‘വെൽകം ടു ലെനാർക്കോ’; വിനീത് ശ്രീനിവാസന്റെ ആക്ഷൻ ത്രില്ലർ ‘കര’ത്തിലെ ആദ്യ വീഡിയോ ഗാനം ശ്രദ്ധനേടുന്നു
വിനീത് ശ്രീനിവാസൻ സംവിധാനം ചെയ്യുന്ന പുതിയ ചിത്രം ‘കര’ത്തിലെ ആദ്യ വീഡിയോ ഗാനം പുറത്തിറങ്ങി. ‘വഴിദീപമെരിയുന്ന നാളചുവപ്പിൻ നിറം…’ എന്ന് തുടങ്ങുന്ന ഗാനം മനോഹരമായ ദൃശ്യങ്ങളോടെയാണ് പ്രേക്ഷകരിലേക്ക് എത്തിയിരിക്കുന്നത്. ഷാൻ റഹ്മാൻ ഈണം നൽകിയ ഗാനം ഇതിനോടകം സാമൂഹിക മാധ്യമങ്ങളിൽ ശ്രദ്ധ നേടിക്കഴിഞ്ഞു.
ചിത്രത്തിലെ നായകനായ നോബിൾ ബാബു തോമസും നായിക രേഷ്മ സെബാസ്റ്റ്യനുമാണ് ഗാനരംഗത്തിൽ പ്രത്യക്ഷപ്പെടുന്നത്. അനു എലിസബത്ത് ജോസിന്റെ വരികൾ കെ.എസ്. ഹരിശങ്കർ, ഇസബെൽ ജോർജ്ജ്, മെഗിഷ രാജ്ദേവ്, അനെറ്റ് സേവ്യർ, അരുന്ധതി പി എന്നിവർ ചേർന്നാണ് ആലപിച്ചിരിക്കുന്നത്. ‘വെൽകം ടു ലെനാർക്കോ’ എന്ന തലക്കെട്ടോടെയാണ് ഗാനം യൂട്യൂബിൽ റിലീസ് ചെയ്തിരിക്കുന്നത്.
തന്റെ സ്ഥിരം ശൈലിയിൽ നിന്ന് മാറി വിനീത് ശ്രീനിവാസൻ ഒരുക്കുന്ന ഒരു ആക്ഷൻ ത്രില്ലറാണ് ‘കരം’. ചിത്രത്തിന്റേതായി നേരത്തെ പുറത്തിറങ്ങിയ ട്രെയിലർ, ഉദ്വേഗജനകമായ രംഗങ്ങളാൽ സമ്പന്നമായിരുന്നു. ഗംഭീര ആക്ഷൻ രംഗങ്ങളും ദൃശ്യമികവും ചിത്രത്തിന്റെ പ്രധാന ആകർഷണങ്ങളാകുമെന്നാണ് ട്രെയിലറും പുതിയ ഗാനവും നൽകുന്ന സൂചന. ‘ഹൃദയം’, ‘വർഷങ്ങൾക്ക് ശേഷം’ എന്നീ ചിത്രങ്ങളുടെ വിജയത്തിന് ശേഷം വിനീത് ശ്രീനിവാസനും വിശാഖ് സുബ്രഹ്മണ്യവും വീണ്ടും ഒന്നിക്കുന്ന ചിത്രം സെപ്റ്റംബർ 25ന് ലോകമെമ്പാടും പ്രദർശനത്തിനെത്തും.
മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യവും വിനീതിന്റെ തന്നെ ഹാബിറ്റ് ഓഫ് ലൈഫും ചേർന്നാണ് നിർമ്മാണം. ‘തിര’യ്ക്ക് ശേഷം വിനീത് ഒരുക്കുന്ന ത്രില്ലർ എന്ന നിലയിൽ പ്രേക്ഷകർ വലിയ പ്രതീക്ഷയോടെയാണ് ചിത്രത്തിനായി കാത്തിരിക്കുന്നത്. നോബിൾ ബാബു തോമസ് തന്നെയാണ് ചിത്രത്തിന്റെ തിരക്കഥയും നിർവഹിച്ചിരിക്കുന്നത്. ജോമോൻ ടി. ജോൺ ഛായാഗ്രഹണം നിർവഹിക്കുമ്പോൾ രഞ്ജൻ എബ്രഹാം ആണ് എഡിറ്റർ. മനോജ് കെ. ജയൻ, കലാഭവൻ ഷാജോൺ, ബാബുരാജ്, ജോണി ആന്റണി എന്നിവരും ചിത്രത്തിൽ പ്രധാന വേഷങ്ങളിലെത്തുന്നു.
പാർവതി കെ. മധുവും മാധവ് രമേശുമാണ് ചിത്രത്തിന്റെ ലൈൻ പ്രൊഡ്യൂസർമാർ. എക്സിക്യൂട്ടീവ് പ്രൊഡ്യൂസർ: ശ്രാവൺ കൃഷ്ണകുമാർ, ജോർജിയയിലെ ലൈൻ പ്രൊഡ്യൂസർ: മാക്ക് ഈറാക്‌ലി മക്കത്സാറീയ (മാക്ക് പ്രൊഡക്ഷൻസ്), വസ്ത്രാലങ്കാരം: മാഷർ ഹംസ, പ്രൊഡക്ഷൻ കൺട്രോളർ: സജീവ് ചന്ദിരൂർ, ക്രിയേറ്റീവ് ഡയറക്ടർ: ഷാരൂഖ് റഷീദ്, സംഘട്ടനം: ലസാർ വർദുകദ്സെ, നോബിൾ ബാബു തോമസ്, ഈറാക്‌ലി സബനാഡ്സെ, പ്രൊഡക്ഷൻ ഡിസൈനർ: വിനോദ് രവീന്ദ്രൻ, കലാസംവിധാനം: അരുൺ കൃഷ്ണ, മേക്കപ്പ്: മനു മോഹൻ, ചീഫ് അസോഷ്യേറ്റ് ഡയറക്ടർ: അഭയ് വാരിയർ, സ്റ്റിൽസ്: അനൂപ് ചാക്കോ, ഫിനാൻസ് കൺട്രോൾ: വിജേഷ് രവി, ടിൻസൺ തോമസ്, പിആർഒ: ആതിര ദിൽജിത്ത്.
