‘കിംഗ് ഓഫ് കൊത്ത’യ്ക്ക് ശേഷം ദുൽഖർ വരുന്നു, പാൻ ഇന്ത്യൻ മഹാ വിജയം കൊയ്യാൻ ലക്കി ഭാസ്കറിന് കഴിയുമോ?
മലയാളത്തിന്റെ പ്രിയ നടൻ ദുൽഖർ സൽമാൻ ഇന്ന് ഇന്ത്യ ഒട്ടാകെ ജനപ്രീതി നേടിയ സൂപ്പർ താരമായി വളർന്നു കഴിഞ്ഞു. കഴിഞ്ഞ വർഷം ഓണം റിലീസായി എത്തിയ കിംഗ് ഓഫ് കൊത്തക്ക് ശേഷം ഒരു ദുൽഖർ ചിത്രത്തിനായുള്ള കാത്തിരിപ്പിൽ ആണ് താരത്തിന്റെ ആരാധകർ. ഒക്ടോബർ 31 ന് പാൻ ഇന്ത്യൻ റിലീസായി എത്തുന്ന ലക്കി ഭാസ്‍കർ എന്ന തെലുങ്ക് ചിത്രം ഈ കാത്തിരിപ്പ് അവസാനിപ്പിക്കും.
ഒരു വർഷത്തിന്റെ ഇടവേളയ്ക്ക് ശേഷം ദുൽഖർ പുതിയ ചിത്രവുമായി എത്തുമ്പോൾ ആ ചിത്രത്തിന്റെ ബോക്സ് ഓഫീസ് പ്രകടനത്തിന് കുറിച്ച് അറിയാനും ആകാംക്ഷയോടെ കാത്തിരിക്കുകയാണ് പ്രേക്ഷകർ. പാൻ ഇന്ത്യൻ തലത്തിൽ ഈ ചിത്രത്തിന് ലഭിക്കുന്ന പ്രേക്ഷക പ്രതികരണം എന്തായിരിക്കും എന്നറിയാനും പ്രേക്ഷകർ വളരെയധികം താൽപര്യപ്പെടുന്നുണ്ട് എന്ന് സോഷ്യൽ മീഡിയ ചർച്ചകളിൽ നിന്ന് വ്യക്തം.
വിമർശനങ്ങൾ ഏറ്റു വാങ്ങുമോ അതോ ഗംഭീര അഭിപ്രായങ്ങൾ നേടുമോ?, ബോക്സ് ഓഫീസിൽ എത്ര വലിയ വിജയത്തിലേക്ക് ഈ പാൻ ഇന്ത്യൻ ചിത്രത്തിന് കുതിക്കാനാകും?, എന്നതൊക്കെ അറിയാനും കൗതുകത്തോടെ കാത്തിരിക്കുകയാണ് പ്രേക്ഷകർ. ഇതിനോടകം മുപ്പത്തിയാറോളം ചിത്രങ്ങളിൽ വേഷമിട്ട ദുൽഖർ തമിഴ്, തെലുങ്ക്, ഹിന്ദി ഭാഷകളിലായി തന്നെ പത്തിന് മുകളിൽ ചിത്രങ്ങൾ ചെയ്ത് കഴിഞ്ഞു. ഇതിൽ ബഹുഭൂരിപക്ഷവും വലിയ വിജയങ്ങളുമാണ്. ദുൽഖറിന് ഇന്ത്യയിലുടനീളമുള്ള ഈ ജനപ്രീതി ലക്കി ഭാസ്കറിനെയും തുണക്കുമോ എന്നതാണ് ഇപ്പോൾ ഉയരുന്ന ചോദ്യം.
കിംഗ് ഓഫ് കൊത്തയിലൂടെ ഏറ്റു വാങ്ങിയ വിമർശനങ്ങൾക്ക് ഒരു ഗംഭീര വിജയത്തിലൂടെ മറുപടി നല്കാൻ ദുൽഖറിന് സാധിക്കുമോ എന്നതും ആരാധകരുടെ മനസ്സിലെ പ്രധാന ചോദ്യങ്ങളിലൊന്നാണ്. യുവ പ്രേക്ഷകരുടെ അമ്പരപ്പിക്കുന്ന പിന്തുണയുള്ള ഈ താരത്തിന്, ലക്കി ഭാസ്കറിലൂടെ കുടുംബ പ്രേക്ഷകരെയും ആകർഷിക്കാൻ സാധിക്കുമോ എന്നതും കാത്തിരുന്ന് കാണേണ്ട കാഴ്ചയാണ്. ഒരു വർഷത്തിന് ശേഷം നായകനായി വീണ്ടും വെള്ളിത്തിരയിലെത്തുമ്പോൾ, വിമർശനങ്ങളെ കയ്യടികളാക്കി മാറ്റാൻ മലയാളത്തിന്റെ യുവസൂപ്പർതാരത്തിന് സാധിക്കുമോ? ആ കാത്തിരിപ്പിന് ഈ വരുന്ന ഒക്ടോബർ 31 മറുപടി നൽകുമോ? ആരാധകർ ആകാംക്ഷയിലാണ്.
