ഉർവശിയും ജോജുവും ആദ്യമായി ഒന്നിക്കുന്ന ‘ആശ’യുടെ ചിത്രീകരണം ആരംഭിച്ചു; അഞ്ച് ഭാഷകളിൽ ചിത്രം എത്തും
മലയാളത്തിൻ്റെ പ്രിയപ്പെട്ട താരങ്ങളായ ഉർവശിയും ജോജു ജോർജ്ജും ആദ്യമായി ഒരുമിക്കുന്ന ‘ആശ’ എന്ന ചിത്രത്തിന് തുടക്കമായി. തൃക്കാക്കര വാമനമൂർത്തി ക്ഷേത്രത്തിൽ വെച്ച് നടന്ന പൂജാ ചടങ്ങുകളോടെയാണ് ചിത്രീകരണം ആരംഭിച്ചത്. അഞ്ചു ഭാഷകളിൽ ചിത്രം തിയേറ്ററുകളിൽ എത്തും.
പൂജാ ചടങ്ങിൽ ജോജു ജോർജ്ജ്, മധു നീലകണ്ഠൻ, സംവിധായകൻ സഫർ സനൽ എന്നിവർ ചേർന്ന് ഭദ്രദീപം തെളിയിച്ചു. ചിത്രത്തിൻ്റെ ഫസ്റ്റ് ക്ലാപ്പ് അടിച്ചത് ജോജു ജോർജ്ജാണ്. സ്വിച്ച് ഓൺ കർമ്മം നിർവ്വഹിച്ചത് മധു നീലകണ്ഠനാണ്. ഉർവശിക്കും ജോജുവിനും പുറമെ വിജയരാഘവൻ, ഐശ്വര്യ ലക്ഷ്മി, പണി ഫെയിം രമേഷ് ഗിരിജ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
പൂജയോടനുബന്ധിച്ച് ചിത്രത്തിൻ്റെ ടൈറ്റിൽ ലുക്ക് പോസ്റ്ററും അണിയറപ്രവർത്തകർ പുറത്തിറക്കി. അജിത് വിനായക ഫിലിംസിൻ്റെ ബാനറിൽ വിനായക അജിത്താണ് ‘ആശ’ നിർമ്മിക്കുന്നത്. നവാഗതനായ സഫർ സനലാണ് ഈ ചിത്രത്തിന് കഥയെഴുതി സംവിധാനം ചെയ്യുന്നത്. ചിത്രത്തിൻ്റെ തിരക്കഥയും സംഭാഷണവും ഒരുക്കിയിരിക്കുന്നത് ജോജു ജോർജ്ജും രമേഷ് ഗിരിജയും സഫർ സനലും ചേർന്നാണ്.
ഛായാഗ്രഹണം: മധു നീലകണ്ഠൻ, എഡിറ്റർ: ഷാൻ മുഹമ്മദ്, സംഗീതം: മിഥുൻ മുകുന്ദൻ, സൗണ്ട് ഡിസൈൻ ആൻഡ് സിങ്ക് സൗണ്ട്: അജയൻ അടാട്ട്, പ്രൊഡക്ഷൻ ഡിസൈനർ: വിവേക് കളത്തിൽ, മേക്കപ്പ്: ഷമീർ ഷാം, കോസ്റ്റ്യൂം: സുജിത്ത് സി.എസ്, സ്റ്റണ്ട്: ദിനേഷ് സുബ്ബരായൻ, പ്രൊഡക്ഷൻ കൺട്രോളർ: ഷബീർ മാലവട്ടത്ത്, ചീഫ് അസോസിയേറ്റ്: രതീഷ് പിള്ള, അസ്സോസിയേറ്റ്സ്: ജിജോ ജോസ്, ഫെബിൻ എം സണ്ണി, സ്റ്റിൽസ്: അനൂപ് ചാക്കോ, പിആർഒ: ആതിര ദിൽജിത്ത്, ഡിസൈൻസ്: യെല്ലോടൂത്ത്സ്.
