വീണ്ടും അസുര താണ്ഡവവുമായി ധനുഷ്; എ ആർ റഹ്മാൻ മാജിക്കുമായി രായനിലെ ആദ്യ ഗാനം പുറത്ത്…
തമിഴ് സൂപ്പർ താരം ധനുഷ് നായകനായി എത്തുന്ന ഏറ്റവും പുതിയ ചിത്രമാണ് രായൻ. സംവിധായകനായും നടനായും ധനുഷ് എത്തുന്ന ഈ ബിഗ് ബഡ്ജറ്റ് ചിത്രം ജൂൺ പതിമൂന്നിനാണ് ആഗോള റീലിസായി എത്തുന്നത്. ഇപ്പോഴിതാ ഈ ഈ ചിത്രത്തിലെ ആദ്യ ഗാനവും റിലീസ് ചെയ്തിരിക്കുകയാണ് അണിയറ പ്രവർത്തകർ. അടങ്കാത്ത അസുരൻ എന്ന വരികളോട് കൂടിയ ഗാനത്തിന്റെ ലിറിക് വീഡിയോയാണ് ഇപ്പോൾ പുറത്ത് വിട്ടിരിക്കുന്നത്.
സംഗീത മാന്ത്രികൻ എ ആർ റഹ്മാൻ ഈണം നൽകിയ ഈ ഗാനം ആലപിച്ചിരിക്കുന്നത് എ ആർ റഹ്മാൻ, ധനുഷ് എന്നിവർ ചേർന്നാണ്. ധനുഷ് തന്നെയാണ് ഈ ഗാനം രചിച്ചിരിക്കുന്നതും. ധനുഷ് വമ്പൻ മേക്കോവറിലെത്തുന്ന ഈ ചിത്രത്തിൽ മലയാളി താരം അപർണ്ണ ബാലമുരളിയാണ് നായികയായി അഭിനയിച്ചിരിക്കുന്നത്. രായനില്‍ അവസരം നല്‍കിയതിന് നന്ദി പറഞ്ഞു കൊണ്ട് ഈ ചിത്രത്തിലെ തന്റെ ലുക്ക് അപർണ്ണ പുറത്ത് വിട്ടത് പ്രേക്ഷക ശ്രദ്ധ നേടിയിരുന്നു.
നിത്യ മേനോൻ, കാളിദാസ് ജയറാം, സുന്ദീപ് കിഷൻ, വരലക്ഷ്‍മി ശരത്‍കുമാര്‍, ദുഷ്‍റ വിജയൻ. എസ് ജെ സൂര്യ, പ്രകാശ് രാജ്, സെല്‍വരാഘവൻ എന്നിവരും നിർണ്ണായക വേഷങ്ങൾ ചെയ്യുന്ന ഈ ചിത്രത്തിന് ഛായാഗ്രാഹണം നിർവഹിച്ചിരിക്കുന്നത് ഓം പ്രകാശാണ്. സൺ പിക്‌ചേഴ്‌സാണ് ഈ ആക്ഷൻ ഡ്രാമ നിർമ്മിച്ചിരിക്കുന്നത്. പ്രസന്ന എഡിറ്റിംഗ് നിർവഹിച്ച ഈ ചിത്രത്തിന് വേണ്ടി നൃത്ത സംവിധാനം ഒരുക്കിയത് പ്രഭുദേവയാണ്.
പീറ്റർ ഹെയ്‌നാണ് ഇതിന്റെ സംഘട്ടന സംവിധായകൻ. എസ് ജെ സൂര്യയാണ് ഈ ചിത്രത്തിലെ നിർണ്ണായകമായ പ്രതിനായക വേഷം ചെയ്തിരിക്കുന്നതെന്ന് വാർത്തകൾ വന്നിരുന്നു. പവർ പാണ്ടി എന്ന ചിത്രത്തിന് ശേഷം ധനുഷ് സംവിധായകനായി എത്തുന്നു എന്നതും രായൻ കാത്തിരിക്കാൻ പ്രേക്ഷകരെ പ്രേരിപ്പിക്കുന്ന വലിയ ഘടകമാണ്.
