‘റോഷാക്ക്’ സംവിധായകന്റെ ‘നോബഡി’ക്ക് കൊച്ചിയിൽ തുടക്കം; പൃഥ്വിരാജും പാർവ്വതിയും വീണ്ടും ഒന്നിക്കുന്നു!
മലയാള സിനിമ ലോകത്ത് ആകാംക്ഷയുണർത്തുന്ന കൂട്ടുകെട്ടുമായി ”നോബഡി” എന്ന ചിത്രം ആരംഭിച്ചു. പൃഥ്വിരാജ് സുകുമാരനെയും പാർവ്വതി തിരുവോത്തിനെയും പ്രധാന കഥാപാത്രങ്ങളാക്കി നിസാം ബഷീർ സംവിധാനം ചെയ്യുന്ന ചിത്രത്തിൻ്റെ ചിത്രീകരണത്തിന് കൊച്ചി വെല്ലിങ്ടൺ ഐലൻഡിൽ ആണ് തുടക്കമായത്. ലോകമെമ്പാടുമുള്ള സിനിമാ പ്രേമികൾ ഏറ്റെടുത്ത ‘എമ്പുരാൻ’ എന്ന സൂപ്പർഹിറ്റ് ചിത്രത്തിൻ്റെ റിലീസ് – പ്രൊമോഷൻ തിരക്കുകൾക്ക് ശേഷം പൃഥ്വിരാജ് വീണ്ടും അഭിനയത്തിലേക്ക് തിരിച്ചെത്തുന്നു എന്നത് ഈ ചിത്രത്തിൻ്റെ പ്രധാന ആകർഷണമാണ്.
പൃഥ്വിരാജ് പ്രൊഡക്ഷൻസും ഇ ഫോർ എക്സ്പെരിമെൻറ്സും ചേർന്ന് നിർമ്മിക്കുന്ന ഈ ചിത്രത്തിന് സുപ്രിയ മേനോൻ സ്വിച്ചോൺ നിർവ്വഹിച്ചു. നടൻ ഹക്കീം ഷാജഹാൻ ആദ്യ ക്ലാപ്പ് നൽകി. സുപ്രിയ മേനോൻ, മുകേഷ് ആർ മേത്ത, സി. വി. സാരഥി എന്നിവരാണ് ചിത്രത്തിൻ്റെ നിർമ്മാതാക്കൾ. പൃഥ്വിരാജ് പ്രൊഡക്ഷൻസ്, ഇ ഫോർ എക്സ്പെരിമെന്റ്സ് എന്നീ ബാനറുകളിൽ ആണ് ചിത്രം നിർമ്മിക്കുന്നത്.
അഭിനേതാക്കളുടെ വലിയൊരു നിര തന്നെ ‘നോബഡി’യിൽ അണിനിരക്കുന്നുണ്ട്. അശോകൻ, മധുപാൽ, വിനയ് ഫോർട്ട്, ഹക്കിം ഷാജഹാൻ, ലുക്മാൻ അവറാൻ, ഗണപതി തുടങ്ങിയ പ്രമുഖ താരങ്ങളും ഈ ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. പ്രേക്ഷക പ്രീതി നേടിയ ‘കെട്ട്യോളാണ് എൻ്റെ മാലാഖ’, മമ്മൂട്ടി ചിത്രം ‘റോഷാക്ക്’ എന്നിവയ്ക്ക് ശേഷം നിസാം ബഷീർ സംവിധാനം ചെയ്യുന്ന മൂന്നാമത്തെ ചിത്രമാണിത്.
ബോളിവുഡ് ചിത്രം ‘അനിമൽ’ലൂടെ ശ്രദ്ധേയനായ ഹർഷവർദ്ധൻ രമേശ്വറാണ് ഈ ചിത്രത്തിന് സംഗീതം ഒരുക്കുന്നത്. ഛായാഗ്രഹണം ദിനേശ് പുരുഷോത്തമനാണ് നിർവ്വഹിക്കുന്നത്. ‘റോഷാക്കി’ന് തിരക്കഥ എഴുതിയ സമീർ അബ്ദുള്ളയാണ് ഈ ചിത്രത്തിൻ്റെയും തിരക്കഥയും സംഭാഷണവും രചിക്കുന്നത് എന്നത് ശ്രദ്ധേയമാണ്.
ചിത്രത്തിൻ്റെ മറ്റ് അണിയറ പ്രവർത്തകർ ഇവരാണ്: എക്സിക്യൂട്ടീവ് പ്രൊഡ്യൂസർ-ഹാരിസ് ദേശം, എഡിറ്റർ-ചമൻ ചാക്കോ, പ്രൊഡക്ഷൻ കൺട്രോളർ-റിന്നി ദിവാകർ, പ്രൊഡക്ഷൻ ഡിസൈൻ-ഗോകുൽ ദാസ്, വസ്ത്രാലങ്കാരം-ധന്യ ബാലകൃഷ്ണൻ, മേക്കപ്പ്-റോണെക്സ് സേവ്യർ, ആക്ഷൻ-കലൈ കിംഗ്സൺ, സ്റ്റിൽസ്-രോഹിത് കെ സുരേഷ്, പ്രൊഡക്ഷൻ എക്സിക്യൂട്ടീവ്-വിനോഷ് കൈമൾ, പ്രമോഷൻസ് –പോഫാക്റ്റിയോ, പി ആർ ഒ-എ എസ് ദിനേശ്.
