ത്രില്ലർ ചിത്രവുമായി വിനീത് ശ്രീനിവാസൻ; മെറിലാൻഡിനൊപ്പം മൂന്നാം ചിത്രം, നോബിൾ ബാബു നായകൻ

ത്രില്ലർ ചിത്രവുമായി വിനീത് ശ്രീനിവാസൻ; മെറിലാൻഡിനൊപ്പം മൂന്നാം ചിത്രം, നോബിൾ ബാബു നായകൻ

ത്രില്ലർ ചിത്രവുമായി പ്രേക്ഷകർക്ക് അരികിലേക്ക് എത്താൻ ഒരുങ്ങുകയാണ് വിനീത് ശ്രീനിവാസൻ. മെറിലാൻഡ് സിനിമാസുമായി സഹകരിച്ചാണ് ഈ ചിത്രം ഒരുങ്ങുന്നത്. ‘ഹൃദയം’, ‘വർഷങ്ങൾക്ക് ശേഷം’ എന്നീ വിജയ ചിത്രങ്ങൾക്ക് ശേഷം വിനീത് ശ്രീനിവാസനും വിശാഖ് സുബ്രഹ്മണ്യവും ചേർന്ന് നിർമ്മിക്കുന്ന ഈ ചിത്രത്തിൽ നോബിൾ ബാബുവാണ് നായകനായെത്തുന്നത്. 2013-ൽ പുറത്തിറങ്ങിയ ‘തിര’യ്ക്ക് ശേഷം വിനീത് സംവിധാനം ചെയ്യുന്ന ത്രില്ലർ ചിത്രം കൂടിയാണിത്.

മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യവും വിനീത് ശ്രീനിവാസന്റെ ‘ഹാബിറ്റ് ഓഫ് ലൈഫ്’ എന്ന പ്രൊഡക്ഷൻ ഹൗസും ചേർന്നാണ് ഈ സിനിമ നിർമ്മിക്കുന്നത്. ‘ആനന്ദം’, ‘ഹെലൻ’ എന്നീ സിനിമകൾക്ക് ശേഷം വിനീത് നിർമ്മാതാവിന്റെ റോളിൽ എത്തുന്ന ചിത്രം കൂടിയാണിത്.

മലയാളത്തിലെ ആദ്യ ക്രൈം ത്രില്ലർ സിനിമയായി 1955-ൽ മെറിലാൻഡ് പുറത്തിറക്കിയ ‘സിഐഡി’ എഴുപത് വർഷം പൂർത്തിയാക്കുന്ന വേളയിലാണ് വീണ്ടും ഒരു ത്രില്ലർ ചിത്രവുമായി മെറിലാൻഡ് എത്തുന്നത് എന്നത് ശ്രദ്ധേയമാണ്. പ്രണയത്തിനും സൗഹൃദത്തിനും കുടുംബബന്ധങ്ങൾക്കും പ്രാധാന്യം നൽകുന്ന ചിത്രങ്ങൾ ഒരുക്കി ശ്രദ്ധേയനായ വിനീത് ശ്രീനിവാസൻ ത്രില്ലർ ജോണറിലേക്ക് ചുവടുമാറ്റുമ്പോൾ പ്രേക്ഷകർ ഏറെ ആകാംഷയിലാണ്.

വൻ ബഡ്ജറ്റിൽ ഒരുങ്ങുന്ന ഈ ചിത്രത്തിന്റെ ഭൂരിഭാഗം ഷൂട്ടിംഗും ജോർജിയയിലും റഷ്യയുടെയും അസർബൈജാന്റെയും അതിർത്തി പ്രദേശങ്ങളിലുമായാണ് പൂർത്തിയാക്കിയത്. 2024 ഏപ്രിൽ മുതൽ ഒരു വർഷത്തോളം സമയമെടുത്താണ് ലൊക്കേഷൻ കണ്ടെത്തുകയും പ്രീ-പ്രൊഡക്ഷൻ ജോലികൾ നടത്തുകയും ചെയ്തത്. ഷിംല, ചണ്ഡീഗഡ് എന്നിവിടങ്ങളിൽ അഞ്ച് ദിവസത്തെ ചിത്രീകരണവും കൊച്ചിയിൽ ഒരു ദിവസത്തെ ഷൂട്ടിംഗും നടന്നിട്ടുണ്ട്.

