കേട്ടത് അഭ്യൂഹങ്ങൾ ആയിരുന്നില്ല, ‘മാർക്കോ 2’ വില്ലൻ ചിയാൻ വിക്രം? നിർമ്മാതാവിനൊപ്പം വിക്രമും മകൻ ദ്രുവും, ചിത്രങ്ങൾ വൈറൽ…
പാൻ ഇന്ത്യൻ തലത്തിൽ വൻ തരംഗമായ ഉണ്ണി മുകുന്ദൻ ചിത്രം ‘മാർക്കോ’യുടെ രണ്ടാം ഭാഗത്തിൽ തമിഴ് സൂപ്പർതാരം ചിയാൻ വിക്രം വില്ലനായെത്തുന്ന രീതിയിലുള്ള അഭ്യൂഹങ്ങള്‍ പുറത്തുവന്നിരുന്നു. ഇപ്പോളിതാ ഈ റിപ്പോർട്ടുകൾക്ക് ആക്കം കൂട്ടിക്കൊണ്ട് വിക്രമിനൊപ്പമുള്ള ഒരു ചിത്രം ഇൻസ്റ്റഗ്രാമിൽ പങ്കുവെച്ചിരിക്കുകയാണ് മാർക്കൊയുടെ നിർമ്മാതാവ് ആയ ഷെരീഫ് മുഹമ്മദ്. ‘ചിയാൻ വിക്രമിനോടൊപ്പമുള്ള സന്തോഷകരമായ നിമിഷങ്ങൾ’ എന്ന കാപ്ഷൻ നല്കിയാണ് ഷെരീഫ് ചിത്രം പങ്കുവെച്ചത്. പിന്നാലെ സോഷ്യൽ മീഡിയയിൽ ചൂടുപിടിച്ച ചർച്ചകൾക്ക് ഇത് തുടക്കവും കുറിച്ചു.
ഉണ്ണിയോടൊപ്പം വിക്രവും കൂടി ‘മാർക്കൊ 2’ വിൽ എത്തുകയാണെങ്കിൽ അത് ആരാധകർക്ക് വൻ ട്രീറ്റ് തന്നെ ആകും എന്നതിൽ സംശയമില്ല. അതുകൊണ്ട് തന്നെ വലിയ പ്രതീക്ഷകൾ ആരാധകർ സോഷ്യൽ മീഡിയയിലെ ചർച്ചകളിൽ പങ്കുവെക്കുന്നത്. നിർമ്മാതാവ് പങ്കുവെച്ച മറ്റൊരു ചിത്രത്തിൽ വിക്രമിന്റെ മകൻ ധ്രുവ് വിക്രമും ഉണ്ട്. അതേ സമയം ഹനീഫ് സംവിധാനം ചെയ്ത ചിത്രം മൂന്നാമത്തെ ആഴ്ച പിന്നിടുമ്പോള്‍ മികച്ച കളക്ഷനുമായി എല്ലാ ഭാഷകളിലും നിറഞ്ഞ സദസ്സിൽ കുതിപ്പ് തുടരുകയാണ്. മലയാളത്തിന് പുറമെ ഹിന്ദിയിലും തെലുങ്കിലും ഉള്‍പ്പെടെ വലിയ സ്വീകാര്യതയാണ് ചിത്രത്തിന് ലഭിച്ചുകൊണ്ടിരിക്കുന്നത്.
ക്യൂബ്‌സ് എന്‍റർടെയ്ൻമെന്‍റ്സിന്‍റെ ബാനറിൽ ഷെരീഫ് മുഹമ്മദ് നിർമ്മിച്ച ചിത്രം ‘ബാഹുബലി’ക്ക് ശേഷം കൊറിയയിൽ റിലീസ് ചെയ്യുന്ന ആദ്യ ദക്ഷിണേന്ത്യൻ ചിത്രമെന്ന നേട്ടം സ്വന്തമാക്കാൻ ഒരുങ്ങുകയാണ്. ഏപ്രിലിലാണ് സിനിമയുടെ കൊറിയൻ റിലീസ്. നൂറോളം തിയേറ്ററുകളിലാണ് ചിത്രം കൊറിയയിൽ എത്തുന്നത്. ഉണ്ണി മുകുന്ദനോടൊപ്പം സിദ്ദീഖ്, ജഗദീഷ്, ആൻസൺ പോൾ, കബീർ ദുഹാൻസിംഗ് (ടർബോ ഫെയിം), അഭിമന്യു തിലകൻ, യുക്തി തരേജ തുടങ്ങിയവരും ഒട്ടേറെ ബോളിവുഡ് താരങ്ങളും പുതുമുഖ താരങ്ങളും അണിനിരക്കുന്ന ചിത്രം മലയാളത്തിലെ തന്നെ ഏറ്റവും വലിയ മാസ്സീവ്-വയലൻസ് ചിത്രം എന്ന ലേബലോടെയാണ് എത്തിയത്. ആ പ്രതീക്ഷ നൂറുശതമാനം ചിത്രം നിറവേറ്റിയിട്ടുണ്ടെന്നാണ് പ്രേക്ഷകരുടെയും നിരൂപകരുടെയും അഭിപ്രായങ്ങൾ.
ചിത്രത്തിന്‍റെ ഛായാഗ്രഹണം: ചന്ദ്രു സെൽവരാജ്, ചിത്രസംയോജനം: ഷമീർ മുഹമ്മദ്, സൗണ്ട് ഡിസൈൻ: സപ്ത റെക്കോർഡ്സ്, ഓഡിയോഗ്രഫി: രാജകൃഷ്ണൻ എം ആർ, കലാസംവിധാനം: സുനിൽ ദാസ്, മേക്കപ്പ്: സുധി സുരേന്ദ്രൻ, കോസ്റ്റ്യും&ഡിസൈൻ: ധന്യാ ബാലകൃഷ്ണൻ, പ്രൊഡക്ഷൻ ചീഫ് അസ്സോസ്സിയേറ്റ് ഡയറക്ടർ: സ്യമന്തക് പ്രദീപ്, എക്സിക്യുട്ടീവ് പ്രൊഡ്യൂസർ: അബ്ദുൾ ഗദാഫ്, ജുമാന ഷെരീഫ്, പ്രൊഡക്ഷൻ കൺട്രോളർ: ദീപക് പരമേശ്വരൻ, ഡിജിറ്റൽ മാർക്കറ്റിംഗ്: ഒബ്സ്ക്യൂറ എന്‍റർടെയ്ൻമെന്‍റ്, പ്രൊമോഷൻ കൺസൾട്ടൻ്റ്: വിപിൻ കുമാർ, പിആർഒ: ആതിര ദിൽജിത്ത്.
