‘കൽക്കി 2898 എഡി’യുടെ ത്രീഡി പതിപ്പും വിസ്മയ കാഴ്ചകൾ സമ്മാനിക്കുന്നു…
ഓപ്പണിംഗ് വീക്കെൻഡിൽ റെക്കോർഡ് കളക്ഷൻ നേടിയ പ്രഭാസ് ചിത്രം ‘കൽക്കി 2898 എഡി’ പ്രവൃത്തി ദിവസങ്ങളിലേക്ക് കടക്കുമ്പോളും ബോക്സ് ഓഫീസിൽ മിന്നും പ്രകടനം കാഴ്ചവെക്കുകയാണ്. നാഗ് അശ്വിൻ ഒരുക്കിയ ഈ ബ്രഹ്മാണ്ഡ ചിത്രം ഇതിനോടകം 500 കോടി ക്ലബ്ബിൽ ഇടം നേടി കഴിഞ്ഞു. ചിത്രത്തിൻ്റെ ത്രീഡി പതിപ്പും മികച്ച അഭിപ്രായങ്ങൾ ആണ് നേടുന്നത്. കേരളത്തിലെ 320 സ്ക്രീനുകളിൽ പ്രദർശനം തുടരുന്ന ചിത്രത്തിൻ്റെ 190 സ്ക്രീനുകളിലും ത്രീഡി പതിപ്പ് ലഭ്യമാക്കിയിട്ടുണ്ട്.
വൈജയന്തി മൂവീസിന്റെ ബാനറിൽ സി അശ്വിനി ദത്താണ് നിർമ്മിച്ച ഈ ബ്രഹ്മാണ്ഡ ചിത്രം കേരളത്തിൽ വിതരണത്തിനെത്തിച്ചത് ദുൽഖർ സൽമാന്റെ വേഫറർ ഫിലിംസാണ്. യുകെ മലയാളികൾക്ക് ആവേശം ആകുന്ന വാർത്തയും പുറത്തുവന്നിട്ടുണ്ട്, ചിത്രത്തിൻ്റെ മലയാളം പതിപ്പ് യുകെയിൽ ജൂലൈ 5 ന് റിലീസ് ചെയ്യും.
ഇന്ത്യൻ മിത്തോളജിയിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന സയൻസ് ഫിക്ഷൻ ആയി ഒരുക്കിയ ചിത്രം 3101-ലെ മഹാഭാരതത്തിൻ്റെ ഇതിഹാസ സംഭവങ്ങൾ മുതൽ എഡി 2898 സഹസ്രാബ്ദങ്ങൾ വരെ നീണ്ടുനിൽക്കുന്ന കഥ ദൃശ്യാവിഷ്കരിക്കുന്നു. ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളുടെ കഥയാണ് ചിത്രം പറയുന്നത്.
‘കൽക്കി 2898 എഡി’യിൽ ‘ഭൈരവ’ എന്ന കഥപാത്രത്തെ ആണ് പ്രഭാസ് അവതരിപ്പിച്ചത്. ‘സുമതി’യായി ദീപിക പദുക്കോണും ‘അശ്വത്ഥാമാവ്’ ആയി അമിതാഭ് ബച്ചനും എത്തിയ ചിത്രത്തിൽ ‘യാസ്കിൻ’ എന്ന വില്ലൻ വേഷത്തിൽ കമൽ ഹാസനും എത്തി. ദിഷാ പടാനി, ശോഭന, വിജയ് ദേവരകൊണ്ട, ദുൽഖർ സൽമാൻ, അന്ന ബെൻ തുടങ്ങിയ താരങ്ങളും ശ്രദ്ധേയമായ വേഷങ്ങളിൽ എത്തിയിരുന്നു. പിആർഒ: ശബരി.
