സ്വന്തം ശബ്ദത്തിൽ പ്രൊഫ. അമ്പിളിയായി ജഗതി; 4 മിനിറ്റ് ദൃശ്യവിരുന്നൊരുക്കി ‘വല’ ഫസ്റ്റ് ഗ്ലിംപ്സ്
മലയാളികളുടെ ഹാസ്യത്തിന്റെ കാരണവരായ ജഗതി ശ്രീകുമാർ പ്രേക്ഷകരെ ഞെട്ടിക്കാൻ വീണ്ടും എത്തുന്നു. ‘ഗഗനചാരി’യ്ക്ക് ശേഷം അരുൺ ചന്തു ഒരുക്കുന്ന പുതിയ ചിത്രമായ ‘വല’യിലെ പ്രൊഫ. അമ്പിളി എന്ന കഥാപാത്രത്തിലൂടെയാണ് അദ്ദേഹത്തിന്റെ ഗംഭീര തിരിച്ചുവരവ്. സിനിമാപ്രേമികളുടെ മുഴുവൻ ശ്രദ്ധയും ആകർഷിക്കുന്ന തരത്തിൽ ചിത്രത്തിന്റെ ഫസ്റ്റ് ഗ്ലിംപ്സ് എത്തിയിരിക്കുക ആണ്.
ജഗതി അവതരിപ്പിക്കുന്ന പ്രൊഫ. അമ്പിളിയുടെ വാക്കുകളോടെ ആണ് വീഡിയോ ആരംഭിക്കുന്നത്: “നമ്മുടെ അറിവ് പരിമിതമാണ്. നമുക്കറിയാത്തത് അനന്തവും. അറിവിന്‍റെ കാര്യത്തിൽ ഇന്ന് നാം നിൽക്കുന്നത് ഒരു ചെറുദ്വീപിലാണ്. അതിനുചുറ്റും അനന്തമായ ഒരു സമുദ്രമുണ്ട്. ഇനി വരുന്ന ഓരോ തലമുറയുടേയും കടമ ഈ ദ്വീപിലേക്ക് കൂടുതൽ കരയെ ചേർക്കുകയും അതുവഴി നമ്മുടെ അറിവിനെ അതിന്‍റെ പൂർണ്ണതയിലേക്ക് നയിക്കുകയും ചെയ്യുക എന്നതാണ്.” ഈ വാക്കുകൾ സിനിമയുടെ ഉള്ളടക്കത്തെക്കുറിച്ചുള്ള സൂചന നൽകുന്നു.
ജഗതി ശ്രീകുമാറിന്റെ 73-ാം ജന്മദിനത്തിലാണ് ‘വല’യിലെ അദ്ദേഹത്തിന്റെ ക്യാരക്ടർ പോസ്റ്റർ പുറത്തിറങ്ങിയത്. ഇപ്പോഴിതാ പുറത്തുവന്ന വീഡിയോയിൽ, വിഖ്യാത ശാസ്ത്രജ്ഞൻ സ്റ്റീഫൻ ഹോക്കിംഗിനെ അനുസ്മരിപ്പിക്കുന്ന രീതിയിൽ വീൽചെയറിലാണ് അദ്ദേഹത്തെ കാണുന്നത്. ലോകത്തെ തന്റെ കൈവെള്ളയിൽ ഒതുക്കുന്ന ഒരു ബുദ്ധിമാനായ ശാസ്ത്രജ്ഞന്റെ വേഷത്തിലാണ് ജഗതി എത്തുന്നത് എന്ന് ഗ്ലിംപ്സ് സൂചിപ്പിക്കുന്നു.
‘വല’യിൽ അനാർക്കലി മരിക്കാർ താര എന്ന കഥാപാത്രത്തെ അവതരിപ്പിക്കുന്നു. കലിസ്റ്റോ, വിശാൽ കുര്യൻ, പുറമ്പോക്ക് പ്ലൂട്ടോ, റെനോ എന്നിങ്ങനെ വ്യത്യസ്തമായ പേരുകളുള്ള കഥാപാത്രങ്ങളും ചിത്രത്തിലുണ്ട്. ബേസിൽ ജോസഫ്, വിനീത് ശ്രീനിവാസൻ എന്നിവരും ഗ്ലിംപ്സ് വീഡിയോയിൽ പ്രത്യക്ഷപ്പെടുന്നുണ്ട്. ഗോകുൽ സുരേഷ്, അജു വർഗീസ് എന്നിവർക്കൊപ്പം ‘ഗഗനചാരി’യിൽ അഭിനയിച്ച അനാർക്കലി മരിക്കാർ, കെ. ബി. ഗണേഷ് കുമാർ, ജോൺ കൈപ്പള്ളിൽ എന്നിവരും ഈ സിനിമയുടെ ഭാഗമാണ്. കൂടാതെ, മാധവ് സുരേഷും ഭഗത് മാനുവലും പ്രധാന വേഷങ്ങളിൽ എത്തുന്നു.
