“അവളുടെ ശബ്ദം ആണ് ഇനി ഇവിടെ മുഴങ്ങേണ്ടത്”; വൻ സംഭവ വികാസങ്ങളുമായി ‘ജെ.എസ്.കെ’ ട്രെയിലർ പുറത്ത്

“അവളുടെ ശബ്ദം ആണ് ഇനി ഇവിടെ മുഴങ്ങേണ്ടത്”; വൻ സംഭവ വികാസങ്ങളുമായി ‘ജെ.എസ്.കെ’ ട്രെയിലർ പുറത്ത്

സുരേഷ് ഗോപി നായകനാകുന്ന ‘ജാനകി വി. V/S സ്റ്റേറ്റ് ഓഫ് കേരള’ (ജെ.എസ്.കെ) എന്ന ചിത്രത്തിന്റെ ട്രെയിലർ പുറത്തിറങ്ങി. ഈ മാസം 17-ന് ചിത്രം ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും. രാജ്യത്തെ ഓരോ പൗരനും കണ്ടിരിക്കേണ്ട ചില നിർണായക സംഭവങ്ങളാണ് ചിത്രത്തിന്റെ പ്രമേയമെന്ന് ട്രെയിലർ സൂചിപ്പിക്കുന്നു.

അഡ്വക്കേറ്റ് ഡേവിഡ് അബേൽ ഡോണോവൻ എന്ന കഥാപാത്രത്തെയാണ് സുരേഷ് ഗോപി ചിത്രത്തിൽ അവതരിപ്പിക്കുന്നത്. ജാനകി വിദ്യാധരൻ എന്ന കേന്ദ്രകഥാപാത്രമായി അനുപമ പരമേശ്വരനും എത്തുന്നുണ്ട്. ഒരു മരണവും അതിനെത്തുടർന്നുണ്ടാകുന്ന പോലീസ് അന്വേഷണവും കോടതി നടപടികളും നീതിക്കായുള്ള ഒരു യുവതിയുടെ പോരാട്ടവുമാണ് ചിത്രത്തിന്റെ ഇതിവൃത്തം. സുരേഷ് ഗോപി പ്രതിഭാഗം അഭിഭാഷകന്റെ വേഷത്തിലാണ് എത്തുന്നത്.

കോർട്ട് റൂം ഡ്രാമ വിഭാഗത്തിൽപ്പെടുന്ന ഈ ചിത്രത്തിൽ അനുപമ പരമേശ്വരനെ കൂടാതെ ശ്രുതി രാമചന്ദ്രൻ, ദിവ്യ പിള്ള എന്നിവരാണ് പ്രധാന സ്ത്രീ കഥാപാത്രങ്ങളെ അവതരിപ്പിക്കുന്നത്. അസ്‌കർ അലി, മാധവ് സുരേഷ് ഗോപി, ബൈജു സന്തോഷ്, ജയൻ ചേർത്തല, ജോയ് മാത്യു, അഭിലാഷ് രവീന്ദ്രൻ, രജിത് മേനോൻ, നിസ്താർ സേട്ട്, വൈഷ്ണവി രാജ്, മേധ പല്ലവി, കോട്ടയം രമേശ്, ദിലീപ്, ബാലാജി ശർമ്മ തുടങ്ങിയ വലിയൊരു താരനിരയും ചിത്രത്തിൽ അണിനിരക്കുന്നുണ്ട്.

നിരവധി ചർച്ചകൾക്കും ചില വിവാദങ്ങൾക്കും ശേഷമാണ് ‘ജാനകി വി. V/S സ്റ്റേറ്റ് ഓഫ് കേരള’ തിയേറ്ററുകളിലേക്ക് എത്തുന്നത്. സെൻസർ ബോർഡിന്റെ നിർദ്ദേശപ്രകാരം ചിത്രത്തിൽ ചില മാറ്റങ്ങൾ വരുത്തിയിരുന്നു. ‘U/A 16’ സർട്ടിഫിക്കറ്റോടെയാണ് ചിത്രം പ്രേക്ഷകരിലേക്ക് എത്തുന്നത്. ചിത്രത്തിന്റെ ടൈറ്റിലിൽ ‘ജാനകി’ എന്നത് ‘ജാനകി വി.’ എന്ന് മാറ്റാൻ സെൻസർ ബോർഡ് നിർദ്ദേശിച്ചിരുന്നു. കൂടാതെ, ഇടവേളയ്ക്ക് മുൻപുള്ള സംഭാഷണത്തിലെ ചില ഭാഗങ്ങളിൽ ‘ജാനകി’ എന്ന പേര് ഒഴിവാക്കിയാണ് ചിത്രം പ്രദർശനത്തിനെത്തുന്നത്.

ഏറെ ശ്രദ്ധ നേടിയ ‘ചിന്താമണി കൊലക്കേസ്’ എന്ന ചിത്രത്തിന് ശേഷം വർഷങ്ങൾക്കുശേഷമാണ് സുരേഷ് ഗോപി വക്കീൽ വേഷത്തിൽ എത്തുന്നത് എന്നതും ‘ജെ.എസ്.കെ’യുടെ പ്രത്യേകതയാണ്. കാർത്തിക് ക്രിയേഷൻസുമായി സഹകരിച്ച് കോസ്മോസ് എന്റർടൈൻമെന്റ്‌സ് ആണ് ചിത്രം നിർമ്മിക്കുന്നത്. ജെ. ഫണീന്ദ്ര കുമാർ ആണ് നിർമ്മാതാവ്. ഡ്രീം ബിഗ് ഫിലിംസാണ് വിതരണം. രണദിവയാണ് ഛായാഗ്രഹണം നിർവഹിച്ചിരിക്കുന്നത്. സംജിത്ത് മുഹമ്മദ് എഡിറ്റിംഗും, ജിബ്രാൻ പശ്ചാത്തല സംഗീതവും, ഗിരീഷ് നാരായണൻ സംഗീതവും നിർവഹിച്ചിരിക്കുന്നു.