മോഹൻലാലിൻറെ എമ്പുരാനിൽ മമ്മൂട്ടി ഉണ്ടോ?; മറുപടി നല്കി പൃഥ്വിരാജ്, പുതിയ ഫാൻ തിയറികൾക്കും തുടക്കം…
ഇന്ത്യൻ സിനിമയുടെ കംപ്ലീറ്റ് ആക്ടർ മോഹൻലാലിനെ നായകനാക്കി പൃഥ്വിരാജ് സുകുമാരൻ ഒരുക്കിയ മൂന്നാമത്തെ ചിത്രമായ എമ്പുരാൻ റിലീസിന് ഒരുങ്ങുകയാണ്. അടുത്തിടെയാണ് ചിത്രത്തിന്റെ ആദ്യ ടീസർ റിലീസ് ചെയ്തത്. മെഗാസ്റ്റാർ മമ്മൂട്ടിയാണ് ചിത്രത്തിന്റെ ടീസർ ലോഞ്ച് ചെയ്തത്. അതോടെ ചിത്രത്തിൽ അതിഥി വേഷത്തിൽ മമ്മൂട്ടിയും ഉണ്ടെന്നുള്ള വാർത്തകൾ സമൂഹ മാധ്യമങ്ങളിൽ പ്രചരിക്കാൻ തുടങ്ങി.
ഒട്ടേറെ ഫാൻ തിയറികളും സോഷ്യൽ മീഡിയയിൽ വൈറലായി. ചിത്രത്തിൽ പൃഥ്വിരാജ് അവതരിപ്പിക്കുന്ന കഥാപാത്രത്തിന്റെ അച്ഛൻ ആയാണ് മമ്മൂട്ടി എത്തുന്നത് എന്ന് വരെ കഥകൾ പ്രചരിച്ചു. ഏതായാലും ആ വാർത്തകളിലെ സത്യം വെളിപ്പെടുത്തികൊണ്ട് മുന്നോട്ടു വന്നിരിക്കുകയാണ് സംവിധായകൻ പൃഥ്വിരാജ്. ചിത്രത്തിന്റെ പ്രമോഷന്റെ ഭാഗമായി നടത്തിയ ഒരു മാധ്യമ അഭിമുഖത്തിലാണ് പൃഥ്വിരാജ് ഈ വാർത്തകളെ കുറിച്ച് സംസാരിച്ചത്.
മൂന്ന് ഭാഗങ്ങളുള്ള ലൂസിഫർ ഫ്രാൻഞ്ചൈസിന്റെ ഈ രണ്ടാം ഭാഗത്തിൽ മമ്മൂട്ടി ഇല്ല എന്നാണ് പൃഥ്വിരാജ് പറയുന്നത്. അതോടെ മൂന്നാം ഭാഗത്തിൽ അദ്ദേഹം അതിഥി വേഷത്തിൽ എത്തുമോ എന്നുള്ള ചർച്ചകളും ആരംഭിച്ചെങ്കിലും. എമ്പുരാനിൽ ഒരു മമ്മൂട്ടി കഥാപാത്രം ഉണ്ടാവില്ല എന്നാണ് പൃഥ്വിരാജ് വെളിപ്പെടുത്തിയത്. മോഹൻലാൽ നായകനായ ചിത്രത്തിൽ പൃഥ്വിരാജ്, ടോവിനോ തോമസ്, മഞ്ജു വാര്യർ, ഇന്ദ്രജിത് സുകുമാരൻ എന്നിവരും നിർണ്ണായക വേഷങ്ങൾ ചെയ്യുന്നുണ്ട്.
മുരളി ഗോപി രചിച്ച ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ, ലൈക്ക പ്രൊഡക്ഷൻസിന്റെ ബാനറിൽ സുബാസ്കരൻ എന്നിവർ ചേർന്നാണ് നിർമ്മിക്കുന്നത്. 2025 മാർച്ച് 27 നു ചിത്രം മലയാളം, തമിഴ്, ഹിന്ദി, തെലുങ്ക്, കന്നഡ ഭാഷകളിൽ പാൻ ഇന്ത്യൻ റിലീസായി പ്രേക്ഷകരുടെ മുന്നിലെത്തും.
