മെഗാസ്റ്റാർ മമ്മൂട്ടിയുടെ ‘കാതൽ’ പൂർത്തിയായി; ചിത്രം ഇനി പോസ്റ്റ് പ്രോഡക്ഷനിലേക്ക്…
കരിയറിലെ ഏറ്റവും മികച്ച ഘട്ടത്തിലൂടെ ആണ് മലയാളത്തിന്റെ മെഗാസ്റ്റാർ മമ്മൂട്ടി കടന്ന് പോകുന്നത്. നിരൂപക പ്രശംസകളും ബോക്സ് ഓഫീസ് വിജയങ്ങളും ഒരേ പോലെ നേടുന്ന മമ്മൂട്ടി ചിത്രങ്ങൾ ആണ് അദ്ദേഹം പ്രേക്ഷകർക്ക് സമ്മാനിക്കുന്നത്. മമ്മൂട്ടിയുടെ വരാനിരിക്കുന്ന ചിത്രങ്ങളും പ്രേക്ഷകർക്ക് പ്രതീക്ഷയുള്ളവ ആണ്. ദി ഗ്രേയ്റ്റ് ഇന്ത്യൻ കിച്ചൻ എന്ന ചിത്രം സംവിധാനം ചെയ്ത ജിയോ ബേബി ഒരുക്കുന്ന ‘കാതൽ ദി കോർ’ ആണ് പ്രേക്ഷകർ കാത്തിരിക്കുന്ന ഒരു ചിത്രം. ഈ ചിത്രത്തിന്റെ ഏറ്റവും പുതിയ അപ്‌ഡേറ്റ് ഇപ്പോൾ പുറത്തുവന്നിരിക്കുക ആണ്. ചിത്രത്തിന്റെ ഷൂട്ടിംഗ് പൂർത്തിയായ വിവരമാണ് പുറത്തുവരുന്നത്. കഴിഞ്ഞ വെള്ളിയാഴ്ച (നവംബർ 18ന്) തന്നെ മമ്മൂട്ടി അദ്ദേഹത്തിന്റെ ഭാഗങ്ങൾ പൂർത്തിയാക്കിയിരുന്നു. ഇപ്പോൾ ചിത്രീകരണം പൂർത്തിയാക്കി പാക്കപ്പ് പറഞ്ഞിരിക്കുക ആണ് സംവിധായകൻ ജിയോ ബേബി.
തെന്നിന്ത്യൻ നായിക ജ്യോതിക മമ്മൂട്ടിയുടെ നായിക ആവുക ആണ് ഈ ചിത്രത്തിലൂടെ. ഇരുവരും പ്രത്യക്ഷപ്പെട്ട ചിത്രത്തിന്റെ ഫസ്റ്റ് ലുക്ക് പോസ്റ്റർ ശ്രദ്ധ നേടിയിരുന്നു. കാതൽ സിനിമയുടെ ലൊക്കേഷനിൽ ജ്യോതികയുടെ ഭർത്താവും സൂപ്പർതാരവുമായ സൂര്യ സന്ദർശിച്ചതും വാർത്തകളിൽ നിറഞ്ഞിരുന്നു. മാത്യു ദേവസി എന്ന രാഷ്ട്രീയ നേതാവ് ആയി ആണ് മമ്മൂട്ടി ഈ ചിത്രത്തിൽ അഭിനയിക്കുന്നത് എന്ന സൂചന ലൊക്കേഷനിൽ നിന്ന് പുറത്തുവന്ന ഒരു ചിത്രത്തിൽ നിന്ന് ലഭിച്ചിരുന്നു. ജ്യോതിക ഈ കഥാപാത്രത്തിന്റെ ഭാര്യാ വേഷത്തിൽ ആണ് എത്തുന്നത്. ലാലു അലക്സ്, മുത്തുമണി, ചിന്നു ചാന്ദിനി, സുധി കോപ്പ തുടങ്ങിയവർ ആണ് ചിത്രത്തിലെ മറ്റ് താരങ്ങൾ. മമ്മൂട്ടി കമ്പനി നിർമ്മിക്കുന്ന ചിത്രം ദുൽഖർ സൽമാന്റെ വെഫെറർ ഫിലിംസ് ആണ് തിയേറ്ററുകളിൽ എത്തിക്കുന്നത്.
