മലയാള പുരസ്കാരം 1201: മോഹൻലാൽ മികച്ച നടൻ, സിബി മലയിലിന് പ്രത്യേക ആദരവ്
മലയാള സിനിമ, സാഹിത്യ, സാംസ്കാരിക രംഗത്തെ പ്രതിഭകളെ ആദരിക്കുന്ന മലയാള പുരസ്കാര സമിതിയുടെ പത്താമത് മലയാള പുരസ്കാരം 1201 പ്രഖ്യാപിച്ചു. ‘തുടരും’ എന്ന ചിത്രത്തിലെ അഭിനയത്തിന് നടൻ മോഹൻലാൽ മികച്ച നടനുള്ള പുരസ്കാരത്തിന് അർഹനായി. ചലച്ചിത്ര സംവിധാന രംഗത്ത് നാല് പതിറ്റാണ്ട് പൂർത്തിയാക്കിയതിന്റെ ഭാഗമായി മുതിർന്ന സംവിധായകൻ സിബി മലയിലിന് സമഗ്ര സംഭാവനയ്ക്കുള്ള പ്രത്യേക ആദരവും ലഭിച്ചു.
‘പണി’ എന്ന ചിത്രത്തിലെ പ്രകടനത്തിന് അഭിനയ എം.ജി. മികച്ച നടിയായി തിരഞ്ഞെടുക്കപ്പെട്ടു. ‘റോന്ത്’ എന്ന ചിത്രം സംവിധാനം ചെയ്ത ഷാഹി കബീറാണ് മികച്ച സംവിധായകൻ. തോമസ് സെബാസ്റ്റ്യൻ, കവിപ്രസാദ് ഗോപിനാഥ് എന്നിവർ ചേർന്ന് ഒരുക്കിയ ‘അം അഃ’ മികച്ച ചിത്രത്തിനുള്ള പുരസ്കാരം നേടിയപ്പോൾ, രഞ്ജിത്ത് രജപുത്രയും തരുൺ മൂർത്തിയും നിർമ്മിച്ച മോഹൻലാൽ ചിത്രം ‘തുടരും’ മികച്ച ജനപ്രീതി നേടിയ സിനിമയായി.
സിനിമാ മേഖലയിലെ സമഗ്ര സംഭാവനകൾ പരിഗണിച്ച് നടി കാർത്തിക, നടൻ വി.കെ. ശ്രീരാമൻ, നാടക-ചലച്ചിത്ര പ്രവർത്തകൻ ജയപ്രകാശ് കുളൂർ എന്നിവർക്ക് പുരസ്കാരം ലഭിച്ചു. കൂടാതെ, സിനിമയിലും നാടകരംഗത്തുമായി മുപ്പത് വർഷം പൂർത്തിയാക്കിയ നടൻ അപ്പുണ്ണി ശശിയെ പ്രത്യേക പുരസ്കാരം നൽകി ആദരിക്കും. ‘ഡിറ്റക്റ്റീവ് ഉജ്ജ്വലൻ’ എന്ന ചിത്രത്തിലെ പ്രകടനത്തിന് കോട്ടയം നസീർ മികച്ച സഹനടനായും ‘വ്യസനസമേതം ബന്ധുമിത്രാദികൾ’ എന്ന ചിത്രത്തിലെ അഭിനയത്തിന് അശ്വതി ചന്ദ് കിഷോർ മികച്ച സഹനടിയായും തിരഞ്ഞെടുക്കപ്പെട്ടു.
അന്തരിച്ച നടൻ കലാഭവൻ നവാസിന് ‘ഇഴ’ എന്ന ചിത്രത്തിലെ അഭിനയത്തിനും, എഡിറ്റർ നിഷാദ് യൂസഫിന് ‘തുടരും’ എന്ന ചിത്രത്തിന്റെ എഡിറ്റിംഗിനും മരണാനന്തര ബഹുമതി നൽകി ആദരിക്കും. ഗോകുൽ സുരേഷ് (‘ഡൊമിനിക്’, ‘സുമതി വളവ്’ എന്നീ ചിത്രങ്ങളിലെ അഭിനയത്തിന്), ചന്തു സലിംകുമാർ (‘പൈങ്കിളി’), പ്രണവ് ടിയോഫിൻ (‘നരിവേട്ട’), നിരഞ്ജന അനൂപ് (‘പടക്കളം’), അഞ്ജലി സത്യനാഥ് (‘എന്ന് സ്വന്തം പുണ്യാളൻ’), ഐശ്വര്യ മിഥുൻ (‘പൊറാട്ടുനാടകം’), ഉണ്ണിമായ നാലാപാടം (‘പരിവാർ’, ‘ധീരൻ’) എന്നിവർക്കാണ് പ്രത്യേക പുരസ്കാരങ്ങൾ. ‘ധീരൻ’ എന്ന ചിത്രത്തിന് ഹരികൃഷ്ണൻ ലോഹിതദാസ് മികച്ച ഛായാഗ്രാഹകനായി.