പൂജ റിലീസായി സെപ്റ്റംബർ 25-ന് തിയേറ്ററുകളിലെത്താനൊരുങ്ങുന്ന ഈ ചിത്രത്തിന്റെ പേര് വരും ദിവസങ്ങളിൽ പുറത്തുവിടും. ജോമോൻ ടി. ജോൺ ഛായാഗ്രഹണം നിർവഹിക്കുന്ന ചിത്രത്തിന് ഷാൻ റഹ്മാനാണ് സംഗീതം നൽകുന്നത്. ‘തട്ടത്തിൻ മറയത്ത്’, ‘തിര’, ‘ജേക്കബിന്റെ സ്വർഗ്ഗരാജ്യം’ എന്നീ ചിത്രങ്ങൾക്ക് ശേഷം വിനീതിനൊപ്പം ജോമോനും ഷാനും വീണ്ടും ഒന്നിക്കുന്ന ചിത്രം കൂടിയാണിത്. രഞ്ജൻ എബ്രഹാമാണ് എഡിറ്റിംഗ്.

നായകനായ നോബിൾ ബാബു തോമസാണ് ചിത്രത്തിന്റെ തിരക്കഥാകൃത്ത്. ‘ജേക്കബിന്റെ സ്വർഗ്ഗരാജ്യം’ നിർമ്മിച്ച നോബിൾ ബാബു ‘ഹെലൻ’ എന്ന ചിത്രത്തിന്റെ രചയിതാക്കളിൽ ഒരാളാണ്. ‘ഹെലൻ’ സിനിമയിൽ നോബിൾ അഭിനയിക്കുകയും ചെയ്തിട്ടുണ്ട്. ഓഡ്രി മിറിയവും രേഷ്മ സെബാസ്റ്റ്യനുമാണ് ചിത്രത്തിലെ നായികമാർ. മനോജ് കെ. ജയൻ, കലാഭവൻ ഷാജോൺ, ബാബുരാജ്, വിഷ്ണു ജി. വാരിയർ, ജോണി ആന്റണി എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു.

സംവിധായകൻ കെ. മധുവിന്റെ മകളും മരുമകനുമായ പാർവതി കെ. മധുവും മാധവ് രമേശുമാണ് ലൈൻ പ്രൊഡ്യൂസർമാർ. എക്സിക്യൂട്ടീവ് പ്രൊഡ്യൂസർ: ശ്രാവൺ കൃഷ്ണകുമാർ. മാക്ക് ഈറാക്‌ലി മക്കത്സാറീയ (മാക്ക് പ്രൊഡക്ഷൻസ്) ആണ് ജോർജിയയിലെ ലൈൻ പ്രൊഡ്യൂസർ. വസ്ത്രാലങ്കാരം: മാഷർ ഹംസ, പ്രൊഡക്ഷൻ കൺട്രോളർ: സജീവ് ചന്ദിരൂർ, ക്രിയേറ്റീവ് ഡയറക്ടർ: ഷാരൂഖ് റഷീദ്, സംഘട്ടനം: ലസാർ വർദുകദ്സെ, നോബിൾ ബാബു തോമസ്, ഈറാക്‌ലി സബനാഡ്സെ, പ്രൊ‍ഡക്ഷൻ ഡിസൈനർ: വിനോദ് രവീന്ദ്രൻ, കലാസംവിധാനം: അരുൺ കൃഷ്ണ, മേക്കപ്പ്: മനു മോഹൻ, ചീഫ് അസോഷ്യേറ്റ് ഡയറക്ടർ: അഭയ് വാരിയർ, സ്റ്റിൽസ്: അനൂപ് ചാക്കോ, ഫിനാൻസ് കൺട്രോൾ: വിജേഷ് രവി, ടിൻസൺ തോമസ്, പിആർഒ ആതിര ദിൽജിത്ത്.