അടുത്തകാലത്ത് ഇത്രയും ചിരിച്ചിട്ടില്ല, ഫാമിലിയ്ക്കും ഇഷ്ടമായി; ‘പ്രേമലു’വിൽ മയങ്ങി മഹേഷ് ബാബുവും…
മലയാളത്തിൽ നിന്ന് നൂറ് കോടി ക്ലബിലെത്തുന്ന അഞ്ചാമത്തെ ചിത്രമായ പ്രേമലുവിന്റെ വിജയ യാത്ര തുടരുകയാണ്. ഇതേ പേരിൽ തെലുങ്കിലും റിലീസ് ചെയ്ത ഇതിന്റെ ഡബ്ബിങ് വേർഷനും മികച്ച വിജയമാണ് നേടുന്നത്. ഇപ്പോഴിതാ, തെലുങ്ക് സൂപ്പർ താരം മഹേഷ് ബാബുവാണ് ഈ ചിത്രം കണ്ടതിന് ശേഷം പ്രശംസയുമായി എത്തിയിരിക്കുന്നത്. തെലുങ്ക് സൂപ്പർ ഹിറ്റ് സംവിധായകൻ എസ് എസ് രാജമൗലിയുടെ മകനായ കാർത്തികേയ ആണ് ഈ ചിത്രം തെലുങ്കിൽ ഡബ്ബ് ചെയ്ത് അവിടെ വിതരണം ചെയ്തത്.
ഇത്ര രസകരമായ ഒരു ചിത്രം തെലുങ്ക് പ്രേക്ഷകരിലേക്ക് എത്തിച്ചതിൽ കാർത്തികേയക്ക് നന്ദി പറഞ്ഞു കൊണ്ടാണ് മഹേഷ് ബാബു ട്വീറ്റ് ചെയ്തത്. അടുത്തകാലത്തെങ്ങും ഒരു സിനിമ കണ്ട് താൻ ഇത്രയും ചിരിച്ചിട്ടില്ല എന്നും തന്റെ കുടുംബത്തിന് മുഴുവൻ ഈ ചിത്രം ഇഷ്ടമായെന്നും അദ്ദേഹം കുറിച്ചു. ഇതിൽ അഭിനയിച്ച ചെറുപ്പക്കാർ എല്ലാവരും തന്നെ മികച്ച അഭിനയമാണ് കാഴ്ചവെച്ചതെന്നും പറഞ്ഞ മഹേഷ് ബാബു, അണിയറ പ്രവർത്തകർക്കുളള അഭിനന്ദനവും അറിയിച്ചു.
Thank you @ssk1122 for bringing #Premalu to the Telugu audience… Thoroughly enjoyed it…. Can't remember the last time when I laughed so much while watching a film… The entire family loved it 😁 Top class acting by all the youngsters 🤗🤗🤗Congratulations to the entire team!!
— Mahesh Babu (@urstrulyMahesh) March 12, 2024
ഗിരീഷ് എ ഡി സംവിധാനം ചെയ്ത ഈ റൊമാന്റിക് കോമഡി ചിത്രത്തിൽ നസ്ലിൻ, മമിതാ ബൈജു എന്നിവരാണ് പ്രധാന വേഷങ്ങൾ ചെയ്തത്. സംഗീത് പ്രതാപ്, ശ്യാം മോഹൻ, അഖില ഭാർഗവൻ എന്നിവരും നിർണ്ണായക കഥാപാത്രങ്ങളെ അവതരിപ്പിച്ച ഈ ചിത്രം ഹൈദരാബാദ് നഗരത്തിന്റെ പശ്ചാത്തലത്തിലാണ് കഥയവതരിപ്പിച്ചത്. ഫഹദ് ഫാസിൽ, ദിലീഷ് പോത്തൻ, ശ്യാം പുഷ്ക്കരൻ എന്നിവർ ചേർന്ന് ഫഹദ് ഫാസിൽ ആൻഡ് ഫ്രണ്ട്സ്, ഭാവന സ്റ്റുഡിയോസ്, വർക്കിംഗ് ക്ലാസ് ഹീറോ എന്നീ ബാനറുകളിൽ നിർമ്മിച്ച പ്രേമലു രചിച്ചത് സംവിധായകൻ ഗിരീഷ് എ ഡി, കിരൺ ജോസി എന്നിവർ ചേർന്നാണ്. കേരളത്തിൽ നിന്ന് മാത്രം 50 കോടി ഗ്രോസ് നേടുന്ന ചിത്രങ്ങളിലൊന്നായും പ്രേമലു മാറിയിരുന്നു. മഹേഷ് ബാബുവിനൊപ്പം തന്നെ എസ് എസ് രാജമൗലിയും ഈ ചിത്രത്തിന് വലിയ പ്രശംസയാണ് നൽകിയത്.
Content Summary: Mahesh Babu Loved Premalu, his tweet; Praises young actors’ performances, Thanks SS Karthikeyan for bringing it to Telugu audience.
