മലയാളത്തിലെ ഏറ്റവും വലിയ ചിത്രത്തിന്‍റെ പ്രഖ്യാപനം ഉടൻ; നായകൻ മോഹൻലാലോ മമ്മൂട്ടിയോ?
മലയാള സിനിമയിലെ ഏറ്റവും വലിയ ചിത്രം ഒരുങ്ങാൻ പോകുന്നു. ഈ ചിത്രത്തിന്‍റെ ഔദ്യോഗിക പ്രഖ്യാപനം ഇന്ന് വൈകുന്നേരം നാലരക്ക് ഉണ്ടാകും എന്ന് കോൺഫിഡന്റ് ഗ്രൂപ്പ് ചെയർമാൻ ഡോക്ടർ സി ജെ റോയ് തന്‍റെ ഫേസ്ബുക് പേജിലൂടെ അറിയിച്ചു.
ഈ വാർത്ത വന്നതോട് കൂടി സിനിമാ പ്രേമികളും ആരാധകരും ആകാംക്ഷയിലാണ്. ആരായിരിക്കും ഈ ചിത്രത്തിലെ നായകൻ എന്നതാണ് ഇപ്പോൾ സോഷ്യൽ മീഡിയയിലെ പ്രധാന ചർച്ചാ വിഷയം. മോഹൻലാൽ ആണോ മമ്മൂട്ടി ആണോ അതോ വേറെ ഏതെങ്കിലും യുവതാരം ആണോ ഈ ചിത്രത്തിലെ നായകൻ എന്നുള്ള ചർച്ചയിൽ ആണ് സിനിമാ പ്രേമികൾ.
സ്ഥിതീകരിക്കാത്ത റിപ്പോർട്ടുകൾ പ്രകാരം സി ജെ റോയ് – ആന്റണി പെരുമ്പാവൂർ എന്നിവർ ചേർന്ന് നിർമ്മിക്കാൻ പോകുന്ന ഒരു മോഹൻലാൽ ചിത്രമാവാൻ സാധ്യത ഈ പ്രൊജക്റ്റിന് കല്‍പ്പിക്കുന്നുണ്ട്. പ്രിയദർശൻ – മോഹൻലാൽ ടീം കുഞ്ഞാലി മരക്കാർ എന്ന ബിഗ് ബജറ്റ് ചിത്രം പ്ലാൻ ചെയ്യുന്നു എന്ന വാർത്തകൾ സജീവമായതിനാല്‍ തന്നെ ആ പ്രൊജക്റ്റ് ആവുമോ ഇതെന്നാണ് ആരാധകർക്കിടയിൽ ചർച്ച. ഏതായാലും ഒരു വലിയ സർപ്രൈസിന് ഒരുങ്ങി തന്നെയാണ് ആരാധകർ ഇരിക്കുന്നത്.
മലയാളത്തിലെ ഇതുവരെയുള്ള ഏറ്റവും വലിയ ചിത്രം മോഹൻലാൽ നായകനായ ഒടിയൻ, മമ്മൂട്ടി നായകനായ മാമാങ്കം എന്നിവയാണ്. ആട് ജീവിതവും കാളിയനും ഒക്കെ ബിഗ് ബഡ്ജറ്റിൽ തന്നെയാണ് ഒരുങ്ങുന്നത്. എന്നാൽ ഈ ചിത്രങ്ങൾ റിലീസ് ആവാതെ ഇതിന്‍റെ ബജറ്റ് എത്രയെന്നു പറയാനും ആവില്ല. എങ്കിലും മോഹൻലാൽ – ശ്രീകുമാർ മേനോൻ – ആശിർവാദ് ചിത്രമായ ഒടിയൻ ആണ് ഇപ്പോൾ മലയാളത്തിലെ ഏറ്റവും വലിയ ചിത്രം എന്നാണ് റിപ്പോർട്ടുകൾ പറയുന്നത്. ഇതിനെയും മറികടക്കുന്ന ഒരു പ്രൊജക്റ്റ് ആയിരിക്കും ഇന്ന് പ്രഖ്യാപിക്കാൻ പോകുന്ന പുതിയ ചിത്രമെന്നാണ് സൂചന.
