് യൂസഫ്, ഷെഫീഖ് വി ബി എന്നിവരാണ് ചിത്രത്തിന്റെ എഡിറ്റർമാർ. തരുൺ മൂർത്തി, കെ ആർ സുനിൽ എന്നിവർ ചേർന്ന് രചിച്ച ഈ ചിത്രം ഓപ്പറേഷൻ ജാവ, ദേശീയ പുരസ്‍കാരം നേടിയ സൗദി വെള്ളക്ക എന്നിവക്ക് ശേഷം തരുൺ മൂർത്തി സംവിധാനം ചെയ്ത ചിത്രമാണ്.
മോഹൻലാൽ പത്തനംതിട്ട റാന്നി സ്വദേശിയായ ഷൺമുഖം എന്ന ടാക്സി ഡ്രൈവറായി വേഷമിടുന്ന ചിത്രത്തിൽ, ഈ കഥാപാത്രത്തിന്റെ ഭാര്യ ആയാണ് ശോഭന എത്തുന്നത്. ഫർഹാൻ ഫാസിൽ, ബിനു പപ്പു, മണിയൻ പിള്ള രാജു, ഇർഷാദ് തുടങ്ങി ഒരു മികച്ച താരനിര തന്നെ ചിത്രത്തിൽ അണിനിരക്കുന്നുണ്ട്.
