ബോളിവുഡിലെ വമ്പൻ നിർമ്മാതാക്കൾ മലയാളത്തിലേക്ക്; കുഞ്ചാക്കോ ബോബനും ലിജോമോളും ഒന്നിക്കുന്ന സൈക്കോളജിക്കൽ ത്രില്ലർ ആരംഭിച്ചു
കുഞ്ചാക്കോ ബോബനും ലിജോമോൾ ജോസും കേന്ദ്ര കഥാപാത്രങ്ങളാകുന്ന പുതിയ സൈക്കോളജിക്കൽ ത്രില്ലർ ചിത്രത്തിന് തുടക്കമായി. പ്രശസ്ത എഡിറ്റർ കിരൺ ദാസ് ആദ്യമായി സംവിധായകനാവുന്ന ഈ ചിത്രത്തിന്റെ തിരക്കഥ ഒരുക്കുന്നത് ശ്രദ്ധേയനായ എഴുത്തുകാരൻ ഷാഹി കബീറാണ്. ബോളിവുഡിലെ പ്രമുഖ നിർമ്മാണ കമ്പനികളായ ടി-സീരീസ് ഫിലിംസും പനോരമ സ്റ്റുഡിയോസും കൈകോർക്കുന്ന ചിത്രം ‘പനോരമ സ്റ്റുഡിയോസ് പ്രൊഡക്ഷൻ നമ്പർ 3’ എന്ന താൽക്കാലിക പേരിലാണ് നിർമ്മാണം ആരംഭിച്ചത്.
ബോളിവുഡിലെ പ്രമുഖരായ ഗുൽഷൻ കുമാർ, ഭൂഷൺ കുമാർ എന്നിവരുടെ ടി-സീരീസ് ഫിലിംസും, കുമാർ മംഗത് പഥക്, അഭിഷേക് പഥക് എന്നിവരുടെ പനോരമ സ്റ്റുഡിയോസും ചേർന്നാണ് ചിത്രം മലയാളത്തിൽ നിർമ്മിക്കുന്നത്. ഒരു വലിയ ഇടവേളയ്ക്ക് ശേഷം ബോളിവുഡിലെ പ്രമുഖ നിർമ്മാതാക്കൾ ഒരു മലയാള സിനിമയ്ക്കായി ഒന്നിക്കുന്നു എന്നത് ഈ പ്രോജക്റ്റിന്റെ പ്രാധാന്യം വർദ്ധിപ്പിക്കുന്നു. നവിസ് സേവ്യർ, റാം മിർചന്ദാനി, രാജേഷ് മേനോൻ, അഭിനവ് മെഹ്‌റോത്ര എന്നിവരാണ് സഹനിർമ്മാതാക്കൾ.
കുഞ്ചാക്കോ ബോബനും ലിജോമോൾക്കും പുറമെ വലിയൊരു താരനിര തന്നെ ചിത്രത്തിലുണ്ട്. സുധീഷ്, ഷാജു ശ്രീധർ, കൃഷ്ണ പ്രഭ, സിബി തോമസ്, സാബുമോൻ, അരുൺ ചെറുകാവിൽ, വിനീത് തട്ടിൽ, ഉണ്ണി ലാലു, നിതിൻ ജോർജ്, കിരൺ പീതാംബരൻ, ജോളി ചിറയത്ത്, തങ്കം മോഹൻ, ശ്രീകാന്ത് മുരളി, ഗംഗാ മീര തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
അർജുൻ സേതു ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് സംവിധായകൻ കിരൺ ദാസ് തന്നെയാണ് കൈകാര്യം ചെയ്യുന്നത്. മറ്റു അണിയറ പ്രവർത്തകർ: സംഗീതം: ജസ്റ്റിൻ വർഗീസ്, പ്രൊഡക്ഷൻ ഡിസൈനർ: ദിലീപ് നാഥ്, കോസ്റ്റ്യൂം: ഗായത്രി കിഷോർ, മേക്കപ്പ്: റോണെക്സ് സേവ്യർ, സൗണ്ട് ഡിസൈൻ: ജിതിൻ ജോസഫ്, വിഎഫ്എക്സ്: എഗ്ഗ് വൈറ്റ് വിഎഫ്എക്സ്, പ്രൊഡക്ഷൻ കൺട്രോളർ: ഷബീർ മലവട്ടത്ത്, എക്സിക്യൂട്ടീവ് പ്രൊഡ്യൂസർ: വിനോദ് രാഘവൻ, സ്റ്റിൽസ്: നന്ദു ഗോപാലകൃഷ്ണൻ, ഡിസൈൻ: ഓൾഡ്മോങ്ക്സ്, പി.ആർ.ഒ: ആതിര ദിൽജിത്ത്.
