വലിയ പ്രതീക്ഷ നല്കുന്ന കൂട്ടുകെട്ട്; ഭ്രമയുഗം ടീമിനൊപ്പം പ്രണവ് മോഹൻലാൽ, ഹൊറർ ത്രില്ലറിൻ്റെ ചിത്രീകരണം ആരംഭിച്ചു…
ഹൊറർ ത്രില്ലർ ചിത്രങ്ങൾ മാത്രം നിർമിക്കുന്ന നൈറ്റ് ഷിഫ്റ്റ് സ്റ്റുഡിയോസിന്റെ രണ്ടാം നിർമ്മാണ സംരംഭമായ NSS2 വിന്റെ ചിത്രീകരണം ആരംഭിച്ചു. മമ്മൂട്ടി പ്രധാന വേഷത്തിൽ എത്തിയ, പ്രേക്ഷക- നിരൂപക പ്രശംസ നേടിയ ബ്ലാക്ക് ആൻഡ് വൈറ്റ് ബ്ലോക്ക്ബസ്റ്റർ ചലച്ചിത്രം ഭ്രമയുഗത്തിനു ശേഷം നൈറ്റ് ഷിഫ്റ്റ് സ്റ്റുഡിയോസ് നിർമ്മിച്ച് രാഹുൽ സംവിധാനം ചെയ്യുന്ന ചിത്രത്തിൽ പ്രണവ് മോഹൻലാൽ നായക വേഷത്തിൽ എത്തും.
ഹൊറർ ത്രില്ലർ ചിത്രങ്ങൾ മാത്രം നിർമിക്കുന്നതിനായി 2021 ൽ ചക്രവർത്തി രാമചന്ദ്രൻ തുടക്കം കുറിച്ച നൈറ്റ് ഷിഫ്റ്റ് സ്റ്റുഡിയോസ് ഭ്രമയുഗത്തിലൂടെ ഈ മേഖലയിൽ തങ്ങളുടെ സ്ഥാനം ഉറപ്പിച്ചു. ഭ്രമയുഗത്തിന്റെ വിജയത്തിന് ശേഷം രാഹുൽ സദാശിവനുമായി വീണ്ടും കൈകോർക്കുമ്പോൾ പ്രേക്ഷകർക്ക് മറ്റൊരു മികച്ച സിനിമ അനുഭവം നൽകാൻ കഴിയുമെന്ന പ്രതീക്ഷയിലാണ് അണിയറ പ്രവർത്തകർ. അതിന്റെ തുടർച്ചയായാണ് സംവിധായകൻ രാഹുൽ സദാശിവനുമായി വീണ്ടും കൈകോർക്കുന്നതും, പ്രണവ് മോഹൻലാലുമായി തങ്ങളുടെ പുതിയ ചിത്രം ഒരുക്കുന്നതും.
രാഹുൽ സദാശിവനുമായി വീണ്ടും ഒന്നിക്കുന്നതിൽ തങ്ങൾ ഏറെ ആവേശഭരിതരാണെന്നും ഭ്രമയുഗത്തിന്റെ മികച്ച ടീമിനൊപ്പം ചേർന്ന് മറ്റൊരു അമ്പരപ്പിക്കുന്ന കഥക്ക് ജീവൻ പകരാനുള്ള ശ്രമത്തിലാണെന്നും നിർമ്മാതാക്കളായ ചക്രവർത്തി രാമചന്ദ്ര, എസ് ശശികാന്ത് എന്നിവർ പറഞ്ഞു. ഹൊറർ ത്രില്ലർ എന്ന വിഭാഗത്തിന്റെ സാദ്ധ്യതകൾ കൂടുതൽ ഉപയോഗിക്കുന്നതും പ്രണവ് മോഹൻലാൽ എന്ന നടന്റെ കഴിവിനെ ഇതുവരെ കാണാത്ത രീതിയിൽ അവതരിപ്പിക്കുന്നതുമായിരിക്കും ഈ ചിത്രമെന്നും അവർ കൂട്ടിച്ചേർത്തു.
തന്റെ ആശയങ്ങളെ പൂർണ്ണമായും പിന്തുണക്കുന്ന ഈ നിർമ്മാതാക്കൾക്കൊപ്പം വീണ്ടും ജോലി ചെയ്യുന്നത് ആവേശകരമാണെന്നും, ഭ്രമയുഗം ഒരിക്കലും മറക്കാനാവാത്ത ഒരു യാത്രയായിരുന്നു സമ്മാനിച്ചതെന്നും ചിത്രം രചിച്ചു സംവിധാനം ചെയ്യുന്ന രാഹുൽ സദാശിവൻ പറഞ്ഞു. പ്രണവ് മോഹൻലാലിനൊപ്പം ജോലി ചെയ്യുന്നത് അതിഗംഭീരമായ ഒരനുഭവമാണെന്നും, NSS2 എന്ന ചിത്രത്തിലൂടെ ലോകമെമ്പാടുമുള്ള പ്രേക്ഷകർക്ക് മുന്നിലേക്ക് മറ്റൊരു അപൂർവ സിനിമാനുഭവം എത്തിക്കാനുള്ള ശ്രമത്തിലാണ് തങ്ങളെന്നും അദ്ദേഹം പ്രതീക്ഷ പ്രകടിപ്പിച്ചു.
ചിത്രത്തിന്റെ മറ്റ് അണിയറ പ്രവർത്തകർ: ഛായാഗ്രഹണം: ഷെഹ്നാദ് ജലാൽ നിർവഹിക്കുന്നു. കലാസംവിധാനം: ജോതിഷ് ശങ്കർ ചെയ്യുന്നു. എഡിറ്റർ: ഷഫീഖ് മുഹമ്മദ് അലിയാണ്. ശബ്ദ സംവിധാനം: ജയദേവൻ ചക്കാടത്ത്, ശബ്ദ മിശ്രണം: രാജാകൃഷ്ണൻ എം.ആർ, മേക്കപ്പ്: റോണക്സ് സേവ്യർ, വസ്ത്രാലങ്കാരം: മെൽവി ജെ, സ്റ്റണ്ട്സ്: കാലൈ കിംഗ്സൺ, പബ്ലിസിറ്റി ഡിസൈനർ: എസ്തറ്റിക് കുഞ്ഞമ്മ, വിഎഫ്എക്സ്: ഡിജിബ്രിക്സ് വിഎഫ്എക്സ്, ഡിഐ: രംഗ്രേയ്സ് മീഡിയ, പ്രൊഡക്ഷൻ കൺട്രോളർ: അരോമ മോഹൻ എന്നിവരാണ്.
ജൂൺ 2025 വരെ ഈ ചിത്രത്തിന്റെ ചിത്രീകരണം തുടരും. 2025 ന്റെ അവസാന പാദത്തിൽ ചിത്രം തീയേറ്ററുകളിലെത്തിക്കാനുള്ള തയ്യാറെടുപ്പിലാണ് അണിയറ പ്രവർത്തകർ. പിആർഒ – ശബരി.
