നാലാമതും വിജയം ലക്ഷ്യം വെച്ച് മോഹൻലാൽ; ഓണം റിലീസുകൾ ഇനി ബിഗ് സ്ക്രീനിൽ…
ഓണാവേശം കൊടിയേറുമ്പോൾ പ്രേക്ഷകർക്ക് ഉത്സവവിരുന്നൊരുക്കാൻ നാല് വ്യത്യസ്ത പ്രമേയങ്ങളിലുള്ള ചിത്രങ്ങൾ ഈയാഴ്ച തിയേറ്ററുകളിലെത്തും. മോഹൻലാലിന്റെ ഫീൽ-ഗുഡ് ഡ്രാമ, കല്യാണി പ്രിയദർശൻ നായികയാകുന്ന സൂപ്പർഹീറോ ചിത്രം, ഫഹദ് ഫാസിലിന്റെ റൊമാന്റിക് കോമഡി, യുവനിരയുടെ ആക്ഷൻ ത്രില്ലർ എന്നിവയാണ് പ്രേക്ഷകരെ കാത്തിരിക്കുന്നത്. ‘ഹൃദയപൂർവ്വം’, ‘ലോക: ചാപ്റ്റർ വൺ – ചന്ദ്ര’, ‘ഓടും കുതിര ചാടും കുതിര’, ‘മേനേ പ്യാർ കിയാ’ എന്നിവ ബോക്സ് ഓഫീസിൽ മാറ്റുരയ്ക്കും.
ഹാട്രിക് വിജയങ്ങൾക്ക് ശേഷം മോഹൻലാൽ-സത്യൻ അന്തിക്കാട് കൂട്ടുകെട്ടിൽ ഒരുങ്ങുന്ന ‘ഹൃദയപൂർവ്വം’ നാളെ (ഓഗസ്റ്റ് 28-ന്) തിയേറ്ററുകളിലെത്തും. ഹൃദയം മാറ്റിവെക്കപ്പെട്ട സന്ദീപ് ബാലകൃഷ്ണൻ (മോഹൻലാൽ), തനിക്ക് ഹൃദയം ദാനം ചെയ്ത കേണലിന്റെ കുടുംബത്തെ കാണാൻ പൂനെയിലേക്ക് യാത്രയാവുന്നു. അവിടെ അപ്രതീക്ഷിതമായി തങ്ങേണ്ടി വരുമ്പോൾ അവരുടെ ജീവിതവുമായി അയാൾ വൈകാരികമായി അടുക്കുന്നതാണ് ചിത്രത്തിന്റെ ഇതിവൃത്തം. ആശിർവാദ് സിനിമാസിന്റെ ബാനറിൽ ഒരുങ്ങുന്ന ചിത്രത്തിൽ മാളവിക മോഹനൻ, സംഗീത് പ്രതാപ്, സിദ്ദിഖ്, ലാലു അലക്സ് എന്നിവർ പ്രധാന വേഷങ്ങളിലെത്തുന്നു.
ഹൃദയപൂർവ്വത്തിന് ഒപ്പം തന്നെ കല്യാണി പ്രിയദർശൻ ടൈറ്റിൽ റോളിലെത്തുന്ന ‘ലോക: ചാപ്റ്റർ വൺ – ചന്ദ്ര’ റിലീസ് ചെയ്യും. വ്യക്തിപരമായ വെല്ലുവിളികൾക്കിടയിൽ തനിക്ക് അസാധാരണമായ കഴിവുകളുണ്ടെന്ന് ഒരു യുവതി തിരിച്ചറിയുന്നു. തിന്മയുടെ ശക്തികൾക്കെതിരെ പോരാടാൻ സ്വന്തം കഴിവുകളെയും വിധിയെയും അവൾക്ക് അംഗീകരിക്കേണ്ടി വരുന്നതാണ് കഥ. ഡൊമിനിക് അരുൺ സംവിധാനം ചെയ്യുന്ന ചിത്രം ദുൽഖർ സൽമാന്റെ വെഫേറർ ഫിലിംസാണ് നിർമ്മിക്കുന്നത്.
‘ഞണ്ടുകളുടെ നാട്ടിൽ ഒരിടവേള’യ്ക്ക് ശേഷം അൽത്താഫ് സലിം സംവിധാനം ചെയ്യുന്ന ‘ഓടും കുതിര ചാടും കുതിര’ വെള്ളിയാഴ്ച (ഓഗസ്റ്റ് 29-ന്) പ്രദർശനത്തിനെത്തും. ഫഹദ് ഫാസിലിനെയും കല്യാണി പ്രിയദർശനെയും കേന്ദ്ര കഥാപാത്രങ്ങളാക്കി ഒരുക്കുന്ന ഈ റൊമാന്റിക് കോമഡിയിൽ, വിവാഹവേദിയിൽ വച്ച് ജീവിതം മാറിമറിയുന്ന ആബി എന്ന ചെറുപ്പക്കാരന്റെ കഥയാണ് പറയുന്നത്. പിന്നീട് ഗൗരവക്കാരിയായ ഒരു പെൺകുട്ടിയെ കണ്ടുമുട്ടുന്നതും, പഴയ കാമുകിയുടെ തിരിച്ചുവരവും ആബിയുടെ ജീവിതത്തിൽ സങ്കീർണ്ണതകൾ സൃഷ്ടിക്കുന്നു.
ഹൃദു ഹറൂണിനെ നായകനാക്കി ഫൈസൽ ഫാസിലുദീൻ ഒരുക്കുന്ന ആക്ഷൻ-റൊമാന്റിക് ചിത്രമായ ‘മേനേ പ്യാർ കിയാ’ യും വെള്ളിയാഴ്ച (ഓഗസ്റ്റ് 29-ന്) തന്നെ റിലീസ് ചെയ്യും. നിധിയെ തേടി അപകടം പതിയിരിക്കുന്ന മധുരയുടെ തെരുവുകളിലെത്തുന്ന ആര്യന്റെ അതിജീവനത്തിന്റെ കഥയാണ് ഈ ചിത്രം പറയുന്നത്. പ്രീതി മുകുന്ദനാണ് ചിത്രത്തിലെ നായിക.
വ്യത്യസ്തമായ ഈ നാല് കഥകളും ഓണക്കാലത്ത് പ്രേക്ഷകർക്ക് മികച്ച സിനിമാനുഭവം നൽകുമെന്ന പ്രതീക്ഷയിലാണ് സിനിമാ ലോകം.
