കബഡി കോർട്ടിലെ മത്സരച്ചൂടും വൻ ആക്ഷനുമായി ഷെയ്ൻ നിഗത്തിന്റെ ‘ബൾട്ടി’ വരുന്നു; ട്രെയിലർ പുറത്ത്

കബഡി കോർട്ടിലെ മത്സരച്ചൂടും വൻ ആക്ഷനുമായി ഷെയ്ൻ നിഗത്തിന്റെ ‘ബൾട്ടി’ വരുന്നു; ട്രെയിലർ പുറത്ത്

ഷെയ്ൻ നിഗത്തിന്റെ കരിയറിലെ ഇരുപത്തിയഞ്ചാമത് ചിത്രമായ ‘ബൾട്ടി’യുടെ ആക്ഷൻ നിറഞ്ഞ ട്രെയിലർ പുറത്തിറങ്ങി. സ്പോർട്സ് ആക്ഷൻ വിഭാഗത്തിൽപ്പെടുന്ന ചിത്രം സെപ്റ്റംബർ 26-ന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും. സൗഹൃദം, പ്രണയം, പ്രതികാരം എന്നിവ കോർത്തിണക്കിയ ഒരു ദൃശ്യാനുഭവമായിരിക്കും ചിത്രമെന്ന് ഉറപ്പുനൽകുന്നതാണ് ട്രെയിലർ.

കേരള-തമിഴ്നാട് അതിർത്തി ഗ്രാമമായ വേലംപാളയത്തെ നാല് സുഹൃത്തുക്കളുടെയും അവരുടെ കബഡി ടീമായ ‘പഞ്ചമി റൈഡേഴ്സി’ന്റെയും കഥയാണ് ചിത്രം പറയുന്നത്. കബഡി കോർട്ടിലെ മത്സരച്ചൂടും ജീവിതത്തിലെ സംഘർഷങ്ങളും ഒരുപോലെ കൈകാര്യം ചെയ്യുന്ന ചിത്രം പ്രേക്ഷകരിൽ ആവേശം നിറയ്ക്കുമെന്ന് ട്രെയിലറിലെ ദൃശ്യങ്ങൾ വ്യക്തമാക്കുന്നു. ഷെയ്ൻ നിഗം ഇതുവരെ കാണാത്ത ഊർജ്ജസ്വലമായ പ്രകടനവുമായാണ് ചിത്രത്തിൽ പ്രത്യക്ഷപ്പെടുന്നത്.

‘ബൾട്ടി’യുടെ പ്രധാന ആകർഷണങ്ങളിലൊന്ന് അതിലെ വലിയ താരനിരയാണ്. തമിഴ് സംവിധായകനും നടനുമായ സെൽവരാഘവൻ, ഭൈരവൻ എന്ന വില്ലൻ കഥാപാത്രത്തിലൂടെ മലയാളത്തിൽ അരങ്ങേറ്റം കുറിക്കുന്നു. അദ്ദേഹത്തിന്റെ ഗംഭീര പ്രകടനം ട്രെയിലറിൽ ശ്രദ്ധ നേടുന്നുണ്ട്. തമിഴ് താരം ശന്തനു ഭാഗ്യരാജ്, കുമാർ എന്ന സുപ്രധാന കഥാപാത്രത്തെ അവതരിപ്പിക്കുമ്പോൾ, സംവിധായകൻ അൽഫോൺസ് പുത്രൻ ‘സൈക്കോ ബട്ടർഫ്ലൈ സോഡാ ബാബു’ എന്ന വ്യത്യസ്ത വേഷത്തിലും എത്തുന്നു. ജീ മാ എന്ന കഥാപാത്രമായി പൂർണ്ണിമ ഇന്ദ്രജിത്തും ഞെട്ടിക്കുന്ന മേക്കോവറിലാണ് പ്രത്യക്ഷപ്പെടുന്നത്. പ്രീതി അസ്രാനിയാണ് ചിത്രത്തിലെ നായിക.

