‘ലോക’യ്ക്ക് ചരിത്രനേട്ടം; മോഹൻലാലിന് ശേഷം ഈ റെക്കോർഡ് സ്വന്തമാക്കുന്ന ആദ്യ താരമായി കല്യാണി

‘ലോക’യ്ക്ക് ചരിത്രനേട്ടം; മോഹൻലാലിന് ശേഷം ഈ റെക്കോർഡ് സ്വന്തമാക്കുന്ന ആദ്യ താരമായി കല്യാണി

മലയാള സിനിമയുടെ ബോക്സ് ഓഫീസ് ചരിത്രത്തിലെ എക്കാലത്തെയും വലിയ റെക്കോർഡുകളിലേക്ക്, ‘ലോക’ എന്ന ചിത്രം അതിന്റെ പേര് കൂടി എഴുതിച്ചേർത്തിരിക്കുന്നു. റിലീസ് ചെയ്ത് മൂന്നാം ദിവസം 22 കോടിയിലധികം രൂപ കളക്ഷൻ നേടിക്കൊണ്ടാണ് ഈ ചിത്രം അപൂർവമായ നേട്ടം സ്വന്തമാക്കിയത്. ഇതോടെ, മലയാള സിനിമയിൽ ഒരു ദിവസം 20 കോടിയിലധികം രൂപ കളക്ഷൻ നേടുന്ന ചിത്രങ്ങളുടെ എലൈറ്റ് പട്ടികയിലേക്ക് ‘ലോക’ പ്രവേശിച്ചിരിക്കുകയാണ്.

ഈ പട്ടികയിൽ സൂപ്പർസ്റ്റാർ മോഹൻലാലിനാണ് സമ്പൂർണ്ണ ആധിപത്യം. അദ്ദേഹത്തിന്റെ ചിത്രങ്ങൾ എട്ട് തവണയാണ് 20 കോടിക്ക് മുകളിലുള്ള സിംഗിൾ-ഡേ കളക്ഷൻ എന്ന നേട്ടം കൈവരിച്ചിട്ടുള്ളത്. ‘എമ്പുരാൻ’, ‘തുടരും’ ‘മരക്കാർ’ തുടങ്ങിയ ചിത്രങ്ങളിലൂടെ അദ്ദേഹം സ്ഥാപിച്ച ഈ റെക്കോർഡുകൾ മലയാള സിനിമയ്ക്ക് ഇന്നും വലിയൊരു അളവുകോലാണ്. 68.20 കോടി നേടിയ ‘എംപുരാൻ’ ആണ് ഈ പട്ടികയിൽ ഒന്നാമത്.

മോഹൻലാൽ ചിത്രങ്ങൾ ആധിപത്യം സ്ഥാപിച്ച ഈ റെക്കോർഡ് ബുക്കിലേക്കാണ്, കല്യാണി പ്രിയദർശൻ നായികയായ ‘ലോക’ ഇപ്പോൾ ശക്തമായ ഒരു സാന്നിധ്യം അറിയിച്ചിരിക്കുന്നത്. മോഹൻലാൽ അല്ലാതെ മറ്റൊരു താരത്തിന്റെ ചിത്രം ഈ 20 കോടി ക്ലബ്ബിൽ ഇടംപിടിക്കുന്നത് ഇതാദ്യമായാണ്. ഇത് കല്യാണി പ്രിയദർശന്റെ കരിയറിലെ ഒരു സുപ്രധാന നാഴികക്കല്ലാണ്. മലയാളത്തിലെ മറ്റ് യുവതാരങ്ങൾക്കോ സൂപ്പർതാരങ്ങൾക്കോ പോലും സാധിക്കാത്ത ഒരു നേട്ടമാണ് കല്യാണി ഇതിലൂടെ കൈവരിച്ചിരിക്കുന്നത്.

ഒരു നടന്റെ താരമൂല്യത്തിനപ്പുറം, ശക്തമായ ഉള്ളടക്കത്തിനും അവതരണമികവിനും പ്രേക്ഷകരെ വൻതോതിൽ ആകർഷിക്കാൻ കഴിയുമെന്നതിന്റെ തെളിവാണ് ‘ലോക’യുടെ ഈ വിജയം. നാലാം ദിനത്തിലും 20 കോടിക്ക് മുകളിൽ കളക്ഷൻ പ്രതീക്ഷിക്കുന്ന ചിത്രം, മലയാള സിനിമയുടെ വാണിജ്യ സാധ്യതകൾക്ക് പുതിയ ദിശാബോധം നൽകുകയാണ്. മോഹൻലാൽ എന്ന മലയാളത്തിന്റെ എക്കാലത്തെയും ഏറ്റവും വലിയ താരത്തിന്റെ റെക്കോർഡുകൾക്ക് പിന്നാലെ, ആ ചരിത്ര പട്ടികയിൽ ഒരു പുതിയ പേര് എഴുതിച്ചേർത്തു എന്നതാണ് ‘ലോക’യുടെയും കല്യാണിയുടെയും യഥാർത്ഥ വിജയം.