“ഹലോ മോനേ”, മോഹൻലാലിന്റെ ആശംസകളോടെ സായി അഭ്യങ്കർ മലയാളത്തിലേക്ക്: ‘ബൾട്ടി’ ഓണത്തിനെത്തും

“ഹലോ മോനേ”, മോഹൻലാലിന്റെ ആശംസകളോടെ സായി അഭ്യങ്കർ മലയാളത്തിലേക്ക്: ‘ബൾട്ടി’ ഓണത്തിനെത്തും

സോഷ്യൽ മീഡിയയിൽ തരംഗമായ ‘കച്ചി സേര’, ‘ആസ കൂട’, ‘സിത്തിര പൂത്തിരി’ തുടങ്ങിയ ഹിറ്റ് ഗാനങ്ങളിലൂടെ ശ്രദ്ധേയനായ ഗായകൻ സായി അഭ്യങ്കർ മലയാള സിനിമയിലേക്ക്. ഷെയിൻ നിഗം നായകനാകുന്ന ഓണം റിലീസ് ചിത്രമായ ‘ബൾട്ടി’യിലൂടെയാണ് സായി അഭ്യങ്കറിന്റെ അരങ്ങേറ്റം. മലയാള സിനിമയിലേക്ക് സായിയെ സ്വാഗതം ചെയ്തുകൊണ്ടുള്ള സൂപ്പർതാരം മോഹൻലാലിന്റെ പ്രൊമോ വീഡിയോയും പുറത്തുവന്നിട്ടുണ്ട്. ‘ഹലോ മോനേ സായ്…’ എന്ന് തുടങ്ങുന്ന ഫോൺ സംഭാഷണത്തിലൂടെയാണ് മോഹൻലാൽ സായിയെ വരവേൽക്കുന്നത്. പ്രൊമോ വീഡിയോയുടെ അവസാനം, ‘ബൾട്ടി ഓണം’ എന്ന വാക്കുകളോടൊപ്പം സായി അഭ്യങ്കറിന്റെ പേരെഴുതിയ ‘ബൾട്ടി ജഴ്സിയുമായി’ നിൽക്കുന്ന മോഹൻലാലിനെയും കാണാം. സായി അഭ്യങ്കറിന്റെ ആദ്യ സിനിമാ റിലീസ് കൂടിയാണ് ‘ബൾട്ടി’.

സംഗീതത്തിനും ആക്ഷനും ഒരുപോലെ പ്രാധാന്യം നൽകുന്ന ഒരു ചിത്രമാണ് ‘ബൾട്ടി’. എസ്.ടി.കെ ഫ്രെയിംസ്, ബിനു ജോർജ്ജ് അലക്സാണ്ടർ പ്രൊഡക്ഷൻസ് എന്നീ ബാനറുകളിൽ സന്തോഷ് ടി. കുരുവിളയും ബിനു ജോർജ്ജ് അലക്സാണ്ടറും ചേർന്നാണ് ഈ ചിത്രം നിർമ്മിക്കുന്നത്. ‘മഹേഷിന്റെ പ്രതികാരം’, ‘മായാനദി’, ‘ആൻഡ്രോയ്ഡ് കുഞ്ഞപ്പൻ’, ‘ന്നാ താൻ കേസ് കൊട്’ തുടങ്ങിയ സൂപ്പർ ഹിറ്റ് സിനിമകളുടെ നിർമ്മാതാവാണ് സന്തോഷ് ടി. കുരുവിള. നവാഗതനായ ഉണ്ണി ശിവലിംഗമാണ് ‘ബൾട്ടി’ സംവിധാനം ചെയ്യുന്നത്.

പ്രശസ്ത ഗായകരായ ടിപ്പുവിന്റെയും ഹരിണിയുടെയും മകനാണ് സായി അഭ്യങ്കർ. യൂട്യൂബിൽ 200 മില്യണിലധികം കാഴ്ചക്കാരെ നേടിയ ഗാനങ്ങളിലൂടെയാണ് സായി ശ്രദ്ധേയനായത്. ഷെയിൻ നിഗമിന്റെ 25-ാമത് ചിത്രമായി എത്തുന്ന ‘ബൾട്ടി’യിൽ സായി അഭ്യങ്കർ എത്തുമ്പോൾ പ്രേക്ഷകരും സംഗീതാസ്വാദകരും വലിയ പ്രതീക്ഷയിലാണ്. ലോകേഷ് കനകരാജ് ചിത്രം ‘ബെൻസ്’, സൂര്യ നായകനാകുന്ന ‘കറുപ്പ്’, സിലമ്പരശൻ ചിത്രം ‘എസ്.ടി.ആർ 49’, അല്ലു അർജുൻ – ആറ്റ്‌ലീ ഒന്നിക്കുന്ന ചിത്രം, പ്രദീപ് രംഗനാഥൻ നായകനാകുന്ന ‘ഡ്യൂഡ്’ എന്നിവയുൾപ്പെടെ നിരവധി തമിഴ് സിനിമകൾക്ക് ഈ ഇരുപതുകാരൻ സംഗീതം ഒരുക്കുന്നുണ്ട്.

