800 കോടിയും കടന്ന് ‘കൽക്കി 2898 എഡി’; രണ്ടാംവാരം കേരളത്തിൽ 350 തിയറ്ററുകളിൽ പ്രദർശനം…
നിരൂപക പ്രശംസകളും പ്രേക്ഷക പ്രീതിയും ഒരേപോലെ നേടിയ ബ്രഹ്മാണ്ഡ ചിത്രം ‘കൽക്കി 2898 എഡി’യുടെ തിയേറ്റർ റൺ രണ്ടാംവാരത്തിലേക്ക് കടക്കുകയാണ്. പ്രഭാസ്-നാഗ് അശ്വിൻ ടീമിന്റെ ഈ പാൻ ഇന്ത്യൻ ബ്ലോക്ക് ബസ്റ്റർ ചിത്രം ആദ്യവാരത്തിൽ 800 കോടി ഗ്രോസ് കളക്ഷൻ ആണ് ആഗോള ബോക്സ് ഓഫീസിൽ നിന്ന് നേടിയിരിക്കുന്നത്. വൈജയന്തി മൂവീസിന്റെ ബാനറിൽ സി അശ്വിനി ദത്ത് നിർമ്മിച്ച ചിത്രം കേരളത്തിൽ നിന്നും നേടിയത് 20 കോടിയാണ്.
വേഫറർ ഫിലിംസ് കേരളത്തിൽ വിതരണത്തിനെത്തിച്ച ചിത്രം മികച്ച പ്രതികരണങ്ങളോടെ പ്രദർശനം തുടരുന്നത് 350 തിയറ്ററുകളിലായാണ്. ഹരം കൊള്ളിക്കുന്ന സൗണ്ട് ട്രാക്കും തീ പാറുന്ന ആക്ഷൻ രംഗങ്ങളും ഉൾപ്പെടുത്തി ദൃശ്യാവിഷ്കരിച്ച ചിത്രം സമാനതകളില്ലാത്ത തിയറ്റർ എക്സ്പീരിയൻസാണ് സമ്മാനിക്കുന്നത്.
ഇന്ത്യൻ മിത്തോളജിയിൽ പുരാണങ്ങളിൽ നിന്ന് പ്രചോദനം ഉൾക്കൊണ്ട് രൂപപ്പെട്ട ഒരു ഭാവിയിൽ സജ്ജീകരിച്ചിരിക്കുന്ന ചിത്രം ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളിലൂടെയുള്ള കഥ പറയുന്നു. ഇതിഹാസമായ മഹാഭാരതം മുതൽ എ ഡി 2898 വരെ സഹസ്രാബ്ദങ്ങൾ നീണ്ടുനിൽക്കുന്ന യാത്രയാണ് ചിത്രം ദൃശ്യാവിഷ്കരിച്ചിരിക്കുന്നത്. മെഗാസ്റ്റാർ അമിതാഭ് ബച്ചൻ, ഉലഗനായകൻ കമൽ ഹാസൻ, ദീപിക പദുക്കോൺ, ദിഷാ പടാനി, വിജയ് ദേവരകൊണ്ട, ദുൽഖർ സൽമാൻ തുടങ്ങിയ നിരവധി താരങ്ങൾ ചിത്രത്തിൽ അണിനിരക്കുന്നു. പിആർഒ: ശബരി.
