മമ്മൂട്ടിയുടെ കുഞ്ഞാലി മരക്കാർ ജൂലൈയിൽ ചിത്രീകരണം തുടങ്ങും: നിർമ്മാതാവ് ഷാജി നടേശൻ
മലയാളത്തിൽ രണ്ടു കുഞ്ഞാലി മരക്കാർ ചിത്രങ്ങൾ ആണ് പരിഗണനയിൽ ഉള്ളത്. പ്രിയദർശൻ മോഹൻലാൽ ടീമിന്റെ കുഞ്ഞാലി മരക്കാരും ഓഗസ്റ്റ് സിനിമ നിർമ്മിക്കുന്ന മമ്മൂട്ടി – സന്തോഷ് ശിവൻ – ശങ്കർ രാമകൃഷ്ണൻ ടീമിന്റെ കുഞ്ഞാലി മരക്കാരും. മമ്മൂട്ടിയുടെ കുഞ്ഞാലി മരക്കാർ പ്രഖ്യാപനം കഴിഞ്ഞ കേരള പിറവി ദിനത്തിൽ നടന്നിരുന്നു. പിന്നീട് ചിത്രത്തിനെ പറ്റി അധികം വിവരങ്ങൾ ഒന്നും പുറത്തുവന്നില്ല. ഇപ്പോൾ മോഹൻലാൽ ചിത്രം വരുന്നു എന്ന സൂചനകൾ ഗായകൻ എം ജി ശ്രീകുമാർ നൽകിയതിന്റെ പിന്നാലെ ഷാജി നടേശൻ തന്റെ ഫേസ്ബുക് പേജിൽ തങ്ങളുടെ കുഞ്ഞാലി മരക്കാരിന്റെ വിവരങ്ങൾ പുറത്തു വിട്ടിരിക്കുക ആണ്.
പ്രീ പ്രൊഡക്ഷൻ ജോലികൾ മികച്ച രീതിയിൽ മുന്നോട്ടു പോകുക ആണെന്നും ജൂലൈയിൽ ചിത്രത്തിന്റെ ചിത്രീകരണം ആരംഭിക്കും എന്നും ഷാജി നടേശൻ വ്യക്തമാക്കി. മമ്മൂട്ടിയും ഷാജി നടേശനും സന്തോഷ് ശിവനും ശങ്കർ രാമകൃഷ്ണനും ഒരുമിച്ചുള്ള ചിത്രം പങ്കുവെച്ചു കൊണ്ടാണ് ഷാജി നടേശന്റെ ഫേസ്ബുക് കുറിപ്പ്.
ടി പി രാജീവനും ശങ്കർ രാമകൃഷ്ണനും ചേർന്ന് തിരക്കഥ ഒരുക്കുന്ന മമ്മൂട്ടിയുടെ കുഞ്ഞാലി മരക്കാർ സന്തോഷ് ശിവൻ ആണ് സംവിധാനം ചെയ്യുന്നത്. അതെ സമയം ഏഴു മാസത്തോളം മണിരത്‌നത്തിന്റെ മൾട്ടിസ്റ്റാർ ചിത്രത്തിന്റെ തിരക്കിൽ ആണ് സന്തോഷ് ശിവൻ എന്നും റിപ്പോർട്ടുകൾ ഉണ്ട്. മൂൺഷോട്ട് എന്റർടൈൻമെന്റിന്റെ ബാനറിൽ സന്തോഷ് ടി കുരുവിള ആണ് മോഹൻലാലിൻറെ കുഞ്ഞാലി മരക്കാർ നിർമ്മിക്കുന്നത്. ഒക്ടോബറിൽ ഈ ചിത്രത്തിന്റെ ഷൂട്ടിങ് തുടങ്ങും എന്നാണ് മുൻപ് നിർമ്മാതാവ് അറിയിച്ചിരുന്നത്.
