“നരകാസുര പരിവേഷത്തിൽ വില്ലനായി എസ് ജെ സൂര്യ”; നാനി ചിത്രം ‘സൂര്യാസ് സാറ്റർഡേ’ സ്പെഷ്യൽ വീഡിയോ പുറത്ത്…
തെലുങ്ക് താരം നാനിയെ നായകനാക്കി വിവേക് ആത്രേയ രചിച്ച് സംവിധാനം ചെയ്യുന്ന പാൻ ഇന്ത്യൻ ചിത്രമായ ‘സൂര്യാസ് സാറ്റർഡേ’യുടെ ഒരു സ്പെഷ്യൽ വീഡിയോ ഇന്ന് പുറത്തിറങ്ങി. ചിത്രത്തിൽ വളരെ നിർണ്ണായക വേഷത്തിൽ എത്തുന്ന എസ് ജെ സൂര്യയുടെ ജന്മദിനം പ്രമാണിച്ച് റിലീസായിരിക്കുന്ന ഈ വീഡിയോ ‘നോട്ട് എ ടീസർ’ എന്ന ടൈറ്റിൽ നല്കിയാണ് പുറത്തിറക്കിയിരിക്കുന്നത്.
ശക്തമായ വിവരണത്തോടെ ആരംഭിക്കുന്ന വിയിയോയിൽ നരകാസുര പരിവേഷത്തിലാണ് എസ് ജെ സൂര്യയുടെ കഥാപാത്രത്തെ അവതരിപ്പിക്കുന്നത്. തുടർന്ന് കൃഷ്ണ പരിവേഷത്തിൽ നാനിയെയും സത്യഭാമ പരിവേഷത്തിൽ പ്രിയങ്ക മോഹനെയും വീഡിയോയിൽ പരിചയപ്പെടുത്തുന്നു. ക്രൂരനായ ഒരു പോലീസ് ഓഫീസറായാണ് എസ് ജെ സൂര്യ ഈ ചിത്രത്തിൽ വേഷമിടുന്നത് എന്ന് ഈ വീഡിയോ വ്യക്തമാക്കുന്നുണ്ട്. സ്പെഷ്യൽ വീഡിയോ:
നായിക കഥപാത്രമായി എത്തുന്ന പ്രിയങ്ക മോഹൻ ഈ ചിത്രത്തിൽ ചാരുലത എന്ന് പേരുള്ള ഒരു നിഷ്കളങ്കയായ പോലീസ് കഥാപാത്രമായാണ് പ്രത്യക്ഷപ്പെടുന്നത്. സൂപ്പർ ഹിറ്റായ ഗ്യാങ് ലീഡറിന് ശേഷം വീണ്ടും നാനി – പ്രിയങ്ക മോഹൻ ടീം വീണ്ടും ഈ ചിത്രത്തിലൂടെ ഒന്നിക്കുകയാണ്. ത്രില്ലടിപ്പിക്കുന്ന ഒരു ആക്ഷൻ- അഡ്വെഞ്ചർ ചിത്രമായാണ് വിവേക് ആത്രേയ സൂര്യാസ് സാറ്റർഡേ ഒരുക്കുന്നത്.
ഡിവിവി ദാനയ്യ, കല്യാൺ ദസരി എന്നിവർ ചേർന്ന് ഡിവിവി എന്റെർറ്റൈന്മെന്റിന്റെ ബാനറിൽ നിർമ്മിക്കുന്ന ഈ ബിഗ് ബഡ്ജറ്റ് ചിത്രത്തിലെ മറ്റൊരു നിർണ്ണായക കഥാപാത്രത്തിന് ജീവൻ പകരുന്നത് സായ് കുമാർ ആണ്. മുരളി ജി കാമറ ചലിപ്പിക്കുന്ന ഈ ചിത്രത്തിന് സംഗീതമൊരുക്കുന്നത് മലയാളിയായ ജേക്സ് ബിജോയ് ആണ്. കാർത്തിക ശ്രീനിവാസ് എഡിറ്റിങ് നിർവഹിക്കുന്ന ഈ ചിത്രം തെലുങ്ക്, കന്നഡ, മലയാളം, തമിഴ്, ഹിന്ദി ഭാഷകളിലായി ഈ വർഷം ഓഗസ്റ്റ് 29- ന് റിലീസ് ചെയ്യും. ഇപ്പോൾ അവസാന ഘട്ട ചിത്രീകരണം നടക്കുന്ന ഈ ചിത്രത്തിന് വേണ്ടി സംഘട്ടന സംവിധാനം നിർവഹിക്കുന്നത് റാം- ലക്ഷ്മൺ ടീമാണ്. പിആർഒ ശബരി.