നവാഗതനായ ഉണ്ണി ശിവലിംഗം സംവിധാനം ചെയ്യുന്ന ഈ ചിത്രം നിർമ്മിച്ചിരിക്കുന്നത് സന്തോഷ് ടി. കുരുവിളയും ബിനു ജോർജ്ജ് അലക്സാണ്ടറും ചേർന്നാണ്. ‘മഹേഷിന്റെ പ്രതികാരം’, ‘ന്നാ താൻ കേസ് കൊട്’ തുടങ്ങിയ ഹിറ്റുകൾ സമ്മാനിച്ച സന്തോഷ് ടി. കുരുവിളയുടെ നിർമ്മാണവും ചിത്രത്തിന്റെ പ്രതീക്ഷകൾ വർദ്ധിപ്പിക്കുന്നു. തമിഴ് സംഗീത സംവിധായകൻ സായ് അഭ്യങ്കറാണ് ചിത്രത്തിന് സംഗീതം നൽകുന്നത്. അദ്ദേഹം ആലപിച്ച ‘ജാലക്കാരി’ എന്ന ഗാനം ഇതിനകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. വമ്പൻ ബഡ്ജറ്റിൽ ഒരുങ്ങുന്ന ‘ബൾട്ടി’, ഷെയ്ൻ നിഗത്തിന്റെ കരിയറിലെ ഏറ്റവും വലിയ പ്രോജക്റ്റുകളിൽ ഒന്നായിരിക്കും.

ചിത്രത്തിന്റെ മറ്റ് അണിയറ പ്രവർത്തകർ ഇവരാണ്: ഛായാഗ്രഹണം: അലക്സ് ജെ പുളിക്കൽ, ക്രിയേറ്റീവ് ഡയറക്ടർ: വാവ നുജുമുദ്ദീൻ, എഡിറ്റർ: ശിവ്കുമാർ വി പണിക്കർ, കോ പ്രൊഡ്യൂസർ: ഷെറിൻ റെയ്ച്ചൽ സന്തോഷ്, എക്‌സിക്യൂട്ടീവ് പ്രൊഡ്യൂസർ: സന്ദീപ് നാരായൺ, കലാസംവിധാനം: ആഷിക് എസ്, ഓഡിയോഗ്രഫി: വിഷ്ണു ഗോവിന്ദ്, അഡീഷണൽ ഡയലോഗ്: ടിഡി രാമകൃഷ്ണൻ, സംഘട്ടനം: ആക്ഷൻ സന്തോഷ്, വിക്കി, പ്രൊജക്ട് കോർഡിനേറ്റർ: ബെന്നി കട്ടപ്പന, പ്രൊഡക്ഷൻ കൺട്രോളർ: കിഷോർ പുറക്കാട്ടിരി, ചീഫ് അസ്സോസിയേറ്റ് ഡയറക്ടർ: ശ്രീലാൽ എം, അസോസിയേറ്റ് ഡയറക്ടർമാർ: ശബരിനാഥ്, രാഹുൽ രാമകൃഷ്ണൻ, സാംസൺ സെബാസ്റ്റ്യൻ, മെൽബിൻ മാത്യു (പോസ്റ്റ് പ്രൊഡക്ഷൻ), വസ്ത്രാലങ്കാരം: മെൽവി ജെ, ഡി.ഐ: കളർ പ്ലാനെറ്റ്, ഗാനരചന: വിനായക് ശശികുമാർ, സ്റ്റിൽസ്: സജിത്ത് ആർ.എം, വിഎഫ്എക്സ്: ആക്സൽ മീഡിയ, ഫോക്സ്ഡോട്ട് മീഡിയ, കളറിസ്റ്റ്: ശ്രീക് വാര്യർ, ഗ്ലിംപ്സ് എഡിറ്റ്: ഹരി ദേവകി, ഡിസ്ട്രിബ്യൂഷൻ: മൂൺഷോട്ട് എന്‍റർ‍ടെയ്ൻമെന്‍റ്സ് പ്രൈവറ്റ് ലി., എസ്ടികെ ഫ്രെയിംസ്, സിഒഒ: അരുൺ സി തമ്പി, സിഎഫ്ഒ: ജോബീഷ് ആന്‍റണി, പോസ്റ്റ് പ്രൊഡക്ഷൻ സൂപ്പർവൈസർ: മിലിന്ദ് സിറാജ്, ടൈറ്റിൽ ഡിസൈൻസ്: റോക്കറ്റ് സയൻസ്, പബ്ലിസിറ്റി ഡിസൈൻസ്: വിയാക്കി, ആന്‍റണി സ്റ്റീഫൻ, റോക്കറ്റ് സയൻസ്, മാർക്കറ്റിംഗ്: വിഷ്വൽ പ്രൊമോഷൻസ്: സ്നേക്ക്പ്ലാന്‍റ് എൽഎൽപി, പിആർഒ: ഹെയിൻസ്, യുവരാജ്.