എമ്പുരാൻ അപ്ഡേറ്റ്സ്: കർണാടകയിൽ ചിത്രത്തിന് വമ്പൻ റിലീസ് നല്കാൻ കെജിഎഫ് നിർമ്മാതാക്കളായ ഹോംബാലെ ഫിലിംസ്, ട്രെയിലർ കണ്ട് രജിനികാന്ത്
വലിയ പ്രതീക്ഷയോടെ സിനിമാ പ്രേമികൾ കാത്തിരിക്കുന്ന മോഹൻലാൽ ചിത്രം എമ്പുരാൻ 2025 മാർച്ച് 27-ന് ആണ് ലോകമെമ്പാടുമുള്ള തിയേറ്ററുകളിൽ എത്തുന്നത്. ആശിർവാദ് സിനിമാസ്, ശ്രീ ഗോകുലം മൂവീസ്, ലൈക്ക പ്രൊഡക്ഷൻസ് എന്നിവർ ചേർന്ന് നിർമ്മിച്ച്, പൃഥ്വിരാജ് സംവിധാനം ചെയ്ത ചിത്രത്തിന്റെ മറ്റൊരു ബിഗ് അപ്ഡേറ്റ് കൂടി ഇന്ന് പുറത്തുവന്നിരിക്കുകയാണ്. പാൻ ഇന്ത്യൻ റിലീസായെത്തുന്ന ചിത്രത്തിന്റെ കർണാടകയിലെ വിതരണാവകാശം കന്നഡയിലെ പ്രമുഖ സിനിമാ നിർമ്മാണ വിതരണ കമ്പനിയായ ഹോംബാലെ ഫിലിംസ് ഏറ്റെടുത്തിരിക്കുന്നു. കെ.ജി.എഫ് സീരീസ്, കാന്താര, സലാർ തുടങ്ങിയ വൻ ഹിറ്റുകൾ നിർമ്മിച്ച ഹോംബാലെ ഫിലിംസ് എമ്പുരാൻ കർണാടകയിൽ ഉടനീളം വൻ റിലീസായി എത്തിക്കും.
അതേസമയം, പ്രേക്ഷകർ കാത്തിരിക്കുന്ന എമ്പുരാൻ്റെ ട്രെയിലർ കണ്ട ആദ്യ വ്യക്തി സൂപ്പർസ്റ്റാർ രജനീകാന്താണ് എന്ന് അറിയിച്ചിരിക്കുകയാണ് പൃഥ്വിരാജ്. ട്രെയിലർ കണ്ട ശേഷം അദ്ദേഹം പറഞ്ഞ വാക്കുകൾ തനിക്ക് എന്നെന്നും ഓർമ്മിക്കാനുള്ളതാണെന്ന് പൃഥ്വിരാജ് സോഷ്യൽ മീഡിയയിൽ കുറിച്ചു.
2025 മാർച്ച് 27-ന് ഇന്ത്യൻ സമയം രാവിലെ 6 മണി മുതൽ ചിത്രത്തിന്റെ ആഗോള പ്രദർശനം ആരംഭിക്കും. ലൈക്ക പ്രൊഡക്ഷൻസ്, ആശിർവാദ് സിനിമാസ്, ശ്രീ ഗോകുലം മൂവീസ് എന്നിവയുടെ ബാനറിൽ സുഭാസ്കരൻ, ആന്റണി പെരുമ്പാവൂർ, ഗോകുലം ഗോപാലൻ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. മുരളി ഗോപിയാണ് ചിത്രത്തിന്റെ തിരക്കഥ രചിച്ചിരിക്കുന്നത്.
ആന്ധ്രയിലും തെലുങ്കാനയിലും ദിൽ രാജുവിന്റെ ഉടമസ്ഥതയിലുള്ള ശ്രീ വെങ്കടേശ്വര ക്രിയേഷൻസും, നോർത്ത് ഇന്ത്യയിൽ അനിൽ തടാനിയുടെ നേതൃത്വത്തിലുള്ള എ.എ ഫിലിംസും ചിത്രത്തിന്റെ വിതരണാവകാശം ഏറ്റെടുത്തിട്ടുണ്ട്. 2019-ൽ പുറത്തിറങ്ങിയ ലൂസിഫറിന്റെ രണ്ടാം ഭാഗമായെത്തുന്ന എമ്പുരാൻ മൂന്ന് ഭാഗങ്ങളുള്ള സിനിമാ സീരീസിലെ രണ്ടാമത്തെ ചിത്രമാണ്. ഖുറേഷി-അബ്രാം/സ്റ്റീഫൻ നെടുമ്പള്ളി എന്ന പ്രധാന കഥാപാത്രത്തെ മോഹൻലാൽ അവതരിപ്പിക്കുന്നു. പൃഥ്വിരാജ്, മഞ്ജു വാര്യർ, ടൊവിനോ തോമസ്, ഇന്ദ്രജിത് സുകുമാരൻ, സുരാജ് വെഞ്ഞാറമൂട്, ജെറോം ഫ്ലിൻ, ബൈജു, സായ്കുമാർ, ആൻഡ്രിയ ടിവാടർ, അഭിമന്യു സിങ്, സാനിയ ഇയ്യപ്പൻ, ഫാസിൽ, സച്ചിൻ ഖഡ്കർ, നൈല ഉഷ, ജിജു ജോൺ, നന്ദു, മുരുകൻ മാർട്ടിൻ, ശിവജി ഗുരുവായൂർ, മണിക്കുട്ടൻ, അനീഷ് ജി മേനോൻ, ശിവദ, അലക്സ് ഒനീൽ, എറിക് എബണി, കാർത്തികേയ ദേവ്, മിഹയേൽ നോവിക്കോവ്, കിഷോർ, സുകാന്ത്, ബെഹ്‌സാദ് ഖാൻ, നിഖാത് ഖാൻ, സത്യജിത് ശർമ്മ, നയൻ ഭട്ട്, ശുഭാംഗി, ജൈസ് ജോസ് എന്നിവരാണ് മറ്റ് പ്രധാന താരങ്ങൾ.
ദീപക് ദേവ് സംഗീത സംവിധാനം നിർവഹിച്ച ചിത്രത്തിന്റെ ഛായാഗ്രഹണം സുജിത് വാസുദേവും, എഡിറ്റിംഗ് അഖിലേഷ് മോഹനുമാണ്. മോഹൻദാസ് കലാസംവിധാനം നിർവഹിച്ച ചിത്രത്തിന് ആക്ഷൻ ഒരുക്കിയത് സ്റ്റണ്ട് സിൽവയാണ്. നിർമ്മൽ സഹദേവാണ് ചിത്രത്തിന്റെ ക്രിയേറ്റീവ് ഡയറക്ടർ. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ മാർച്ച് 27-ന് റിലീസിനെത്തുന്ന ചിത്രം ഒരു മലയാള ചിത്രത്തിന് ലഭിക്കാവുന്ന ഏറ്റവും വലിയ പാൻ ഇന്ത്യൻ, ആഗോള റിലീസിനാണ് ഒരുങ്ങുന്നത്.