‘ഗഗനചാരി’ എന്ന സയൻസ് ഫിക്ഷൻ മോക്യുമെന്ററിക്ക് ശേഷം അരുൺ ചന്തു സംവിധാനം ചെയ്യുന്ന ‘വല’യും ഒരു പുതുമയുള്ള പ്രമേയവും പശ്ചാത്തലവുമാണ് അവതരിപ്പിക്കുന്നത്. ഈ സിനിമയിലെ പ്രധാന ആകർഷണങ്ങളിൽ ഒന്ന് സോംബികളാണ്. മരിച്ചിട്ടും മരിക്കാതെ തുടരുന്ന മനുഷ്യരെയും ജീവികളെയുമാണ് സയന്‍സ് ഫിക്ഷന്‍ ലോകത്ത് സോംബികളെന്ന് വിളിക്കുന്നത്. ഇവരുടെ ആക്രമണത്തില്‍ പെടുന്നവരും സോംബികളായി മാറുന്നതാണ് പൊതുവെ ഫിക്ഷനില്‍ കണ്ടുവരാറുള്ളത്. ഹോളിവുഡ് സിനിമകളിൽ ധാരാളമായി കണ്ടുവരുന്ന സോംബി കഥാപാത്രങ്ങൾ ഇന്ത്യൻ സിനിമയിൽ വളരെ കുറവാണ്. മലയാളത്തിലെ ആദ്യ സോംബി സിനിമകളിൽ ഒന്നായിരിക്കും ‘വല’ എന്നാണ് പ്രതീക്ഷിക്കപ്പെടുന്നത്.
‘ഗഗനചാരി’യുടെ തുടർച്ചയാണോ അതോ പുതിയൊരു സിനിമാറ്റിക് യൂണിവേഴ്സിന് തുടക്കം കുറിക്കുകയാണോ ‘വല’ എന്ന ആകാംഷയും ഇന്ന് പുറത്തുവന്ന ഗ്ലിംസ് വീഡിയോ നൽകുന്നുണ്ട്. ചിത്രത്തിലെ മറ്റ് അഭിനേതാക്കളെക്കുറിച്ചുള്ള വിവരങ്ങൾ ഉടൻ പുറത്തുവിടുമെന്ന് അണിയറ പ്രവർത്തകർ അറിയിച്ചു. ടർട്ടിൽ വൈൻ പ്രൊഡക്ഷൻസ് നിർമ്മിക്കുന്ന ഈ ചിത്രത്തിന്റെ സഹനിർമ്മാണം ലെറ്റേഴ്സ് എന്റർടെയ്ൻമെന്റ്സാണ്. ടെയ്‌ലർ ഡർഡനും അരുൺ ചിന്തുവും ചേർന്നാണ് തിരക്കഥ ഒരുക്കുന്നത്. ഗുരുപ്രസാദ് എം.ജി, സുർജിത് എസ് പൈ എന്നിവരാണ് ഛായാഗ്രഹണം നിർവഹിക്കുന്നത്.
എഡിറ്റിംഗ് സി.ജെ അച്ചുവും, സംഗീതം ശങ്കർ ശർമ്മയും കൈകാര്യം ചെയ്യുന്നു. റെനീഷ് റെഗിയാണ് കലാസംവിധാനം. ക്രിയേറ്റീവ് ഡയറക്ടർ വിനീഷ് നകുൽ, വിഎഫ്എക്സ് മേരാക്കി, പ്രൊമോ ചീഫ് അസോസിയേറ്റ് ഡയറക്ടർ നിഥിൻ മൈക്കിള്‍, പ്രൊമോ പ്രൊഡക്ഷൻ കൺട്രോളർ സജീവ് ചന്തിരൂർ, മേക്കപ്പ് റോണക്സ് സേവ്യർ, കോസ്റ്റ്യും ബുസി ബേബി ജോൺ, സൗണ്ട് ഡിസൈൻ ശങ്കരൻ എ.എസ്, കെ.സി സിദ്ധാർത്ഥൻ, ഫൈനൽ മിക്സ് വിഷ്ണു സുജാതൻ, സ്റ്റിൽ ഫോട്ടോഗ്രഫി രാകേഷ് ആനന്ദ്, വിഷ്വൽ പ്രൊമോഷൻസ് സ്നേക്ക്പ്ലാന്‍റ്, ഡയറക്ടേഴ്സ് ടീം അരുൺ ലാൽ, ശ്രീഹരി, അജയ് കൃഷ്ണൻ വിജയൻ, പിആർഒ ആതിര ദിൽജിത്ത്, ഹെയ്ൻസ്, വിഷ്വൽ പ്രൊമോഷൻസ് സ്നേക്ക്പ്ലാന്‍റ്