സിനിമയുമായി ബന്ധപ്പെട്ട മറ്റു മേഖലകളിലും പുരസ്കാരങ്ങൾ പ്രഖ്യാപിച്ചു. സിനിമാ പി.ആർ.ഒ. രംഗത്ത് 28 വർഷം പൂർത്തിയാക്കിയ എ.എസ്. ദിനേശിന് പ്രത്യേക ആദരവ് ലഭിച്ചു. സാഹിത്യം, മാധ്യമപ്രവർത്തനം, സോഷ്യൽ മീഡിയ, നൃത്തം, സംഗീതം തുടങ്ങിയ വിവിധ മേഖലകളിലെ പ്രതിഭകൾക്കും പുരസ്കാരങ്ങളുണ്ട്.
മലയാള പുരസ്കാര സമിതി അധ്യക്ഷൻ ജി.കെ. പിള്ള തെക്കേടത്തിന്റെ നേതൃത്വത്തിൽ ഇസ്മായിൽ കൊട്ടാരപ്പാട്ട്, റഹീം മുല്ല വീട്ടിൽ, രമ്യ പ്രശാന്ത്, ശ്രീകല സി.പി എന്നിവർ പത്രസമ്മേളനത്തിലാണ് പുരസ്കാരങ്ങൾ പ്രഖ്യാപിച്ചത്. അവാർഡ് ദാന ചടങ്ങ് ഒക്ടോബർ അവസാനവാരം നടക്കും.
മറ്റ് പ്രധാന പുരസ്കാര ജേതാക്കൾ:
- മികച്ച പുതുമുഖ നടൻ: പ്രകാശ് വർമ്മ (ചിത്രം: തുടരും)
- മികച്ച ചലച്ചിത്ര നിർമ്മാതാക്കൾ: ആൻ സരിക, ശങ്കർദാസ് (ചിത്രം: അഭിലാഷം)
- സാമൂഹ്യ പ്രതിബദ്ധതയുള്ള ചിത്രം: നരിവേട്ട (സംവിധാനം: അനുരാജ് മനോഹർ, ടിപ്പു ഷാൻ)
- ബഹുമുഖ പ്രതിഭ: ഐശ്വര്യ സുജിത്ത്
- ഗാനരചയിതാവ്: ഹ്യൂമൻ സിദ്ദീഖ് (മശിപ്പച്ചയും കല്ലു പെൻസിലും)
- ഗാനാലാപനം: ജെയ്സി ശ്രീഹരി
- ഡിജിറ്റൽ പി.ആർ.ഒ: ഐശ്വര്യ രാജ്
- പ്രൊഡക്ഷൻ കൺട്രോളർ: ഗിരീഷ് കൊടുങ്ങല്ലൂർ, അനീഷ് പെരുമ്പിലാവ്
- പരസ്യകല: പ്രതുൽ എൻ. ടി (മണിച്ചിത്രത്താഴ് 4k)
- ബാലതാരങ്ങൾ: നീരജ് കൃഷ്ണ (ഓർമ്മച്ചിത്രം), ആൽബിൻ മുകുന്ദ് (ഗു), നിഹാര അഞ്ജു നിജോ (അം അഃ)
- സാഹിത്യം: ഡോ. ജയപ്രകാശ് ശർമ (വൈജ്ഞാനികം), സെബു വി. വി. (സഞ്ചാര സാഹിത്യം), ബാബു അബ്രഹാം (നോവൽ), അശോകൻ മേയ്ക്കാട് (ഹാസ്യം), സരിത എൻ. എസ്. (ഖണ്ഡകാവ്യം), മൈസൂന ഹാനി (കഥാസമാഹാരം), ഷാഹിന കെ. റഫീഖ് (ബാലനോവൽ), രേഷ്മ ജോൺസൺ (കവിത)
- മാധ്യമം: അഭിലാഷ് മോഹനൻ (ഡെപ്യൂട്ടി എഡിറ്റർ, മാതൃഭൂമി ന്യൂസ്), നൂർജഹാൻ എസ്. (അവതാരക, കേരളകൗമുദി), മൈക്കിൾ വർഗ്ഗീസ് ചെങ്ങാടക്കരി (ലേഖകൻ, കേരള ശബ്ദം)
- കലാ സാംസ്കാരികം: വി. വസന്ത കുമാർ സാംബശിവൻ (കഥാപ്രസംഗം), രാജീവ് കൃഷ്ണ മാങ്കൊമ്പ് (സോപാന നൃത്തം), കുമാർജി പാലത്ത് (നാടകം), സതി ആർ.വി. (സാംസ്കാരികം), കെ.ജെ. തോമസ്, സുബൈർ കോഴിക്കോട് (പ്രവർത്തകർ)
- പ്രത്യേക പുരസ്കാരങ്ങൾ: പുളിയനം പൗലോസ് (മരണമാസ്), ഫിദ അഷറഫ് (ട്രാവൽ ഫോട്ടോഗ്രാഫർ), വി. ടി. അശോക് ഗുരുവായൂർ (ഓടക്കുഴൽ), റിയാ തമ്പി (മണ്ടാല ആർട്ട്), ശരണ്യ എസ്. ആർ (നർത്തകി), സെലീന വി. (ചമയം), ബേബി കാശ്വി ഋഷി & ജാൻവി ഋഷി (സോഷ്യൽ മീഡിയ), ബേബി ജാൻവി ഷാനോജ് (ബാലപ്രതിഭ)
- മലയാളമങ്ക: അഫ്രിൻ ഫാത്തിമ, എലിസബത്ത് ജോയ്, അൽഫോൻസ ജോയ്, അഞ്ജലി കൃഷ്ണ