ഷെയിൻ നിഗമിന്റെ കരിയറിലെ തന്നെ ഏറ്റവും വലിയ ബഡ്ജറ്റിൽ ഒരുങ്ങുന്ന ചിത്രമാണ് ‘ബൾട്ടി’. കേരള-തമിഴ്നാട് അതിർത്തി ഗ്രാമത്തിന്റെ പശ്ചാത്തലത്തിലാണ് കഥ വികസിക്കുന്നത്. ഏതാനും ആഴ്ചകൾക്ക് മുൻപ് പുറത്തിറങ്ങിയ ചിത്രത്തിന്റെ ടൈറ്റിൽ ഗ്ലിംസ് സോഷ്യൽ മീഡിയയിൽ വലിയ സ്വീകാര്യത നേടിയിരുന്നു. ഷെയിൻ നിഗമിനൊപ്പം മലയാളത്തിലെയും തമിഴിലെയും പ്രമുഖ അഭിനേതാക്കളും പ്രഗത്ഭരായ സാങ്കേതിക വിദഗ്ധരും ഈ ചിത്രത്തിൽ അണിനിരക്കുന്നുണ്ട്.

ചിത്രത്തിന്റെ അണിയറ പ്രവർത്തകർ: കോ പ്രൊഡ്യൂസർ: ഷെറിൻ റെയ്ച്ചൽ സന്തോഷ്, എക്‌സിക്യൂട്ടീവ് പ്രൊഡ്യൂസർ: സന്ദീപ് നാരായൺ, ഛായാഗ്രഹണം: അലക്സ് ജെ പുളിക്കൽ, ഗാനരചന: വിനായക് ശശികുമാർ, കലാസംവിധാനം: ആഷിക് എസ്, വസ്ത്രാലങ്കാരം: മെൽവി ജെ, ആക്ഷൻ കൊറിയോഗ്രാഫി: ആക്ഷൻ സന്തോഷ് & വിക്കി മാസ്റ്റർ, മെയ്ക്കപ്പ്: ജിതേഷ് പൊയ്യ, സൗണ്ട് ഡിസൈൻ: വിഷ്ണു ഗോവിന്ദ്, ഡി ഐ: കളർ പ്ലാനറ്റ്, സ്റ്റിൽസ്: സുഭാഷ് കുമാരസ്വാമി, സജിത്ത് ആർ എം, കളറിസ്റ്റ്: ശ്രീക് വാര്യർ, വി എഫ് എക്സ്: ആക്സൽ മീഡിയ, ഫോക്സ്ഡോട്ട് മീഡിയ, മിക്സിങ്: എം ആർ രാജാകൃഷ്ണൻ, പ്രോജെക്ട് കോർഡിനേറ്റർ: ബെന്നി കട്ടപ്പന, കൊറിയോഗ്രാഫി: അനുഷ, പ്രൊഡക്ഷൻ കൺട്രോളർ: കിഷോർ പുറക്കാട്ടിരി, ചീഫ് അസോസിയേറ്റ് ഡിറക്ടർ: ശ്രീലാൽ എം, അസോസിയേറ്റ് ഡിറക്ടർ: ശബരിനാഥ്, രാഹുൽ രാമകൃഷ്ണൻ, സാംസൺ സെബാസ്റ്റ്യൻ, മെൽബിൻ മാത്യു (പോസ്റ്റ്‌ പ്രൊഡക്ഷൻ), മൂൺഷോട്ട് എന്റർടെയിൻമെന്റ്സ് & എസ്.ടി.കെ. ഫ്രെയിംസ് സി.എഫ്.ഓ: ജോബിഷ് ആന്റണി, & സി.ഓ.ഓ അരുൺ സി. തമ്പി, ഡിസ്ട്രിബ്യൂഷൻ: മൂൺഷോട്ട് എന്റർടെയിൻമെന്റ്സ് പ്രൈവറ്റ് ലിമിറ്റഡ്, ഓഡിയോ ലേബൽ: തിങ്ക് മ്യൂസിക്. ടൈറ്റിൽ ഡിസൈൻ: റോക്കറ്റ് സയൻസ്, പബ്ലിസിറ്റി ഡിസൈൻസ്: വിയാഖി, മാർക്കറ്റിംഗ് & വിഷ്വൽ പ്രൊമോഷൻസ്: സ്നേക്ക്പ്ലാന്റ് എൽ.എൽ.പി, പി.ആർ.ഓ: ഹെയിൻസ്.