ഷെയ്‌നും എസ്തറും പ്രധാന വേഷങ്ങളിൽ; ഷാജി എൻ കരുൺ ചിത്രം ‘ഓൾ’ ടീസർ എത്തി
ഷെയ്ൻ നിഗമിനെയും എസ്തർ അനിലിനെയും പ്രധാന വേഷങ്ങളിൽ അവതരിപ്പിച്ചു ഷാജി എൻ കരുൺ സംവിധാനം ചെയ്യുന്ന ചിത്രം ആണ് ‘ഓൾ’. ഈ ചിത്രത്തിന്‍റെ ടീസർ ഇപ്പോൾ അണിയറപ്രവർത്തകർ പുറത്തുവിട്ടിരിക്കുക ആണ്.
ഒരു ചിത്രകാരന്‍റെ വേഷത്തിൽ ആണ് ഷെയിൻ നിഗം ഈ ചിത്രത്തിൽ അഭിനയിക്കുന്നത്. ചിത്രത്തിന്‍റെ ടൈറ്റിൽ ആയ ‘ഓൾ’ സൂചിപ്പിക്കുന്നത് എസ്‌തറിന്‍റെ കഥാപാത്രത്തെ ആണ്. മായ എന്നാണ് കഥാപാത്രത്തിന്‍റെ പേര്.
രാത്രിയിൽ തോണിയിൽ ചുറ്റുവാൻ ഇഷ്ടപ്പെടുന്ന ഷെയിന്‍റെ കഥാപാത്രം മായയെ പരിചയപ്പെടുന്നതും തുടർന്നുള്ള സംഭവവികാസങ്ങളിലൂടെയും ആണ് ചിത്രം മുന്നോട്ടു നീങ്ങുന്നത് എന്നാണ് ടീസർ നൽകുന്ന സൂചന.
അഞ്ചു വർഷങ്ങൾക്ക് ശേഷം ആണ് ഷാജി എൻ കരുൺ ഒരു ചിത്രം സംവിധാനം ചെയ്യുന്നത്. 2013ൽ പുറത്തിറങ്ങിയ സ്വപനം ആയിരുന്നു ഷാജി എൻ കരുണിന്‍റെ അവസാന ചിത്രം.
ബാലതാരമായി സിനിമയിൽ എത്തിയ എസ്തർ ആദ്യമായി നായിക ആകുന്നു എന്നതാണ് ഈ ചിത്രത്തിന്‍റെ ഒരു പ്രത്യേകത. കിസ്മത്, കെയർ ഓഫ് സൈറ ബാനു, പറവ എന്നീ ചിത്രങ്ങളിലൂടെ ശ്രദ്ധേയനായ ഷെയ്ൻ നിഗം മറ്റൊരു മികച്ച കഥാപാത്രവുമായി പ്രേക്ഷകർക്ക് മുന്നിലേക്ക് എത്തുന്നതും ചിത്രത്തിന്‍റെ പ്രതീക്ഷ കൂട്ടുന്നു.
എ വി അനൂപ് നിർമ്മിക്കുന്ന ഈ ചിത്രത്തിന് തിരക്കഥ ഒരുക്കിയിരിക്കുന്നത് ടി ഡി രാമകൃഷ്ണൻ ആണ്. എം ജെ രാധാകൃഷ്ണൻ ആണ് ക്യാമറ കൈകാരം ചെയ്തിരിക്കുന്നത്. ശ്രീകാർ പ്രസാദ് എഡിറ്റിംഗ് നിർവഹിച്ചിരിക്കുന്നു.
