മേജർ രവിയുടെ ‘പഹൽഗാം’ ആദ്യഘട്ട ചിത്രീകരണം കശ്മീരിൽ പൂർത്തിയായി; അപ്ഡേറ്റ്സ് പുറത്ത്
ഇന്ത്യൻ സൈന്യത്തിൻ്റെ ചരിത്രത്തിലെ ശ്രദ്ധേയമായ ഓപ്പറേഷൻ സിന്ദൂർ, ഓപ്പറേഷൻ മഹാദേവ് എന്നീ സൈനിക മുന്നേറ്റങ്ങളെ ആസ്പദമാക്കി മേജർ രവി സംവിധാനം ചെയ്യുന്ന ‘പഹൽഗാം – ഓപ്പ്. സിന്ദൂർ’ എന്ന ചിത്രത്തിൻ്റെ ആദ്യഘട്ട ചിത്രീകരണം പൂർത്തിയായി. കശ്മീരിലെ പഹൽഗാം, ശ്രീനഗർ എന്നിവിടങ്ങളിലെ മനോഹരമായ പശ്ചാത്തലത്തിലാണ് സിനിമയുടെ ആദ്യ ഷെഡ്യൂൾ ചിത്രീകരിച്ചത്.
ചിത്രത്തിലെ നിർണായകമായ ഔട്ട്‌ഡോർ രംഗങ്ങൾ ഉൾപ്പെടെയുള്ള ഭാഗങ്ങളാണ് ഈ ഘട്ടത്തിൽ പൂർത്തിയാക്കിയതെന്ന് നിർമ്മാതാക്കൾ അറിയിച്ചു. ഈ ഷെഡ്യൂൾ വിജയകരമായി പൂർത്തിയായതോടെ, സിനിമയുടെ അടുത്ത ഘട്ട ചിത്രീകരണത്തിനുള്ള ഒരുക്കങ്ങൾ പുരോഗമിക്കുന്നതായും റിപ്പോർട്ടുകളുണ്ട്. അടുത്തിടെ കൊല്ലൂർ മൂകാംബികാ ക്ഷേത്രത്തിൽ വെച്ചായിരുന്നു ചിത്രത്തിൻ്റെ പൂജാ ചടങ്ങുകൾ നടന്നത്.
ചിത്രീകരണത്തിനിടെ, “പഹൽഗാമിൽ, ഇവിടെയാണ് കഥ തുടങ്ങുന്നത്” എന്ന അടിക്കുറിപ്പോടെ മേജർ രവി നിർമ്മാതാക്കൾക്കൊപ്പം പങ്കുവെച്ച ചിത്രം സോഷ്യൽ മീഡിയയിൽ ശ്രദ്ധ നേടിയിരുന്നു. ഇന്ത്യൻ സൈനികരുടെ ദേശസ്നേഹം, ത്യാഗം, വികാരം, ആക്ഷൻ, കരുത്ത് എന്നിവയ്ക്ക് പ്രാധാന്യം നൽകിയാണ് ചിത്രം ഒരുങ്ങുന്നത്. പ്രസിഡൻഷ്യൽ മൂവീസ് ഇൻ്റർനാഷണൽ പ്രൈവറ്റ് ലിമിറ്റഡിൻ്റെ ബാനറിൽ അനൂപ് മോഹനാണ് ചിത്രം നിർമ്മിക്കുന്നത്.
‘കീർത്തിചക്ര’ ഉൾപ്പെടെയുള്ള നിരവധി ദേശസ്നേഹ സിനിമകളിലൂടെ ശ്രദ്ധേയനായ മേജർ രവി തൻ്റെ തനതായ യാഥാർത്ഥ്യബോധവും സിനിമാറ്റിക് കാഴ്ചപ്പാടും ‘പഹൽഗാം’ എന്ന ചിത്രത്തിലൂടെ വീണ്ടും പ്രേക്ഷകർക്ക് മുന്നിലേക്ക് എത്തിക്കാൻ ഒരുങ്ങുകയാണ്. പാൻ-ഇന്ത്യൻ റിലീസായി ഒരുങ്ങുന്ന ചിത്രം ഇന്ത്യയിലെ പ്രധാന ഒമ്പത് ഭാഷകളിലേക്ക് മൊഴിമാറ്റം ചെയ്യാനും പദ്ധതിയുണ്ട്. സിനിമയുടെ കൂടുതൽ വിവരങ്ങൾ വരും ദിവസങ്ങളിൽ പുറത്തുവിടുമെന്ന് അണിയറപ്രവർത്തകർ അറിയിച്ചു.
ഛായാഗ്രഹണം: എസ്. തിരുനാവുക്കരാസു, എഡിറ്റിംഗ്: ഡോൺ മാക്സ്, സംഗീതം: ഹർഷവർധൻ രമേശ്വർ, പ്രൊഡക്ഷൻ ഡിസൈൻ: വിനീഷ് ബംഗ്ലാൻ, മേക്കപ്പ്: റോണെക്സ് സേവ്യർ, ആക്ഷൻ ഡയറക്ഷൻ: കേച ഖംഫഖ്ഡീ, സെക്കൻഡ് യൂണിറ്റ് ക്യാമറ: അർജുൻ രവി, പിആർഒ ആതിര ദിൽജിത്ത്.
