ഇന്ദ്രജിത്തും അനശ്വരയും ഒന്നിക്കുന്ന ‘മിസ്റ്റർ ആൻഡ് മിസിസ് ബാച്ച്‌ലർ’ തിയേറ്ററുകളിൽ!
ദീപു കരുണാകരൻ ഒരുക്കിയ ചിത്രം ‘മിസ്റ്റർ ആൻഡ് മിസിസ് ബാച്ച്‌ലർ’ ഇന്ന്, 2025 മെയ് 23 ന് തിയേറ്ററുകളിൽ പ്രദർശനം ആരംഭിക്കുകയാണ്. ഇന്ദ്രജിത്ത് സുകുമാരനെയും അനശ്വര രാജനെയും പ്രധാന കഥാപാത്രങ്ങളാക്കി ഒരുങ്ങുന്ന ഈ റൊമാൻ്റിക് കോമഡി ഡ്രാമ ചിത്രം പ്രേക്ഷകരെ ചിരിപ്പിക്കാനും ചിന്തിപ്പിക്കാനും ഒരുങ്ങുകയാണ്. ഹൈലൈൻ പിക്ചേഴ്സിൻ്റെ ബാനറിൽ പ്രകാശ് ഹൈലൈൻ നിർമ്മിച്ച ഈ ചിത്രത്തിൻ്റെ തിരക്കഥ എഴുതിയിരിക്കുന്നത് അർജുൻ ടി സത്യനാണ്.
കല്യാണ ദിവസം വീട്ടിൽ നിന്നും ഒളിച്ചോടുന്ന എംഎൽഎയുടെ അനുജൻ്റെ മകളായ സ്റ്റെഫിയായി അനശ്വര രാജൻ ചിത്രത്തിൽ വേഷമിടുമ്പോൾ, ഏകദേശം 40 വയസ്സുള്ള ബാച്ചിലറായ ജിത്തു എന്ന കഥാപാത്രത്തെയാണ് ഇന്ദ്രജിത്ത് സുകുമാരൻ അവതരിപ്പിക്കുന്നത്. ജിത്തു തൻ്റെ കാറിൽ സ്റ്റെഫിക്ക് ലിഫ്റ്റ് നൽകുന്നതും തുടർന്നുണ്ടാകുന്ന രസകരമായ സംഭവങ്ങളുമാണ് ചിത്രത്തിൻ്റെ പ്രധാന പ്രമേയം. രസകരമായ മുഹൂർത്തങ്ങളിലൂടെയും ആകാംഷ നിറഞ്ഞ നിമിഷങ്ങളിലൂടെയും ചിത്രം പ്രേക്ഷകരെ മുന്നോട്ട് കൊണ്ടുപോകുമെന്ന പ്രതീക്ഷയാണ് ട്രെയിലർ നൽകിയത്.
ദിവസങ്ങൾക്ക് മുൻപ് പുറത്തിറങ്ങിയ ചിത്രത്തിലെ ‘ആരംഭമായി’ എന്ന ഗാനം ഇതിനോടകം തന്നെ പ്രേക്ഷകശ്രദ്ധ നേടിയിരുന്നു. പി എസ് ജയ്ഹരിയും ഡോൺ തോമസും ചേർന്ന് ആലപിച്ച ഈ ഗാനം ചിത്രത്തിൻ്റെ റൊമാൻ്റിക് മൂഡിന് മാറ്റ് കൂട്ടുന്നതായിരുന്നു. ഗാനത്തിന് സംഗീതം നല്കിയിരിക്കുന്നത് പി എസ് ജയ്ഹരിയും റാപ്പ് വരികൾ ഡോൺ തോമസും ഗാനത്തിൻ്റെ വരികൾ മഹേഷ് ഗോപാലും ഒരുക്കിയിരിക്കുന്നു.
ഇന്ദ്രജിത്ത് സുകുമാരൻ, അനശ്വര രാജൻ എന്നിവരെ കൂടാതെ ദയാന ഹമീദ്, റോസിൻ ജോളി, ബിജു പപ്പൻ, രാഹുൽ മാധവ്, സോഹൻ സീനുലാൽ, മനോഹരി ജോയ്, ജിബിൻ ഗോപിനാഥ്, ലയ സിംപ്സൺ, സംവിധായകൻ ദീപു കരുണാകരൻ തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.
ചിത്രത്തിൻ്റെ സംഗീതവും പശ്ചാത്തല സംഗീതവും കൈകാര്യം ചെയ്തിരിക്കുന്നത് പി എസ് ജയ്ഹരിയാണ്. പ്രദീപ് നായർ ഛായാഗ്രഹണവും, സോബിൻ സോമൻ എഡിറ്റിംഗും, സാബു റാം കലാസംവിധാനവും നിർവ്വഹിച്ചിരിക്കുന്നു. മ്യൂസിക് 247നാണ് ചിത്രത്തിൻ്റെ സംഗീത അവകാശം സ്വന്തമാക്കിയിരിക്കുന്നത്.
